Coronavirus yishe muganga wagerageje kuburira abantu ko yateye

Umuganga wo mu Bushinwa wagerageje kuburira abantu bwa mbere ko hateye ubwoko bushya bwa coronavirus yamwishe, nkuko byatangajwe n'ibitaro yari arwayiyemo.

Li Wenliang yanduye iyo virusi ubwo yarimo gukora mu bitaro by'i Wuhan - hafatwa nk'izingiro ry'iyo virusi - bya Wuhan Central Hospital.

Dr Li wari ufite imyaka 34 akaba n'impuguke mu buvuzi bw'amaso, yari yatanze ubutumwa bw'impuruza ku baganga bagenzi be ku itariki ya 30 y'ukwezi kwa cumi na kabiri, ariko polisi imusaba kureka "kuvuga ibintu bitari ukuri".

Hari humvikanye amakuru avuguruzanya ku rupfu rwe, ariko igitangazamakuru People's Daily kibogamiye ku butegetsi bw'Ubushinwa cyatangaje ko yapfuye kuri uyu wa gatanu saa munani na 58 z'ijoro ku isaha yo mu Bushinwa.

Iyo virusi imaze guhitana abantu 636 naho abandi 31,161 bamaze kuyandura mu Bushinwa, nkuko bigaragazwa n'imibare mishya y'ikigo cy'igihugu cy'ubuzima.

Abo bapfuye barimo na 73 bashya bari batangajwe ko bayanduye ku munsi w'ejo ku wa kane.

Mu isesengura rye, umunyamakuru wa BBC Stephen McDonell uri mu murwa mukuru Beijing w'Ubushinwa avuga ko urupfu rwe rwababaje bikomeye abaturage.

Yongeyeho ko ari n'ikizamini gikomeye ku butegetsi bwa Perezida Xi Jinping n'ishyaka rye rya gikomunisiti kuko urupfu rwe rwandagaje gahunda yabo yo kugerageza kugenzura buri kintu cyose niyo cyaba kigamije kurengera ubuzima bw'abantu.

Avuga ko biribugore abakora icengezamatwara rya gahunda za leta kumvisha abaturage miliyari 1.4 b'Ubushinwa impamvu impuruza ya Dr Li yirengagijwe.