Beirut: Amafoto yerekana mbere na nyuma yo guturika ku cyambu

Guturika kw'inzu ibikwamo ibicuruzwa ku cyambu cya Beirut byatigishije uyu murwa mukuru wa Liban binahindura umuyonga inzu nyinshi zegereye inyanja, izindi nazo zirangirika cyane.

Abantu bagera ku 137 bimaze kumenyekana ko bapfuye naho abagera ku 5,000 barakomeka. Amashusho y'icyogajuru arerekana ibyangiritse aho wagirango ni intambara ikomeye yahabereye aho kuba ari impanuka.

Ubwato bwitwa Orient Queen bwari buhagaze ku cyambu cya Beirut muri metero zibarirwa muri magana uvuye kuri iriya nzu yaturitse, bwarangiritse ndetse burabirinduka.

Umwe mu bari babutwaye yarapfuye undi n'ubu ntaraboneka, nk'uko bivugwa na kompanyi ikoresha ubu bwato. Ibiro by'iyi kompanyi kuri iki cyambu byahindutse umuyonga kubera guturika.

Inzu z'ubuhunikiro bw'imyaka (grain silos) - zabonekaga nk'inzu nini y'umweru kuri iki cyambu - zazahajwe cyane n'uku guturika.

Genevieve Langdon, umwarimu wigisha isomo rya 'Blast and Impact Engineering' kuri kaminuza ya Sheffield mu Bwongereza, avuga ko imyaka (ibiribwa) yari ihunitse muri iyo nzu yashoboraga kugabanya ubukana bwo guturika.

Ati: "Mu gihe guturika kwageraga ku rukuta rw'iyi nzu, birashoboka ko yafashe igice kinini cy'imbaraga. Iyo hataba iyi nzu tubona ko ibyangiritse hirya y'iyi nzu byari kuba bibi kurushaho."

Ibigo bifasha, bivuga ko abantu bagera ku 300,000 basigaye ntaho kuba bafite kubera iyi mpanuka ndetse ko hari ubwoba bw'ubuke bw'ibiribwa n'imiti.

Mego Terzian ukuriya umuryango w'abaganga batagira umupaka (MSF) avuga ko inzu zo kubika ibintu zarimo imiti n'inkingo kuri iki cyambu zangiritse, ndetse n'ikigo cy'igihugu cy'imashini zikura imyanda mu maraso (dialysis) cyangiritse burundu.

Ishusho ya nyuma y'uku guturika, Bwana Terzina ayigereranya na nyuma y'intambara yabaye muri Liban hagati ya 1970 na 1990.

Yabwiye AFP ati: "Twabaye mu bihe bikomeye gutya mu ntambara ya Liban"

Nyuma yo kwangirika kw'icyambu cya Beirut, ubucuruzi bwifashishije ibyambu bwa Liban ubu burimukira mu mujyi wa kabiri w'iki gihugu, Tripoli, kugira ngo igihugu kigerweho n'imiti, ibiribwa n'ibindi by'ibanze.

Ibihugu bya Qatar, Kuwait na Jordan biravugwa ko biri kohereza ubufasha bwihuse mu buvuzi.

Agace k'ubucuruzi, amazu y'uburiro hagati mu mujyi wa Beirut, mu burengerazuba bw'ahabereye guturika, naho ntihorohewe.

Ibirahuri by'amadirishya n'inzugi byashwanyujwe n'uku guturika. Guverineri w'uyu mujyi Marwan Abboud, yavuze ko gusana ibyangiritse byose bishobora gutwara za miliyari z'amadorari.

Ibindi ku guturika i Beirut

Mu minsi micye yari ishize, abasengera ku musigiti wa Mohammad al-Amin, bariho bishimira umunsi mukuru wa Idi/Eid, ubu batangiye gusukura ibyangiritse mu musigiti wabo kubera uku guturika.

Gusukura kandi byaratangiye muri kiriziya ya mutagatifu Joriji.

.