Cyhuddo dyn wedi gwrthdrawiad angheuol yn Llanpumsaint

Dyn gyda gwallt brown, sbectol du a barf brown yn gwenu wrth edrych at y camera. Mae'n gwisgo crys glas.Llun teulu/Heddlu Dyfed-Powys

Bu farw Aaron Jones yn dilyn gwrthdrawiad â char wrth iddo fynd â'i gi am dro ym mhentref Llanpumsaint

Mae dyn 28 oed wedi ei gyhuddo yn dilyn gwrthdrawiad angheuol yn Sir Gaerfyrddin y llynedd.

Bu farw Aaron Jones, oedd yn 38 oed, yn dilyn gwrthdrawiad â char wrth iddo fynd â'i gi am dro ym mhentref Llanpumsaint ar nos Lun 23 Rhagfyr 2024.

Cafodd Daniel Wyke o Gaerfyrddin ei arestio ar y diwrnod canlynol ac mae bellach wedi cael ei gyhuddo o achosi marwolaeth drwy yrru'n beryglus, ac o yrru'n beryglus.

Mae disgwyl iddo ymddangos yn Llys Ynadon Llanelli ar ddydd Iau 15 Ionawr, 2026.

Llun car heddlu glas a melyn llachar yng nghanol ffordd. Ar ochr dde'r ffordd mae yna wal carreg, i'r chwith mae yna wrych. Mae'r heol yn wlyb.

Dywedodd cynghorydd lleol wedi'r digwyddiad fod y gymuned leol "wedi mynd yn dawel" ac yn "galaru" dros gyfnod y Nadolig

Fe ddigwyddodd y gwrthdrawiad ger Capel y Bedyddwyr Caer Salem ym mhentref Llanpumsaint rhwng 18:45 a 19:45 ar 23 Rhagfyr.

Mewn datganiad ddydd Mawrth dywedodd Heddlu Dyfed-Powys eu bod nhw'n cydnabod bod yr ymchwiliad wedi bod yn un "hir" a'u bod yn "ddiolchgar iawn i deulu Aaron a'r gymuned ehangach am eu hamynedd a'u cefnogaeth".

Dywedon nhw hefyd eu bod yn parhau i gefnogi teulu Aaron wrth i'r achos fynd rhagddo a'u bod yn "ceisio sicrhau cyfiawnder" i Aaron a'i anwyliaid.

Mae'r teulu wedi gofyn am breifatrwydd.

Pynciau cysylltiedig

Straeon perthnasol