Abategetsi bo muri Liberia bavuga ko 'hafi 60% by'umuriro w'amashanyarazi wibwa' buri mwaka

Inyandiko gusa
Abakora mu bikobwa by'umuriro w'amashanyarazi muri Liberia ubwo basanaga insinga ku itariki ya 12 y'ukwezi kwa cumi mu mwaka ushize, mu nkengero z'umurwa mukuru Monrovia

Ahavuye isanamu, Getty Images

Insiguro y'isanamu, Abakora mu bikobwa by'umuriro w'amashanyarazi muri Liberia ubwo basanaga insinga ku itariki ya 12 y'ukwezi kwa cumi mu mwaka ushize, mu nkengero z'umurwa mukuru Monrovia

Ikigo cya leta ya Liberia gishinzwe gutanga umuriro w'amashanyarazi cyatangaje ko buri mwaka abaturage biba hafi 60% by'umuriro w'amashanyarazi, birahurira mu buryo bunyuranyije n'amategeko umuriro bakoresha mu ngo no mu bikorwa by'ubucuruzi.

Cyatangaje ko ubu bujura buri mwaka bugihombya agera hafi kuri miliyoni 35 z'amadolari y'Amerika.

Cyongeyeho ko uku ari ukucyiba amafaranga cyagakoresheje mu gukwirakwiza umuriro w'amashanyarazi mu gihugu.

Liberia iri kugerageza kongera kubaka ibikorwa by'amashanyarazi, byari byasenywe mu ntambara yabaye muri iki gihugu guhera mu mwaka wa 1989 kugera mu wa 2003.

Leta Zunze Ubumwe z'Amerika ziri gufasha iki gihugu cyo mu burengerazuba bw'Afurika mu gukwirakwiza amashanyarazi.

Ni muri gahunda yiswe Power Africa, yatangijwe na Barack Obama wabaye Perezida w'Amerika.

Ni gahunda yihaye intego yo kugeza umuriro w'amashanyarazi ku bantu miliyoni 50 bo muri Afurika yo munsi y'ubutayu bwa Sahara, bitarenze mu mwaka wa 2020.

Igice kinini cy'umurwa mukuru Monrovia nta muriro w'amashanyarazi gifite

Ahavuye isanamu, Getty Images

Insiguro y'isanamu, Igice kinini cy'umurwa mukuru Monrovia nta muriro w'amashanyarazi gifite

Ariko kugeza ubu, abaturage ba Liberia bari ku kigero cya 12% gusa - barimo n'abatageze ku kigero cya 20% batuye i Monrovia - ni bo bafite umuriro w'amashanyarazi, iki kikaba ari kimwe mu bigero byo hasi cyane ku isi.

Skip Ibisomwa cane and continue reading
Ibisomwa cane

End of Ibisomwa cane

Leta ya Liberia yihaye intego yuko bitarenze mu mwaka wa 2030, izaba yagejeje umuriro w'amashanyarazi kuri 70% by'abaturage barenga miliyoni imwe batuye mu murwa mukuru Monrovia.

Umunyamakuru wa BBC Jonathan Paye-Layleh uri i Monrovia, avuga ko kwiba umuriro w'amashanyarazi ari ikibazo usanga mu bakire no mu bakene.

Avuga ko atari uko baba badashaka kuriha uwo muriro, ahubwo ko ari uko ikigo cy'igihugu cy'amashanyarazi kitarashobora guhaza umubare munini w'abayacyeneye.

Avuga ko bituma iyo hari ubonye urusinga ruca hafi y'iwe cyangwa hafi y'iduka rye, ahita yicomekeraho insinga ze akirahurira umuriro w'amashanyarazi.

Mu guhangana n'icyo kibazo, uyu munyamakuru wa BBC avuga ko ikigo cy'amashanyarazi cya Liberia cyashyizeho itsinda ry'abakozi bakora amarondo, "bagakupira" uwirahuriye umuriro binyuranyije n'amategeko.