Coronavirus: Kenya yoroheje amategeko ajyanye no gushyingura

Imiryango y'Abanya-Kenya yagize ibyago byo gupfusha umuntu azize coronavirus igiye kujya igira uruhare rugaragara mu kumushyingura, nyuma yuko abategetsi badohoye amategeko.

Mbere, abo mu muryango w'uwazize Covid-19 bareberaga ahitaruye uko abaganga bambaye imyenda yabugenewe yo kwirinda bashyingura uwabo.

Ubu abakuru b'urwego rw'ubuvuzi rwa Kenya bavuga ko imirambo y'abazize Covid-19 itanduza iyi virusi.

Ishami ry'umuryango w'abibumbye ryita ku buzima (OMS/WHO) n'ikigo cy'Afurika cyo kurwanya no kwirinda indwara (CDC) ntabwo baravuga niba umurambo w'uwishwe na Covid-19 ushobora kuyanduza.

Ariko OMS n'ikigo CDC bavuguruye amakuru ajyanye n'ingamba zo gushyingura, bemerera imiryango gusezera ku bayo mu buryo bukwiye.

Bijyanye n'aya mategeko mashya yo gushyingura abazize Covid-19 muri Kenya, abaganga bazajya bitabira umuhango wo gushyingura ari ukugira ngo gusa bayobore icyo gikorwa ngo gikurikize ingamba zo kwirinda iyi virusi.

Mercy Mwangangi, umunyamabanga mukuru ushinzwe kuyobora ibikorwa by'ubuzima muri Kenya, ejo ku wa kabiri yabwiye abanyamakuru ati:

"Bazanemerera ko hakorwa imihango iyo ari yo yose ikozwe mu buryo bwo kwirinda ishobora kugenwa n'idini cyangwa umuco w'umuntu wapfuye".

Mu kwezi gushize kwa munani, leta ya Kenya yemeye ko amategeko yari asanzweho ajyanye no gushyingura abazize Covid-19 yari akaze birenze urugero.

Kugeza ubu muri Kenya hamaze gutangazwa abantu barenga 37,000 banduye coronavirus, muri bo abarenga 650 yarabishe, nkuko imibare ya Kaminuza ya Johns Hopkins yo muri Amerika ibigaragaza.