Amatora ya Canada: Ishyaka rya Trudeau ryatsinze ariko ribura ubwiganze

Justin Trudeau yagumanye ubutegetsi nyuma y'intsinzi ntoya isobanuye ko azayobora guverinoma adafitemo ubwiganze nka minisitiri w'intebe.

Ishyaka rye ryabonye imyanya myinshi mu nteko ariko iyi manda ya kabiri izaba ikomeye kuri Bwana Trudeau kuko bizamusaba guhangana n'andi mashyaka mu gutambutsa amategeko.

Ishyaka rye 'Liberal' rizaba rifite imyanya 156, imyanya iburaho 14 ngo rigire ubwiganze.

Aya matora rusange aboneka nka kamarampaka (référendum) kuri Bwana Trudeau wageragejwe cyane muri manda ya mbere kubera ibibazo binyuranye yahuye nabyo.

Ishyaka rikeba rya 'Conservative' riraba rifite imyanya 122, ryiyongereyeho imyanya 95 ugereranyije n'iyo ryari risanganywe.

Ubwo yarimo ageza ijambo ku batoye ishyaka rye mu gihugu, Bwana Trudeau yagize ati: "Mwakoze kutugirira icyizere kugira ngo tujyane igihugu mu cyerekezo nyacyo".

Ku batamushyigikiye, yavuze ko ishyaka rye rizategekera bose.

Haracyari amajwi yo kubara, ntabwo biramenyekana mu buryo budasubirwaho ayo buri shyaka ryagize.

Gusa ibiteganywa bigaragara ni uko aya matora atahiriye uruhande rw'ishyaka rya 'Conservative' n'umuyobozi waryo Andrew Scheer.

Kuki gukundwa kwa Trudeau kwagabanutse?

Bwana Trudeau yagiye ku butegetsi mu 2015 yizeza "impinduka nyazo" no kuvugurura ibintu.

Ubu nyuma y'imyaka ine, Bwana Trudeau aranengwa ko atakoze bimwe mu byo yemeye.

Nko mu kurengera ibidukikije, abantu banenze umugambi we wo gushyigikira umushinga w'umuyoboro muremure w'ibikomoka kuri peteroli (oil) uca mu misozi.

Akijyaho, yari yijeje ko vuba vuba azahita ahindura inzego z'ubutegetsi ariko aza kuvuga ko atakibikoze, byatumye hari benshi bamunenga cyane.

Gusa, ubushakashatsi bwakozwe n'abahanga bo muri za kaminuza zimwe muri Canada buvuga ko Trudeau yakoze ibyo yasezeranyije ku kigero cya 92%, hejuru y'izindi guverinoma za Canada mu myaka 35 ishize.

Nka we bwite, isura ye - izwi ahanini nk'umuntu w'umunyampuhwe kandi utavangura - iheruka kwangizwa n'amafoto yabonetse yifotoje hambere akiri umusore yisize ibintu by'umukara mu maso bimugira nk'umwirabura, mu gikorwa icyo gihe n'ubu gifatwa nk'irondaruhu.