Amatora muri Guinea: Alpha Condé yongeye kwipima na Cellou Dalein Diallo

Abaturage ba Guinea bagejeje igihe cyo gutora bazindukiye mu matora atavugwaho rumwe aho Perezida Alpha Condé w'imyaka 82 arimo gushaka manda ya gatatu y'imyaka 6 nyuma yo guhindura itegekonshinga.

Uyu munsi watangiye hagwa imvura nyinshi, ariko ubwo yari imaze guhita abatora batangiye gutonda imirongo miremire imbere y'ibiro by'amatora.

Perezida Condé yimye amatwi abamunenga ahindura itegekonshinga, bituma abona uko yongera kwiyamamaza.

Cellou Dalein Diallo w'imyaka 68, ni we w'ingenzi mu bo bahatanye. Bwana Condé yamutsinze inshuro ebyiri mbere.

Abandi bakandida 10 na bo barimo guhatana muri aya matora. Imwe mu miryango itavuga rumwe na leta yari yayamaganye isaba ko ataba.

Iki gihugu cyo mu burengerazuba bw'Afurika gisanzwe kirimo ugucikamo ibice.

Ubushyamirane bushingiye ku moko bwaranze kwiyamamaza, bwatumye habaho kugira ubwoba ko hashobora kubaho ibikorwa by'urugomo mu gihugu mu gihe ibyavuye mu matora byaba bitavuzweho rumwe.

Leta ya Guinea yafunze imipaka n'ibihugu bimwe by'ibituranyi, ivuga ko ari ku mpamvu z'umutekano.

Abaturage bagera kuri miliyoni 5,4 ni bo bujuje ibyangombwa byo gutora. Kumenya ibyavuye mu matora byitezwe mu minsi myinshi iri imbere.

Umukandida mu bahatanye acyeneye kugira amajwi arenga 50% kugira ngo ahite atangazwa ko ari we utsinze amatora.

Yaba atayagejejeho, bigasaba ko haba amatora y'icyiciro cya kabiri ku itariki ya 24 y'ukwezi kwa cumi na kumwe.

Guinea imaze igihe mu butegetsi bw'igitugu n'ubw'igisirikare kuva yabona ubwigenge mu 1958. Yakolonijwe n'Ubufaransa.

Hashize igihe hari ubwoba ko igisirikare cyaba kirimo kongera kwivanga muri politike nanone.

Ku wa gatanu, abagabo bitwaje intwaro bishe Col Mamady Condé wari ukuriye ikigo cya gisirikare cyo mu mujyi wa Kindia uri mu ntera ya 130km mu majyaruguru ashyira uburasirazuba bw'umurwa mukuru Conakry.

Nyuma yaho kuri uwo munsi, minisiteri y'ingabo ya Guinea yasohoye itangazo ivuga ko itsinda ry'abasirikare ryinjiye mu kigo cya gisirikare cya Kindia rikica Col Mamady Condé.

Amakuru amwe yavuze ko abasirikare bagumutse, ariko nyuma abategetsi bavuze ko ibintu byasubiye mu buryo kandi ko abo basirikare bamwishe barimo gushakishwa.