Cwpl lwcus o Bowys yn ennill y loteri... eto!

Mae cwpl o Aberhonddu wedi ennill £1m yn y Loteri Genedlaethol, a hynny am yr eildro!

Mae Richard Davies, 49, a Faye Stevenson-Davies, 43, wedi ennill er bod y siawns anhygoel o guro'r arian mawr eto yn un mewn 24 triliwn.

Roedd y ddau wedi dathlu eu buddugoliaeth gyntaf ar y rhifau lwcus saith mlynedd yn ôl.

Ond does gan y ddau ddim cynlluniau i roi'r gorau i'w swyddi ar ôl ennill y jacpot fis Tachwedd.

Bydd Mr Davies yn parhau i weithio'n llawn amser fel gyrrwr (courier) tra bydd Ms Stevenson-Davies, gweithiwr iechyd meddwl, yn parhau i gynnig cefnogaeth i'w chleifion dros wyliau'r Nadolig.

Dywedodd Mrs Stevenson-Davies "Roedden ni'n gwybod fod y posibiliadau o ennill eto yn anhygoel ond rydym yn brawf os ydych yn credu y gallwch ennill, gall unrhyw beth fod yn bosibl."

Mae'r tebygolrwydd o'r cwpl i ennill y ddwy loteri - EuroMillions Millionaire Maker yn 2018 ac yna pum rhif a'r bêl fonws ar y Lotto - yn fwy nag un mewn 24 triliwn, yn ôl arbenigwyr cwmni Allwyn, sy'n gyfrifol am y loteri genedlaethol.

Ar ôl ennill y £1m cyntaf, rhoddodd Ms Stevenson-Davies y gorau i'w gwaith fel nyrs iechyd meddwl ac aeth yn ôl i'r brifysgol, gan ennill gradd arall mewn cwnsela a gweithdrefnau therapiwtig.

Bellach, mae ganddi ei busnes ei hun, ac mae'n dweud nad oes ganddi gynlluniau i adael ei chleifion ar ôl ei llwyddiant.

Dywedodd Mr Davies, a oedd arfer bod yn dorrwr gwallt, iddo ddechrau ei swydd fel gyrrwr ddwy flynedd mae'n swydd mae'n "ei charu".

Mae'n defnyddio ei sgiliau i wirfoddoli gydag elusen Haircuts4Homeless yng Nghaerdydd, tra bod Faye'n coginio yn Cegin Hedyn yng Nghaerfyrddin.

Ychwanegodd Mr Davies: "Mae pawb yn parhau i ofyn beth fyddwn ni'n ei wneud yn y dyfodol, does gennym ddim syniad ar hyn o bryd."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.