Burundi: Ibinyobwa ngo byahinduye uburyohe bigumana ubuziranenge

Abafata ku binyobwa bikorwa n'uruganda Brarudi mu Burundi bavuga ko uburyohe byahoranye bwahindutse, ikigo gishinzwe ubuziranenge mu Burundi kirabyemeza ariko ngo ubuziranenge ntibwahindutse.

Guhinduka kw'icyanga (uburyohe/akanovera) bamwe bavuga ko bishobora kugirana isano no guhinduka k'ubuziranenge (qualité).

Mu ntangiriro z'ukwezi gushize kwa 10, minisitiri ushinzwe ubucuruzi mu Burundi yabwiye abanyamakuru ko mu gihugu hari imyidogo ko ibinyobwa bya Brarudi byatakaje akanovera.

Yasabye ikigo BBN gukora igenzura.

Nyuma y'icyo kiganiro, Brarudi yasohoye itangazo rimenyesha ko "irazwa ishinga n'akanovera k'ibinyobwa ikora ku neza n'abakiriya bayo".

Ejo kuwa kane ku mbuga nkoranyambaga bamwe bongeye kugaragaza ko bakemanga ubuziranenge bw'ibinyobwa bikorwa na Brarudi kubera uko guhinduka.

Ikigo cya leta gishinzwe ubuziranenge (Bureau Burundais de Normalisation,BBN) cyatangaje ko ibinyobwa bya Brarudi "byujije ubuziranenge busabwa".

Bamwe mu banywa ibinyobwa bya Brarudi berekana ko bafite impungenge kuko ibinyobwa banywa ubu bumva byarahindutse cyane bigatakaza umwimerere byahoranye mbere.

Undi yanditse kuri ati: "Nivyo zarahindutse gose, bashizemwo isukari nyishi namazi menshi bagabanya degré d'alcool. Nibatume baduza ibiciro mugabo baduhe ibinyobwa vy'akanovera..."

Ikigo BBN cyatangaje kuri Twitter ko "abanywi bagomba kumenya gutandukanya ubuziranenge n'uburyohe/akanovera".

Kigira kiti: "[Uburyohe] ubwo bushobora guhinduka ariko ubuziranenge ntibuhinduke. Turasaba abafata ibinyobwa kubimenya".

Remy Ndayishimiye umuvugizi wa Brarudi yabwiye BBC ko ntacyo bifuza gutangaza kuri ibi bivugwa.