Nain wedi ofni am ei bywyd mewn ymosodiad gan ddieithryn ar ôl angladd
Digwyddodd yr ymosodiad ar Belinda Strickland yn dilyn angladd ei ffrind
- Cyhoeddwyd
Roedd nain yn ofni ei bod hi'n "mynd i farw" mewn ymosodiad gan ddieithryn beichiog wedi angladd yng Nghaerdydd.
Roedd Belinda Strickland, 65, mewn digwyddiad er cof am ffrind agos yng Nghlwb Ceidwadol Y Slot pan ddigwyddodd yr ymosodiad gan Danielle Oliver ym mis Mehefin y llynedd.
Fe wnaeth Oliver, 39, ymosod ar Ms Strickland heb rybudd gan dorri ei hasennau, achosi anawsterau anadlu a diagnosis parhaol o emffysema.
Dywedodd Ms Strickland ei bod yn "synnu" ar ôl i Oliver dderbyn dedfryd ohiriedig yn Llys y Goron Caerdydd ym mis Gorffennaf.
Roedd Ms Strickland wedi torri chwech o'i hasennau a dywedodd bod un wedi gwneud twll yn ei hysgyfaint
Cafodd y nain i 14 o blant ei chludo i Ysbyty Athrofaol Cymru yn anymwybodol, a dywedodd ei bod hi wedi deffro yn yr uned gofal dwys ychydig o ddyddiau yn ddiweddarach.
"Wnes i deimlo pwniad caled ar ochr fy mhen... a wnes i ddisgyn i'r llawr," meddai Ms Strickland.
"Edrychais i fyny a welais dynes yn sgrechian arnai... doeddwn i erioed wedi gweld hi o'r blaen, roedd hi'n hollol ddiarth i fi a doedd gen i ddim syniad pam wnaeth hi ymosod arnai."
Dywedodd Ms Strickland ei bod wedi treulio 12 diwrnod yn yr ysbyty
Roedd Ms Strickland wedi torri chwech o'i hasennau a dywedodd bod un wedi gwneud twll yn ei hysgyfaint.
"Dywedodd y meddygon fy mod i'n lwcus i fod yn fyw. Roedd fy mhedair merch yna yn gafael fy llaw tra o'n i'n anymwybodol.
"Doedden nhw ddim yn gwybod os o'n i am farw."
Ychwanegodd Ms Strickland, sydd ag arthritis a chyflwr ar ei chalon, ei bod wedi "treulio 12 diwrnod yn yr ysbyty ar ôl brwydro am fy mywyd".
Cafodd Danielle Oliver ddedfryd 66 wythnos, wedi'i ohirio am ddwy flynedd, yn Llys y Goron Caerdydd ym mis Gorffennaf
Cafodd Oliver, a oedd yn 22 wythnos yn feichiog adeg yr ymosodiad, ddedfryd 66 wythnos, wedi'i ohirio am ddwy flynedd, yn Llys y Goron Caerdydd ym mis Gorffennaf.
Cafodd hefyd orchymyn atal am bum mlynedd a gofyniad i wneud gweithgaredd adsefydlu 10 diwrnod.
Dywedodd y Barnwr Simon Mills: "Gall hyd yn oed digwyddiadau byr o drais gael canlyniadau trychinebus."
Ychwanegodd: "Dydw i ddim am fynd trwy'r manylion o pam wnaethoch chi'r penderfyniad a wnaethoch chi.
"Roeddech chi'n feichiog ar y pryd ac rwy'n ymwybodol bod yn rhaid addasu eich meddyginiaeth.
"Daeth â mater i'ch sylw a achosodd i chi wneud penderfyniad hollol anghywir."
'Dim carchar, dim iawndal'
Dywedodd Ms Strickland ei bod yn "synnu" gyda'r ddedfryd.
"Dim amser yn y carchar. Dim iawndal. Mae hi wedi cerdded yn rhydd tra dwi'n parhau i fyw gyda chanlyniadau be' ddigwyddodd."
Ychwanegodd: "Fydda i byth yr un peth oherwydd be' ddigwyddodd. Wnai ddim hyd yn oed mynd i'r archfarchnad ar ben fy hun ddim mwy.
"Dydy Danielle Oliver erioed wedi ymddiheuro i mi am be wnaeth hi... fyswn i wedi gallu marw.
"Dwi dal mewn lot o boen ar ôl yr ymosodiad a fydd bywyd byth yr un fath i fi eto."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
