Armenia – Azerbaijan: Abantu hafi 100 bamaze kwicirwa mu mirwano mu karere ka Nagorno-Karabakh

Inyandiko gusa
Umusirikare wo mu bwoko bw'abanya-Armenia arasa imbunda ya rutura ari mu karere ka Nagorno-Karabakh kuri uyu wa kabiri

Ahavuye isanamu, Reuters

Insiguro y'isanamu, Umusirikare wo mu bwoko bw'abanya-Armenia arasa imbunda ya rutura ari mu karere ka Nagorno-Karabakh kuri uyu wa kabiri

Abantu bagera hafi ku 100, barimo n'abaturage b'abasivile, ni bo bamaze gupfira mu mirwano ikomeje kuba hagati y'ingabo z'Armenia n'iz'Azerbaijan zipfa akarere ka Nagorno-Karabakh.

Ako karere k'imisozi gafatwa nk'Azerbaijan, ariko kagenzurwa n'Armenia kuva intambara yo mu mwaka wa 1994 yarangira.

Ako karere kifata nka repubulika kamaze gutangaza ko abasirikare 84 bamaze gupfa guhera ku cyumweru, ndetse n'abaturage b'abasivile.

Azerbaijan ntabwo irahishura umubare w'abasirikare bayo bapfuye, ariko yemeje ko abaturage barindwi b'abasivile bayo bamaze gupfa.

Iyi mirwano yatangiye mu minsi itatu ishize, ubu isa nk'iri kurenga ako karere ka Nagorno-Karabakh ijya n'ahandi.

Kuri uyu wa kabiri, minisiteri y'ingabo y'Armenia yatangaje ko imodoka ya bisi itwara abagenzi yakubisweho n'indege nto itarimo umupilote izwi nka 'drone' y'Azerbaijan, mu mujyi wa Vardenis mu burasirazuba bw'Armenia. Nta bantu bayiguyemo batangajwe.

Azerbaijan ivuga ko ingabo zayo zashenye umurongo w'imodoka z'intambara z'Armenia (Ifoto yo ku itariki ya 28/9/2020)

Ahavuye isanamu, EPA

Insiguro y'isanamu, Azerbaijan ivuga ko ingabo zayo zashenye umurongo w'imodoka z'intambara z'Armenia

Mbere yaho, Azerbaijan yari yatangaje ko abaturage babiri b'abasivile bayo biciwe mu kuraswaho n'Armenia muri Azerbaijan ejo ku wa mbere, bikurikiye abantu batanu bo muri uwo muryango na bo bishwe ku cyumweru.

Kuva mu mwaka wa 2016, iyi ni yo mirwano ya mbere ikaze ibayeho muri aya makimbirane amaze igihe hagati y'izi mpande zombi zipfa ako karere.

Skip Ibisomwa cane and continue reading
Ibisomwa cane

End of Ibisomwa cane

Biteganyijwe ko kuri uyu wa kabiri akanama k'umutekano k'umuryango w'abibumbye (ONU/UN) gakora ibiganiro byihutirwa kuri iki kibazo.

Ibisasu byangije inzu zo mu mujyi wa Martuni wo muri Armenia

Ahavuye isanamu, EPA

Insiguro y'isanamu, Ibisasu byangije inzu zo mu mujyi wa Martuni wo muri Armenia

Armenia na Azerbaijan - byombi byamaze kugaba abandi basirikare ndetse bigatangaza amategeko yo mu bihe by'intambara mu turere tumwe - buri kimwe gishinja ikindi gutangira iyi mirwano.

Hakomeje kwiyongera impungenge ko ibindi bihugu bishobora kwivanga muri iyi mirwano muri aka karere ka Caucase gafatiye runini ibihugu bimwe.

Turukiya yamaze gutangaza ku mugaragaro ko ishyigikiye Azerbaijan, mu gihe Uburusiya - bufite ikigo cya gisirikare muri Armenia - bwasabye ko imirwano ihita ihagarara.