ကာဆမ်ဆူလေမာနီ - အမေရိကန် ကျဆုံးပါစေလို့ အီရန် ဗိုလ်ချုပ်ကြီး ဈာပနမှာ ကြွေးကြော်

အီရန်ဗိုလ်ချုပ်ကြီး အီရတ်လေဆိပ်က အထွက်မှာ အမေရိကန်ရဲ့ ဇန္နဝါရီ ၃ ရက် လေကြောင်းတိုက်ခိုက်မှုကြောင့် သေဆုံးသွားပြီး နောက်တစ်နေ့မှာ လေကြောင်းတိုက်ခိုက်ခံရမှု ထပ်ဖြစ်ခဲ့တယ်လို့ အီရတ်အစိုးရ ရုပ်သံက ကြေညာပါတယ်။

ဒီတိုက်ခိုက်မှုမှာ လူခြောက်ဦးသေဆုံးသွားတယ်လို့ အီရတ်စစ်တပ်က သတင်းရင်းမြစ်တွေက ပြောပါတယ်။

အီရတ် စစ်သွေးကြွတပ်ဖွဲ့ ယာဉ်တန်းတစ်ခု စနေနေ့ ဒေသအချိန် မနက်ပိုင်းအစောပိုင်း တိုက်ခိုက်ခံရတာလို့ ဆိုပါတယ်။

ဒါပေမဲ့ အမေရိကန်စစ်တပ်က ပြောခွင့်ရသူကတော့ အမေရိကန်ဦးဆောင်တဲ့ မဟာမိတ်တပ်တွေက အဲဒီဒေသမှာ တိုက်ခိုက်တာ မရှိဘူးလို့ ဒီတိုက်ခိုက်မှု သတင်းကို ငြင်းဆိုပါတယ်။

အရှေ့အလယ်ပိုင်းမှာ လက်တုံ့ပြန်လာနိုင်တာတွေရှိတဲ့အတွက် နောက်ထပ် စစ်အင်အား ၃၀၀၀ ကို ဒီဒေသကို ထပ်လွှတ်ထားတယ်လို့ အမေရိကန်က ဆိုပါတယ်။

သမ္မတ ဒေါ်နယ်ထရမ့်က ကမ္ဘာ့နံပါတ်တစ် အကြမ်းဖက်သမားကို ချေမှုန်းခဲ့တာလို့ ပြောပေမဲ့ ဘာကြောင့် ဒီလို အလျင်စလို သတ်ဖြတ်ခဲ့တယ်ဆိုတာကိုတော့ ထရမ့်အစိုးရ တာဝန်ရှိသူတွေက မပြောပါဘူး။

အမေရိကန် သမ္မတဟောင်းတွေ ဖြစ်တဲ့ ဘားရက်အိုဘားမားရော ဂျော့ဘုရှ်ကရော ဒီဗိုလ်ချုပ်ကြီးကို တိုက်ခိုက်သတ်ဖြတ်မှုဟာ အန္တရာယ်များလွန်းတယ်ဆိုပြီး လက်မခံခဲ့ကြပါဘူး။

အခြေအနေတွေ တင်းမာနေတာကြောင့် အမေရိကန် နိုင်ငံသားတွေ အီရတ်ကနေ အမြန်ဆုံး ပြန်ထွက်ခွာကြဖို့ အမေရိကန် နိုင်ငံခြားရေးဝန်ကြီးဌာနက သတိပေးထားပါတယ်။

အမေရိကန် ကျဆုံးပါစေလို့ ဈာပနရှုသူတွေ ကြွေးကြော်

သေဆုံးသူ အီရန် ဗိုလ်ချုပ်ကြီး ဈာပနကို အီရတ်မြို့တော် ဘဂ္ဂဒက်မှာ ဧရာမ လူစုလူဝေးကြီး တက်ရောက်ခဲ့ကြပါတယ်။

ဒီဗိုလ်ချုပ်ကြီးဟာ အီရန်ရဲ့ အရှေ့အလယ်ပိုင်း စစ်ဆင်ရေးတွေကို ကွပ်ကဲသူဖြစ်ပြီး သူသေဆုံးခဲ့ရမှုအတွက် ပြင်းပြန်ထန်ထန် လက်တုံ့ပြန်မယ်လို့ အီရန် ထုတ်ပြောထားပါတယ်။

စနေနေ့ဟာ ဆူလေမာနီအတွက် အသုဘရှုရက် သုံးရက်ရဲ့ အစရက်ဖြစ်ပြီး သူ့ကို အီရန်က သူ့ဇာတိမြို့မှာ မြှုပ်နှံမှာပါ။

လမ်းပေါ်ထွက်လာသူတွေဟာ သူနဲ့အတူ သေဆုံးခဲ့တဲ့ အီရတ်စစ်သွေးကြွ ခေါင်းဆောင်ရဲ့ ဈာပနကိုလည်း တက်ရောက်ကြတာ ဖြစ်ပါတယ်။

စနေနေ့ မနက်အစောပိုင်းကတည်းက ဘဂ္ဂဒက်မှာ လူတွေ စုဝေးခဲ့ကြပါတယ်။ သူတို့ဟာ အီရတ်အလံနဲ့ လက်နက်ကိုင်အဖွဲ့ အလံတွေ ဝှေ့ရမ်းကြပြီး အမေရိကန် ကျဆုံးပါစေလို့လည်း ကြွေးကြော်ကြပါတယ်။ သူတို့က သေဆုံးသူ ဗိုလ်ချုပ်ကြီးနဲ့ အီရန်ခေါင်းဆောင် အယာတိုလာ အလီ ခါမေနီရဲ့ ဓာတ်ပုံတွေကို ကိုင်ထားကြပါတယ်။

အီရန်ဘက်က သေဆုံးသူတွေရဲ့ ရုပ်အလောင်းတွေကို စနေနေ့ ညနေပိုင်းမှာ လေယာဉ်နဲ့ အီရန်ဘက်ကို ပြန်သယ်မှာ ဖြစ်ပါတယ်။ သူတို့အတွက် အောက်မေ့ဖွယ် အခမ်းအနား သုံးရက်လုပ်မယ်လို့ ကြေညာထားပါတယ်။ ဗိုလ်ချုပ်ကြီးရဲ့ ဈာပနကိုတော့ သူ့ဇာတိမြို့ ကာမန်မှာ အင်္ဂါနေ့မှာ ပြုလုပ်မှာပါ။

အီရတ်က လူတချို့ကတော့ ဆူလေမာနီသေဆုံးမှုအတွက် ဘဂ္ဂဒက်က လမ်းတွေပေါ်မှာ အောင်ပွဲခံနေကြပါတယ်။ အခုလပိုင်းတွေမှာ ဖြစ်တဲ့ ငြိမ်းချမ်းစွာ ဆန္ဒပြမှုတွေကို အကြမ်းဖက် ဖြိုခွင်းဖို့ သူက နောက်ကွယ်က စေခိုင်းခဲ့တယ်လို့ စွပ်စွဲခဲ့ကြပါတယ်။

အီရတ်က ကြားညပ်

အီရန်ဟာ အိမ်နီးချင်း အီရတ်နိုင်ငံက ရှီးယား စစ်သွေးကြွ အုပ်စုတွေကို အထောက်အပံ့တွေ ပေးနေတာပါ။ သေဆုံးသူ ဗိုလ်ချုပ်ကြီး ဆူလေမာနီဟာ အီရတ်က ဘဂ္ဂဒက် လေဆိပ်ကိုရောက်ပြီး သူတိုက်ခိုက်ခံရချိန်မှာ အဲဒီစစ်သွေးကြွအဖွဲ့က အရာရှိကြီးတွေနဲ့အတူ ယာဉ်တန်းနဲ့ ထွက်ခွာသွားချိန်မှာ အမေရိကန်ရဲ့ ဒုံးကျည်တွေနဲ့ တိုက်ခိုက်ခံခဲ့ရတာပါ။

အဲဒီတိုက်ခိုက်မှုမှာ အီရန်က ထောက်ပံ့ထားတဲ့ အီရတ် ရှီးယား စစ်သွေးကြွအဖွဲ့က ခေါင်းဆောင် အယ်လ်မူဟန်ဒစ်လည်း သေဆုံးခဲ့ပါတယ်။

ဒီလို တင်းမာမှုတွေကြားမှာ အီရန်ရော အမေရိကန်နဲ့ရော မဟာမိတ်ဖြစ်တဲ့ အီရတ်အတွက် အခက်တွေ့တဲ့ အခြေအနေကို ရောက်သွားခဲ့ပါတယ်။ အိုင်အက်စ် စစ်သွေးကြွ အဖွဲ့နဲ့ တိုက်ခိုက်မှုတွေအတွက် အီရတ်ဘက်က အကူအညီပေးဖို့ အမေရိကန်စစ်သားတွေ ထောင်ချီပြီး အီရတ်မှာ ကျန်နေပါသေးတယ်။ ဒါပေမဲ့ အခုအခြေအနေမှာတော့ အမေရိကန်က သူတို့ကြားမှာ သဘောတူထားတဲ့ အခြေအနေကို ကျော်ပြီးလုပ်ခဲ့တယ်လို့ အီရတ် အစိုးရက အခိုင်အမာပြောထားပါတယ်။

အီရတ် ဝန်ကြီးချုပ်က ဒီတိုက်ခိုက်မှုဟာ အီရတ်ရဲ့ အချုပ်အခြာအာဏာကို ပေါ်ပေါ်ထင်ထင် ထိပါးတာဖြစ်ပြီး အီရတ်ရဲ့ဂုဏ်သိက္ခာကို မဆင်မခြင် တိုက်ခိုက်လိုက်မှုပဲလို့ ပြောပါတယ်။

အီရန်ဘယ်လို တုံ့ပြန်သလဲ

"သူဘုရားသခင်ဆီထွက်သွားပေမဲ့ သူ့ရည်မှန်းချက်တွေ အဆုံးသတ်သွားတာမဟုတ်ပါဘူး။ သူ့နဲ့ တခြားသူရဲကောင်းတွေရဲ့ သွေးတွေစွန်းသွားတဲ့ ရာဇဝတ်ကောင်တွေအတွက် လက်စားချေမှုကြီးတွေက စောင့်နေပါတယ်" လို့ အီရန် ခေါင်းဆောင် အယာတိုလာ အလီ ခါမေနီက ပြောပါတယ်။

အီရန်-အမေရိကန် ဆက်ဆံရေးဟာ ပြီးခဲ့တဲ့ သီတင်းပတ်မှာ အပြန်အလှန်တိုက်ခိုက်မှုတွေကြောင့် တင်းမာလာခဲ့ပါတယ်။ အမေရိကန်က အီရတ်နဲ့ ဆီးရီးယားက အီရန်အထောက်အပံ့ခံ အီရတ် စစ်သွေးကြွတွေကို လေကြောင်းက တိုက်ခိုက်ခဲ့ပါတယ်။

ဒါဟာ ဒုံးကျည်တိုက်ခိုက်မှုတစ်ခုမှာ အမေရိကန် စီးပွားရေးသမားတစ်ယောက် သေဆုံးသွားတဲ့အတွက်လို့ ဆိုပါတယ်။ ဒါကြောင့် အီရန် ထောက်ခံသူတွေက အီရတ်မှာရှိတဲ့ အမေရိကန် သံရုံးကို လက်တုံ့ပြန် တိုက်ခိုက်ခဲ့ပါတယ်။

ကုလသမဂ္ဂ လုံခြုံရေးကောင်စီကို အီရန် သံအမတ်ကြီးက ပို့တဲ့စာမှာတော့ နိုင်ငံတကာ ဥပဒေတွေအရ အီရန်မှာ ကိုယ့်နိုင်ငံကိုယ် ကာကွယ်ပိုင်ခွင့်ရှိတယ်လို့ ပြောပါတယ်။

နိုင်ငံရေး အကဲခတ်တွေကတော့ အီရန်က အမေရိကန်ကို ဆိုင်ဘာတိုက်ခိုက်မှုတွေနဲ့ အရှေ့အလယ်ပိုင်းမှာ ရှိတဲ့ အမေရိကန် စစ်ဘက်ဆိုင်ရာ နေရာတွေကို ပစ်မှတ်ထား တိုက်ခိုက်တာတွေ လုပ်နိုင်တယ်လို့ သုံးသပ်ထားပါတယ်။

သုံးသပ်ချက်

လစ္စ ဒူးဆက် - နိုင်ငံတကာ သတင်းထောက်ချုပ်

အီရန်ခေါင်းဆောင်တွေအတွက် အခုချိန်မှာ အရေးအကြီးက သေဆုံးသူ ဗိုလ်ချုပ်ကြီးဟာ ဘယ်လောက် အရေးပါတယ်ဆိုတာ ပြတ်ပြတ်သားသား ပြသနိုင်ဖို့ ဖြစ်ပါတယ်။

သူ့ကို အီရန် စစ်တပ်အတွက် အရေးအကြီးဆုံးသူဖြစ်ပြီး နိုင်ငံရေးသမားတွေထဲမှာ အရေးအပါဆုံးသူတစ်ယောက်အဖြစ် ပြသနိုင်ဖို့ဖြစ်ပါတယ်။ အီရန် ခေါင်းဆောင်တွေဟာ ကြီးကျယ်တဲ့ ဈာပန အခမ်းအနားနဲ့ အီရန် မြို့ကြီးတွေက လမ်းတွေမှာ လူတွေအများအပြား ဈာပန တက်ရောက်တာကို မြင်ချင်နေကြပါတယ်။

ဒါက သူ့ကို အာဇာနည်တစ်ယောက် အဖြစ် ပုံဖော်သတ်မှတ်နိုင်ဖို့ပါ။ အခုအခြေအနေတွေအရ သူ့တပ်ဖွဲ့ဝင်တွေကြားမှာ သူဟာ သူရဲကောင်းအဖြစ် မှတ်ယူခံထားရပြီးပါပြီ။ အဲဒီပုံရိပ်ကို အီရန်ခေါင်းဆောင်တွေက ဆက်ရှိစေချင်ပါတယ်။ သူသေသွားတာတောင် သူရှိနေစဉ်ကအတိုင်း လွှမ်းမိုးနိုင်သူအဖြစ် မြင်ချင်ကြတာပါ။

ကာဆမ် ဆူလေမာနီဘယ်သူလဲ

အသက် ၆၂ နှစ်အရွယ် ဗိုလ်ချုပ်ကြီးဟာ အီရန်ခေါင်းဆောင် အယာတိုလာ ခါမေနီ ပြီးရင် သြဇာအရှိဆုံးအဖြစ် သတ်မှတ်ထားကြပါတယ်။ သူဟာ အီရန်တော်လှန်ရေးတပ်ရဲ့ ကာ့ဒ်စ် Quds အထူးတပ်ဖွဲ့က တပ်မှူးကြီး ဖြစ်ပြီး သူ့တပ်ဖွဲ့က အီရန်ခေါင်းဆောင်ကိုယ်တိုင် တိုက်ရိုက်ကိုင်တွယ်တဲ့တပ်ပါ။ ပြီးတော့ သူကို့ နိုင်ငံရဲ့ သူရဲကောင်းတစ်ယောက်အဖြစ်လည်း ချီးမြှောက်ထားကြတာပါ။

သူဟာ ဆီးရီးယား သမ္မတ ဘာရှား အယ်လ် အာဆတ်က သူ့နိုင်ငံထဲက အိုင်အက်စ် စစ်သွေးကြွတွေကို တိုက်ခိုက်မှုတွေနဲ့ တခြားတိုက်ပွဲတွေကို ကြိုးကိုင်နေသူလို့ ယူဆခံရသူလည်း ဖြစ်ပါတယ်။

ငွေရောင်ဆံပင်တွေနဲ့ သြဇာကြီးပြီး နားလည်ရခက်တဲ့ ဒီဗိုလ်ချုပ်ကြီးကို လေးစားရိုသေသူတွေရော သေလောက်အောင်မုန်းသူတွေပါ ရှိပါတယ်။ သူဟာ လျှို့ဝှက်စစ်ဆင်ရေးတွေကို နောက်ကွယ်က နှစ်ပေါင်းများစွာ ကြိုးကိုင်ခဲ့ရာကနေ အခုနှစ်ပိုင်းမှာ လူတွေကြားထွက်ပေါ်လာတာပါ။ နောက်တော့ သူ့ရဲ့ကျော်ကြားလူသိများမှုက အီရန် မှတ်တမ်းရုပ်ရှင်တွေ၊ သတင်းတွေ၊ အင်တာနက်ပေါ်က ရုပ်ပြောင်တွေနဲ့ ပေါ့ပ်သီချင်းတွေမှာတောင် သူ့အကြောင်းတွေ ပါလာတဲ့အထိ ဖြစ်ခဲ့ပါတယ်။

ကာ့ဒ်စ် အထူးထပ်ဖွဲ့ကို သူကိုင်တွယ်ခဲ့တဲ့ ၂၁ နှစ်အတွင်းမှာ လက်ဘနွန်က အီရန်ထောက်ခံတဲ့ ဟစ်ဇဘိုလာ အဖွဲ့ကို အားဖြည့်ပေးခဲ့ပါတယ်။ အီရန်ရဲ့ စစ်ရေးလှုပ်ရှားမှုတွေကို အီရတ်နဲ့ ဆီးရီးယားတို့မှာ တိုးချဲ့ခဲ့ပါတယ်။ ဆီးရီးယားရဲ့ ကာလရှည် ပြည်တွင်းစစ်မှာလည်း အစိုးရက သူပုန်တွေကို တိုက်ခိုက်ရာမှာ ကြိုးကိုင်ခြယ်လှယ်ခဲ့ပါတယ်။