အီရတ်က အမေရိကန် စစ်စခန်းတွေကို ပဲ့ထိန်းဒုံးကျည် တဒါဇင်လောက်နဲ့ အီရန် ပစ်ခတ်ခဲ့

ဇန်နဝါရီလ ၇ရက်နေ့ ညနေ ၅နာရီခွဲလောက် အီရတ်မှာ စခန်းချထားတဲ့ အမေရိကန်လေတပ်စခန်းကို ဖျက်အားပြင်း ပဲ့ထိန်း ဒုံးကျည် ဒါဇင်လိုက်နဲ့ အီရန်ကနေ ပစ်ခတ်ခဲ့တယ်လို့ အမေရိကန် ကာကွယ်ရေးဝန်ကြီးဌာနက ထုတ်ပြန်ပါတယ်။

ဒါက အီရန်နိုင်ငံရဲ့ စစ်တပ်အကြီးအကဲ ကာဆမ်ဆူလေမာနီကို အမေရိကန်သမ္မတ ဒေါ်နယ်ထရမ့်ရဲ့ အမိန့်ပေးသတ်ဖြတ်မှုအပြီး အီရန်က တုန့်ပြန်ခဲ့တာဖြစ်တယ်လို့တိုက်ခိုက်မှုအပြီးမှာ အီရန်ရဲ့ နိုင်ငံပိုင် ရုပ်မြင်သံကြားက ထုတ်လွှင့်ပါတယ်။

အနည်းဆုံးတော့ အဲဘယ် နဲ့ အာအဆက် လေတပ်စခန်း ၂ခုလုံးမှာ တိုက်ခိုက်ခံခဲ့ရတယ်လို့ ပင်တဂွန်က ထုတ်ပြန်ပါတယ်။

အဲဒီလိုတိုက်ခိုက်ခံရမှုကြောင့် ထိခိုက်၊ အသက်ဆုံးရှုံးမှုရှိမရှိကတော့ မသေချာသေးပါဘူး။

အီရတ်မှာရှိတဲ့ အမေရိကန်ရဲ့ စစ်အခြေစိုက်စခန်းတွေ အပေါ်တိုက်ခိုက်လာနိုင်တယ်ဆိုတာကို သမ္မတကို အသိပေးခဲ့ပြီး သမ္မတကလည်း အမျိုးသားလုံခြုံရေးအဖွဲ့ရဲ့ အကြံပေးမှုတွေနဲ့ အခုလိုအခြေအနေကို စောင့်ကြည့်နေတယ်လို့ အိမ်ဖြူတော် ပြောရေးဆိုခွင့်ရှိသူ စတက်ဖနီ ဂရေးရှန်က ထုတ်ပြန်ပြော ဆိုပါတယ်။

အီရတ်မှာ အမေရိကန်က သတ်ဖြတ်ခဲ့တဲ့ အီရန်ထိပ်တန်းစစ်ဗိုလ်ချုပ် တဦးသေဆုံးအပြီး ၂ နိုင်ငံကြား အပြန်အလှန်တိုက်ခိုက်မှုတွေ ဖြစ်ပေါ်နေတာဖြစ်ပါတယ်။ ဆက်လက်ဖြစ်ပေါ်မယ့် သတင်းတွေကိုလည်း ဘီဘီစီကတင်ဆက်ပေးဦးမှာဖြစ်ပါတယ်။