Umugore wo muri Canada watsindiye ibihumbi by'amadolari muri tombola, ashobora kutayahabwa acyekwaho ubujura

Itike yatsinze tombola yo muri Canada, bisa nkaho itazahabwa igihembo yatsindiye kubera ko yaguzwe hifashishijwe ikarita y'inyibano ya banki.

Umugore bivugwa ko yaguze iyo tike, yatawe muri yombi na polisi y'iki gihugu ubwo yari mu nzira yerekeza ahakorera abateguye iyi tombola agiye gufata igihembo yatsindiye.

Polisi yari irimo gukurikirana amakuru y'iyibwa ry'ikofi, iza kuvumbura ko amakarita ya banki yo muri iyi kofi yibwe yakoreshejwe mu kugura amatike ya tombola.

Ucyekwaho gukora ubwo bujura yatahuwe hifashishijwe videwo zifashishwa mu gucunga umutekano w'ahantu zo mu iduka ryo mu ntara ya Newfoundland mu burasirazuba bwa Canada, aho bivugwa ko ayo matike ari ho yaguriwe.

Uyu ucyekwa w'imyaka 33 y'amavuko, ari mu maboko ya polisi guhera ku wa kane w'iki cyumweru, akaba akurikiranyweho ibyaha bibiri byo kugira ikarita y'inyibano ya banki n'ibyaha bitanu by'uburiganya.

Const James Cadigan, umukuru wa polisi yo muri uwo mujyi, yabwiye BBC ko ibihembo k'uwatsinze iyo tombola ari "amafaranga atubutse".

Kompanyi ya Atlantic Lottery Corporation ikoresha tombola ari na yo yari yateguye iyi tombola, yemeje ko iyo tike yatsinze yari yatsindiye amadolari ibihumbi 50 ya Canada - ni ukuvuga amadolari ibihumbi 38 mu madolari y'Amerika.

Ariko yatangaje ko ishyikiriza ibihembo gusa ababitsindiye bakoreshe amatike baguze mu buryo bwemewe n'amategeko.

Itangazo iyi kompanyi yasohoye rigira riti: "Kera kabaye, nadatangwa, aya mafaranga azashyirwa mu isanduku ya Atlantic Lottery ijyamo ibihembo byatsindiwe ba nyirabyo ntibaze kubifata, nuko azakoreshwe nk'ibihembo muri tombola z'ubutaha".

Iri tangazo ryongeyeho riti: "Tuzakomeza kubikurikiranira hafi".