Ffyddlon neu fradwr? Yr ysgol sy'n cynnal gêm Traitors eu hunain

Mae ysgol uwchradd yng Nghonwy wedi bod yn brysur yn cynnal eu fersiwn eu hunain o gyfres boblogaidd The Traitors.

Disgyblion y chweched dosbarth a'r staff yn ysgol John Bright Llandudno sy'n cynnal y gemau, gyda'r enillydd yn derbyn taleb ac arian yn cael ei roi i elusen.

Mae'r criw yn cymryd rhan mewn heriau wythnosol sydd wedi eu hysbrydoli gan y gyfres boblogaidd ar y BBC, ac yn mynychu sesiynau 'bwrdd crwn' fel sy'n cael ei weld ar y rhaglen.

Dywedodd pennaeth yr ysgol fod y gêm yn ffordd o "ddatblygu sgiliau ychwanegol" i'r disgyblion, a hynny "mewn ffordd real".

Mae'r rhaglen deledu, sy'n cael ei chyflwyno gan Claudia Winkleman, yn gweld cystadleuwyr yn ceisio darganfod pwy yn eu plith sy'n "ffyddlon" a pha rai sy'n "fradwyr".

Mae'r cystadleuwyr yn cymryd rhan mewn heriau amrywiol er mwyn casglu arian, ac yn trafod theorïau a'u hamheuon o amgylch bwrdd crwn er mwyn ceisio darganfod pwy ydi'r bradwyr yn eu mysg.

Mae gan y rhai sy'n cyrraedd y rownd derfynol gyfle i ennill hyd at £120,000, ond, os bydd bradwr yn goroesi tan y diwedd, nhw fydd yn cipio'r holl arian.

Mae'r gyfres wedi denu miliynau o wylwyr - yn eu plith, rhai o ddisgyblion ysgol John Bright yn Llandudno, sy'n chwarae eu gêm eu hunain.

Mae Edith yn ddisgybl chweched dosbarth yn ysgol John Bright.

Ynghyd a'i ffrind Iona, mae'r ddwy wedi bod yn cynllunio sialensau i'w cyd ddisgyblion.

Dywedodd Edith: "Roedden ni wedi dod i fyny efo'r syniad i wneud y Traitors yn John Bright.

"Roedden ni wedi mynd i'r gampfa a dweud amdan y Traitors a faint o hwyl fyddai o i wneud o yn yr ysgol.

"Roedd y syniad wedi dod i fyny o hyn. Maen nhw'n gyffrous. Mae llawer o bobl sy'n caru'r Traitors."

Mae Ifanna a Stevie wedi bod yn edrych ymlaen at fod yn rhan o'r gêm yn yr ysgol.

Dywedodd Ifanna: "Mae pawb sy'n cymryd rhan yn y gystadleuaeth efo dim syniad beth sydd i ddod, dwi'n rili edrych ymlaen i weld beth fydd yn digwydd."

Wrth drafod y gyfres deledu, dywedodd Ifanna ei bod yn credu mai'r bradwyr fydd yn ennill y gystadleuaeth, fydd yn dod i ben nos Wener.

Dywedodd Stevie: "Mae llawer wedi bod yn sôn am y Traitors ers wythnosau, cyn y Nadolig daeth allan gyntaf yn y gwasanaeth ysgol ac ers hynny dyna'r cyfan mae pawb wedi bod yn siarad amdano.

"Dydw i ddim wedi gwylio'r Traitors felly rydw i ychydig yn y tywyllwch gyda'r holl beth, ond yn gyffrous am yr hyn sydd i ddod. Rydw i ychydig yn nerfus."

Mae Cymraes wedi bod yn rhan fawr o'r gyfres eleni - Fiona Hughes o Abertawe, gafodd ei dewis fel 'secret traitor', rôl newydd sbon yn y gyfres eleni.

Wrth siarad â Cymru Fyw, dywedodd fod "pob nerf yn fy nghorff i'n tinglo" pan ddaeth hi i wybod am ei rôl.

"Roedd hi fel bod yn blentyn, yn deffro fore Nadolig, a phopeth ar eich rhestr chi yno - roedd hi'n wych."

Ond cyfaddefodd fod mynd i'r turret gyda'r bradwyr eraill yn heriol.

"Roedd cael y cyfle i fynd ar The Traitors a chynrychioli Cymru a dinas Abertawe yn rhyfeddol," meddai.

"Dwi mor falch o fod yn Gymraes – mae 'na gynhesrwydd, hwyl a charedigrwydd gennym ni fel cenedl."

Mae gweld Fiona yn serennu ar y gyfres wedi ysbrydoli disgyblion ysgol John Bright.

Dywedodd Ifanna ei bod wedi wir mwynhau gweld y Gymraes ar y gyfres.

"Dwi wir wedi mwynhau gweld hi ar y gyfres achos mae hi jest fel be' dwi'n feddwl mae Cymru fel - mae hi'n lyfli."

Roedd Eric yn hoffi gweld cynrychiolaeth o Gymru ar y rhaglen hefyd.

Dywedodd: "Dwi wrth fy modd yn gweld Fiona ar y Traitors, achos pan dwi'n gwylio fo, dwi'n gallu edrych allan am bethau mae pobl Cymraeg yn gwneud - habits bach a'r acen hefyd."

Mr Hywel Parry ydi pennaeth yr ysgol, ac mae'n falch o weld y disgyblion yn datblygu.

"Yma yn y chweched dosbarth mae'r canlyniadau yn wych, mae'r plant yn 'neud cynnydd ffantastig, ond mae'n bwysig ein bod yn edrych ar ôl y plant [ym mhob agwedd] ac yn meithrin sgiliau arwain, ac yn rhoi cyfle iddyn nhw fwynhau eu hunain.

"Mae'r syniad wedi dod gan y disgyblion yn wreiddiol i ailgreu fersiwn eu hunain o'r Traitors.

"Mae'n hynod o bwysig iddyn nhw gael cyfleoedd, datrys problemau, yn gorfod gwneud y trafod ac edrych ar dystiolaeth ond yn gwneud hynny mewn ffordd hwyl, byrlymus a dod i adnabod ei gilydd yn well.

"Bydd nifer o'r disgyblion yn mynd i brifysgolion ledled Prydain cyn bo hir, a felly yn datblygu sgiliau ychwanegol bywyd hefyd, mewn ffordd real."

Fe fydd y disgybl sy'n ennill y gystadleuaeth yn yr ysgol yn derbyn taleb i'w helpu i dalu am offer i'r brifysgol, a bydd unrhyw arian sydd yn weddill yn cael ei roi i elusen.

Bydd y gyfres ddiweddaraf yn dod i ben nos Wener, gyda'r rhaglen olaf ar gael i'w gwylio ar BBC One a BBC iPlayer am 20:30.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.