Leta y'u Burundi yashyizeho itsinda ryo kuvugurura imishahara y’abakozi

Inama y'Abaminisitiri y'u Burundi yateranye mu cyumweru gishize yashyizeho itsinda ryo kwiga ku ivugurwa ry'imishahara y'abakozi ba Leta nk'uko bivugwa n'ibyemezo by'iyo nama.

Abakozi ba Leta mu Burundi basanzwe binubira ubusumbane bw'imishahara, abandi bakinubira umushara muto.

Mu myanzuro y'inama y'abaminisitiri i Burundi, bavuga ko bagenzuye imishahara y'abakozi ba leta bagasangamo ibibazo biterwa n'impamvu zitandukanye.

Zirimo uduhimbazamusyi twatanzwe bitajyanye n'amabwiriza agenga abakozi, abakozi bamwe bahabwa uturusho ku mishahara kuva bahawe akazi, n'inzego zimwe zigenera abakozi imishara zishaka.

Iyi nama yavuze ko ibi byateye kwinuba kw'inzego zimwe z'abakozi bituma kuva mu 2016 hajyaho uburyo bwo gusubiramo imishahara mu gihe cy'imyaka ine.

Iyi nama y'abaminisitiri yanzuye ko hagomba kuvugururwa imishahara hagamijwe kugabanya ubusumbane no gushyigikira umuhate watangiye wo gukemura iki kibazo.

Mu myanzuro y'iyi nama harimo gushyiraho itsinda ryo kunoza iki gikorwa rigaha raporo iyi nama mu gihe cy'ukwezi kumwe.

Raporo ya Banki y'isi ya 2018 ishyira u Burundi ku mwanya wa nyuma mu bihugu umuturage yinjiza amafaranga macye ku mwaka (GDP/per capita).

Ibihugu bitanu bya nyuma kuri uru rutonde ni Madagascar ($460), Niger ($411), Malawi ($389), Sudani y'Epfo ($283) n'u Burundi ($275).