Umuyobozi wa CAF yishyuriwe kujya mu bihugu bibiri mu minsi imwe

Ahmad Ahmad, Perezida w'impuzamashyirahamwe y'umupira w'amaguru muri Afurika (CAF), ari ku gitutu mu gihe FIFA ikomeje iperereza ku byo aregwa.

Ku ruhande, iperereza rya BBC rigaragaza ko Bwana Ahmad yahawe inyishyu inshuro ebyiri z'ubutumwa yagiyemo mu bihugu bibiri nyamara kandi ku matariki amwe mu gihe cy'igikombe cy'isi cya 2018.

Inyandiko BBC yabonye, zerekana ko uyu mugabo yishyuwe kubera ubutumwa bw'akazi yagiyemo hagati ya tariki 23 y'ukwezi kwa gatandatu na tariki 1 y'ukwezi kwa karindwi.

Icya mbere, inyandiko zigaragaza ko yashyize umukono ku nsimburamubyizi zigaragaza ko kuri aya matariki yari mu Misiri, ashyira kandi umukono ku zindi nyandiko z'insimburamubyizi zigaragaza ko kuri iyo minsi yari mu Burusiya.

Nka Visi Perezida w'impuzamashyirahamwe y'umupira w'amaguru ku isi (FIFA), Bwana Ahmad yagombaga guhabwa insimburamubyizi y'amadolari y'Amerika 450 ku munsi mu gihe cyo gutegura irushanwa.

CAF, ifite icyicaro i Cairo mu Misiri, nta mwanya wihariye igira mu gutegura igikombe cy'isi.

CAF yahaye BBC igisata cya siporo itangazo rivuga ko "Perezida Ahmad yasabye ubuyobozi bwa FIFA kubafasha kuzana impinduka muri CAF kugira ngo ibikorwa bye bijye mu mucyo kurushaho".

Bavuga ko Ahmad Ahmad atasubiza ku byo BBC yamubajije kuko bategereje ibizava mu iperereza rya FIFA.

Mu kwezi gushize, FIFA yamenyesheje ko yohereje umunyamabanga mukuru wayo kuzajya kuyobora no kugenzura ibikorwa byose bya CAF guhera tariki ya mbere z'ukwezi kwa munani.

Bwana Ahmad wahawe kuyobora CAF kuva mu 2017, ari gukorwaho iperereza na FIFA ku birego bya ruswa, birimo ibijyanye no kugura ibikoresho bidasanzwe by'icyumba cy'imyitozo ngororamubiri.

Uyu mugabo w'imyaka 59 ukomoka muri Madagascar inshuro zose yahakanye ibyaha aregwa.

Ku itariki 13 y'ukwezi kwa gatandatu 2018, Bwana Ahmad yagiye i Moscow mu nama rusange ya FIFA mu gikombe cy'isi, yabaye kuva tariki 14 kugeza tariki 11 z'ukwezi kwa karindwi.

Inyandiko BBC yabonye zerekana ko Bwana Ahmad yavuye mu Burusiya tariki 23 y'ukwezi kwa gatandatu akamara iminsi ine mu Misiri, mbere yo gusubira i Moscow avuye no mu rundi rugendo iwabo muri Madagascar hagati ya tariki 27 y'ukwa gatandatu n'iya mbere y'ukwa karindwi.

Gusa, inyandiko zerekana ko tariki 28 y'ukwezi kwa cyenda 2018 Bwana Ahmad yahawe amadolari 18,450 na CAF nk'insimburamubyizi y'iminsi 41 yamaze mu Burusiya hagati ya tariki ya 7 y'ukwezi kwa gatandatu na tariki 17 y'ukwezi kwa karindwi.

Umukono we ugaragara ku nyandiko zerekana uko yakoresheje amafaranga mu rugendo rwitwa 'Ubutumwa: Igikombe cy'isi Uburusiya 2018'.

Ibyumweru bibiri mbere yabwo, tariki ya 9 y'ukwa cyenda, Bwana Ahmad yari yahawe na CAF amadolari 4,040 nk'insimburamubyizi y'iminsi hagati ya tariki 23 y'ukwa gatandatu na tariki 1 y'ukwa karindwi y'uko "yasuye ibiro bya CAF".

Bwana Ahmad yavuye Moscow tariki 23 y'ukwa gatandatu ajya mu Misiri ku cyicaro cya CAF ahagera ku munsi wakurikiyeho.

BBC yamenye ko Bwana Ahmad atari mu Misiri cyangwa mu Burusiya hagati ya tariki 27 y'ukwa gatandatu n'iya mbere y'ukwa karindwi 2018, ahubwo yari muri Madagascar nk'uko inyandiko zibigaragaza.

BBC yamubajije niba kuri ariya matariki atari ari muri Madagascar, ariko yaba we cyangwa CAF ntacyo basubije kuri iki kibazo.

Bwana Ahmad Ahmad uyobora CAF kuva mu 2017 asigaje imyaka ibiri kuri manda ye y'imyaka ine.