DR Congo: Bintou Keita abona ingufu ari imwe mu nzira zo kurangiza ikibazo cya M23 'burundu'

Igisubizo cya gisirikare ku bushotoranyi bwose bwa M23 ni imwe mu nzira yo gukemura ikibazo cy'umuwe wa M23 burundu, nk'uko intumwa y'umunyamabanga wa ONU muri DR Congo Bintou Keita abivuga.

Mu butumwa yatanze kuwa gatatu ari i Goma, Keita yavuze ko ingabo za MONUSCO zifatanyije n'iza leta bagaruye ituze muri teritwari za Nyiragongo na Rutshuru nyuma y'ibitero bya M23.

Ati: "Ariko umuhate wacu ugomba gukurikirwa no kurangiza ikibazo cya M23 burundu".

Keita atanga inzira eshatu - zitarimo kuganira na M23 - ibyo bizashobokamo.

Iya mbere akavuga ko ari "igisubizo gikomeye cya gisirikare ku bushotoranyi cyangwa igitero" cya M23.

Indi nzira yavuze ko ari iya "poliki n'ubushake bw'ibihugu by'akarere" mu kugenzura ibikorwa by'umutekano mucye ku mipaka.

Inzira ya gatatu avuga ko ari porogaramu isanzweho ya leta yo kwambura intwaro imitwe yitwaje intwaro no gusubiza abayigize mu buzima busanzwe.

Keita yagize ati: "Ni ngombwa ko hamwe dufatanya hakaboneka ibisubizo byubaka kandi birambye. Byo kwambura intwaro M23."

M23 yo ivuga ko yifuza ibiganiro na leta ya Kinshasa isaba kubahiriza ibiri mu masezerano yagiranye nayo mu 2013, n'ubundi bwumvikane ivuga ko bwabayeho nyuma.

Leta ya Kinshasa ubu ivuga ko M23 ari umutwe w'iterabwoba, kandi umuvugizi wayo Patrick Muyaya kuwa mbere yatangaje ko bitazashoboka kuganira na M23.

Abasirikare 16 ba Congo barapfuye naho babiri ba MONUSCO barakomereka mu mirwano yo mu cyumweru gishize n'icyabanje hagati yabo na M23, nk'uko ONU ibivuga.

Nta mibare izwi neza ku byo M23 yaba yaratakaje.

Abarwanyi ba M23 basubiye inyuma bava mu duce bari barafashe, bajya mu bice by'ibirunga ahegereye umupaka w'u Rwanda, nk'uko Radio Okapi iterwa inkunga na ONU ibivuga.

Imirwano iheruka mu gace ka Kibumba muri groupement ya Buhumba muri 20Km uvuye i Goma yatumye abantu ibihumbi hafi 100,000 bava mu byabo.

Bintou Keita avuga ko MONUSCO yakoresheje ingufu na za kajugujugu muri iyo mirwano andi ko izo ngabo "zizakomeza kubikora mu kurengera abasivile".

MONUSCO inengwa kunanirwa kurwanya no kurandura imitwe yitwaje intwaro muri kariya karere ka DR Congo.

Uyu niwo mutwe w'ingabo za ONU munini kw'isi umaze imyaka irenga 20 mu butumwa mu burasirazuba bwa DR Congo.

Bintou Keita yavuze ko ubu hari ibikorwa birimo gukorwa byo kurwanya imitwe ya ADF na CODECO ikomeje gucura inkumbi mu ntara za Ituri na Kivu ya ruguru.