Malawi: Bari gusubiramo amatora ya perezida, intsinzi ubu ni hejuru ya 50%

None kuwa kabiri abaturage ba Malawi barasubira mu matora ya perezida wa repubulika amezi atanu nyuma y'uko urukiko rw'itegekonshinga rutesheje agaciro ibyavuye mu matora y'umwaka ushize.

Kuva saa kumi n'ebyiri za mugitondo kugeza saa kumi n'ebyiri za nimugoroba ku isaha yo muri Malawi, abaturage baraba batora perezida w'igihugu.

Perezida Peter Mutharika niwe wari watangajwe ko yatsinze amatora yo mu kwezi kwa gatanu 2019 ku ntsinzi ntoya n'amajwi 38,5%.

Uruhande rutavuga rumwe n'ubutegetsi rwaregeye urukiko ko aya matora yabayemo byinshi bitagenze neza.

Abacamanza bemeranyije n'uru ruhande batesha agaciro ibyayavuyemo mu kwezi kwa kabiri uyu mwaka, bategeka ko asubirwamo.

Ubu, abatavuga rumwe n'ubutegetsi bashyize hamwe bashyira imbere umukandida umwe uzahatana na Bwana Mutharika - uri kwiyamamariza manda ya kabiri.

Umukandida wa gatatu, Peter Kuwani, ameze nk'umuntu utabarwa cyane muri uku guhatana.

Amatora araba hari ibwiriza rishya ko utsinda ari ugira nibura amajwi 50% kongeraho rimwe.

Hashize amezi muri Malawi hari ibihe bidasanzwe bya politiki mu mateka y'iki gihugu. Hagiye haba imyigaragambyo yamagana ubutegetsi.

Uwari ukuriye komisiyo y'amatora mu minsi ishize yareguye, ubu hashyizweho ikipe nshya yo gutegura amatora y'uyu munsi kuwa kabiri.

Mu matora, Bwana Mutharika ahatanye n'umunyapolitiki Lazarus Chakwera, wahoze ari umuvugabutumwa, ubu wahuje abatavuga rumwe n'ubutegetsi.

Uzatsinda amatora azaba agomba guhagarika amacakubiri n'urugomo byaranze cyane umwaka ushize. Ruswa, ubukene n'ubushomeri ni ibindi bizaba bireba cyane perezida uzatorwa.

Abanyamalawi biteze ko uwo bazatora ejo azabaha ikizere cy'impinduka mu gihugu.