Guinea Conakry: Perezida Alpha Condé yemeye kwiyamamariza manda ya 3

Inyandiko gusa
Alpha Condé yatowe bwa mbere mu 2010 nyuma yo kumara imyaka atavuga rumwe n'ubutegetsi bwariho

Ahavuye isanamu, Getty Images

Insiguro y'isanamu, Alpha Condé yatowe bwa mbere mu 2010 nyuma yo kumara imyaka atavuga rumwe n'ubutegetsi bwariho

Perezida Alpha Condé wa Guinée-Conakry yemeye ubusabe bw'ishyaka rye 'Rassemblement du Peuple Guinéen' (RPG) bwo kuribera umukandida-perezida kuri manda ya gatatu itavugwaho rumwe.

Bwana Condé w'imyaka 82 - watowe bwa mbere mu mwaka wa 2010 - yakoze impinduka mu itegekonshinga binyuze muri kamarampaka (référendum) mu kwezi kwa gatatu uyu mwaka.

Byatumye ashobora kwiyamamariza manda ya gatatu.

Ayo matora ya kamarampaka yo kuvugurura itegekonshinga yamaganwe n'abatavuga rumwe n'ubutegetsi, haba n'imyigaragambyo yo kuyamagana.

Mu ntangiriro y'ukwezi gushize kwa munani, ishyaka RPG riri ku butegetsi ryamugennye nk'umukandida waryo mu matora ya perezida ateganyijwe kuba mu kwezi kwa cumi uyu mwaka.

Ariko icyo gihe ntacyo yasubije kuri ubwo busabe bw'ishyaka rye.

Ibikorwa bye byo kugerageza kugundira ubutegetsi byateje impungenge ko Guinée-Conakry igiye gukurikiza inzira imwe n'iy'ibindi bihugu bimwe byo muri Afurika aho ba perezida banze kuva ku butegetsi kandi manda zabo zararangiye.