Air New Zealand yisubiyeho yemerera abakozi bayo 'tatouage'
Ahavuye isanamu, Tass Cambitzi
Kompanyi itwara abagenzi mu ndege ya Air New Zealand yatangaje ko igiye gukuraho umwanzuro yari yarafashe ubuza abakozi bayo kugira za 'tatouage' zigaragara ku mibiri yabo.
Ivuga ko yisubiyeho mu rwego rwo kureka abakozi bayo bakisanzura mu kugaragaza imico yabo n'ubwiza bw'urunyurane rw'imico y'abantu.
Ku bantu bo mu bwoko bwa Maori muri iki gihugu 'tatouage' ni umuco, ni kimwe mu biranga inkomoko n'umuco wabo.
Air New Zealand ivuga ko guhera mu kwezi kwa cyenda uyu mwaka abakozi bayo bose bazaba bemerewe kugaragaza 'tatouage' zabo mu kazi mu gihe 'zidahungabanya abandi'.
Iyi kompanyi ivuga ko yasanze abantu benshi bagenda bemera ibi bishoshanyo n'inyandiko ku mubiri nk'uburyo bwo kwigaragaza no kwisobanura.
Umwanzuro wo guhagarika 'tatouage' muri Air New Zealand wari wanenzwe n'abantu benshi.
Bimwe mu bitangazamakuru muri iki gihugu bivuga ko uku kwisubiraho kwatewe n'uko hari abakomeye bagizweho ingaruka n'uyu mwanzuro ubabuza 'tatouage'.
Umuyobozi wa Air New Zealand yavuze ko bisubiyeho kuko bashaka kureka abantu bakisanzura kandi bakagaragaza urusobe rw'imico yabo.
Iyi kompanyi ivuga ko yasanze umuntu umwe ku bantu batanu bakuru muri iki gihugu afite nibura 'tatouage' imwe, naho 35% y'abatarengeje imyaka 30 nabo bazifite.
Muri New Zealand ubwoko bw'aba Maori ni ingenzi ku bagabo kugira 'tatouage' mu maso hose, naho ku bagore bakayishyira ku kananwa.
Umuvugizi wa Air New Zealand yavuze ko bakoze ubushakashatsi mu gihe cy'amezi atanu mu bakozi bayo maze bakisubiraho kuko basanze 'tatouage' ari nk'ijambo rya muntu.
Icyakora ngo bashyizeho komite y'abakozi yo kugenzura niba 'tatouage' y'umukozi runaka idateye abandi cyangwa abagenzi ikibazo.
