Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Coronavirus: Abana b'imyaka 12 kuzamura bakwiye kwambara agapfukamunwa – WHO
Ishami ry'umuryango w'abibumbye ryita ku buzima (OMS/WHO) ryatanze amabwiriza avuga ko abana bafite hejuru y'imyaka 12 bakwiye kwambara agapfukamunwa, bijyanye n'ibikurikizwa ku bantu bakuru mu gihugu cyangwa akarere batuyemo.
OMS yemera ko ari bicye bizwi ku kuntu abana banduza iyi virusi, ariko ivuga ko hari gihamya ko ingimbi n'abangavu (cyangwa imiyabaga mu Kirundi) bashobora kwanduza abandi bantu nkuko abantu bakuru na bo banduza.
OMS ivuga ko abana bafite imyaka itanu n'abatarayigezaho, ubusanzwe badakwiye kwambara agapfukamunwa.
Abantu barenga miliyoni 23 bamaze kwandura coronavirus ku isi, muri bo abarenga 800,000 imaze kubica, nkuko imibare ya Kaminuza ya Johns Hopkins yo muri Amerika ibigaragaza.
Ibihugu bitatu bya mbere bifite abanduye benshi ni Leta Zunze Ubumwe z'Amerika, Brazil n'Ubuhinde.
Ariko umubare nyakuri w'abanduye byibazwa ko ari munini kurushaho, bitewe n'ubucye bw'ibikoresho byo kuyipima ndetse n'abayirwaye ariko batagaragaza ibimenyetso.
Dr Tedros Adhanom Ghebreyesus ukuriye OMS, ku wa gatanu yavuze ko yizeye ko iki cyorezo gishobora kuba cyarangiye mu myaka itageze kuri ibiri.
Ariko Sir Mark Walport wo mu kanama k'abahanga muri siyansi bagira inama leta y'Ubwongereza, yaburiye ko bishoboka ko Covid-19 itazacika burundu, ko bishobora gusaba ko abantu bazajya bakomeza guhabwa inkingo mu gihe runaka.
Amabwiriza ya OMS ku bana ku gapfukamunwa ni ayahe?
Inama igaragara ku rubuga rwa OMS ivuga ku byiciro bitatu by'imyaka:
- Abana bafite imyaka 12 kuzamura bakwiye kwambara agapfukamunwa ahantu hamwe n'aho abakuru basabwa ku kambara, by'umwihariko igihe badashoboye gusiga intera ya metero nibura imwe hagati y'abo n'abandi, kandi aho hantu habaka hari ubwandu bwinshi;
- Ku bana bafite hagati y'imyaka itandatu na 11, OMS ibagira inama yo kuzirikana uko ubwandu bumeze aho bari kandi niba umwana ari kugira aho ahurira n'abantu bafite ibyago byinshi byo kwandura nk'abageze mu zabukuru. Inama ya OMS inashimangira ko abantu bakuru bakwiye kugenzura bagafasha abana gukoresha, kwambara no gukuramo agapfukamunwa mu buryo butanga umutekano;
- Abana bafite imyaka itanu n'abari munsi y'imyaka itanu, ubusanzwe ntabwo bwakwiye kwambara agapfukamunwa.
Ku barimu, OMS igira iti: "Ahantu hari ubwandu bwinshi, abantu bakuru bose bafite munsi y'imyaka 60 kandi bafite ubuzima bwiza bakwiye kwambara agapfukamunwa ko mu mwenda (cyangwa mu gitenge), igihe cyose badashoboye gusiga intera ya metero imwe hagati yabo n'abandi".
"Ibi ni ingenzi mu buryo bw'umwihariko ku bantu bakuru bakorana n'abana bashobora kugira aho bahurira mu buryo bwegeranye hagati yabo".
OMS ivuga ko abantu bakuru bafite imyaka 60 no kuzamura, cyangwa abasanzwe bafite ubundi burwayi, bakwiye kwambara agapfukamunwa ko mu rwego rumwe n'akambarwa n'abaganga.
Amabwiriza ya OMS ntabwo asobanura niba umwana urengeje imyaka 12 akwiye kwambara agapfukamunwa ku ishuri, ariko byashoboka ko ari ko bizagenda mu cyumba cy'ishuri gishya cyo muri iki gihe cya Covid-19.
