Apêl heddlu wedi ymosodiad angheuol yng Nghaerdydd

Mae dyn o'r Mynydd Bychan yng Nghaerdydd wedi marw yn Ysbyty Athrofaol Cymru, bedwar diwrnod ar ôl ymosodiad arno.

Roedd Colm Marcus Boston yn 37 oed, a bu farw ddydd Gwener, 26 Rhagfyr yn dilyn yr ymosodiad yn ardal Cathays y ddinas.

Fe gafodd yr heddlu eu galw i Stryd Pentyrch oddeutu 18:15 ddydd Llun, 22 Rhagfyr.

Mae tri dyn a gafodd eu harestio mewn cysylltiad â'r digwyddiad - dyn 47 oed o Adamsdown, dyn 60 oed o Cathays a dyn 51 oed o Fynachdy - wedi eu rhyddhau ar fechnïaeth tra bod ymholiadau'r heddlu'n parhau.

Dywedodd y Dirprwy Uwch Swyddog Ymchwilio, y Ditectif Ringyll Lauren Wells, o Heddlu'r De: "Mae ein cydymdeimlad diffuant gyda theulu a ffrindiau Colm wrth iddynt ddod i delerau â'u colled drasig.

"Hoffwn ddiolch i'r gymuned am y gefnogaeth i'r ymchwiliad hyd yn hyn ac annog unrhyw un sydd â gwybodaeth i ddod i siarad â ni."

Mae plismyn yn awyddus i dderbyn unrhyw luniau teledu cylch cyfyng neu dash-cam o Ffordd Maindy, Stryd Pentyrch, Ffordd Yr Eglwys Newydd a Theras Cathays rhwng 16:00 a 18:30 ddydd Llun.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.