ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
သေဆုံးသူ အီရန် ဗိုလ်ချုပ်ကြီးနေရာ ချက်ချင်းအစားထိုး၊ ပြင်းပြင်းထန်ထန် လက်စားချေမယ်လို့ အီရန် ပြော
အမေရိကန်ရဲ့ သောကြာနေ့ လေကြောင်းတိုက်ခိုက်မှုကြောင့် သေဆုံးသွားတဲ့ ဗိုလ်ချုပ်ကြီးရဲ့ နေရာမှာ အစားထိုးမယ့်သူကို အီရန် ခေါင်းဆောင် အယာတိုလာ ခါမေနီက အချိန်မဆိုင်းဘဲ ကြေညာခဲ့ပါတယ်။
သေဆုံးသူ ဗိုလ်ချုပ်ကြီး ကာဆမ် ဆူလေမာနီနေရာကို အသက် ၆၃ နှစ် အရွယ် ဗိုလ်မှူးချုပ် အစ္စမေးခါနီကို အစားထိုးခန့်အပ်မယ်လို့ ကြေညာခဲ့တာပါ။
ဗိုလ်မှူးချုပ် အစ္စမေးခါနီဟာ အီရန် စစ်တပ်က ကာ့ဒ်စ် Quds အထူးတပ်ဖွဲ့ရဲ့ ဦးစီးချုပ် ဖြစ်လာမှာပါ။
အဲဒီ ဗိုလ်မှူးချုပ် အစ္စမေးခါနီဟာ အီရန်စစ်တပ်ကို ၁၉၈၀ မှာ ဝင်ရောက်ခဲ့ပြီး ၁၉၈၀-၈၈ အီရန်-အီရတ် စစ်ပွဲမှာ ပါဝင်တိုက်ခိုက်ခဲ့ပါတယ်။
အဲဒီစစ်ပွဲအပြီးမှာတော့ သူဟာ ကာ့ဒ်စ် အထူးတပ်ဖွဲ့မှာ တာဝန်ထမ်းဆောင်ခဲ့ပါတယ်။
အမေရိကန်၊ အစ္စရေးနဲ့ ဒေသတွင်းက သူတို့ရဲ့ မဟာမိတ်တွေကို အဲဒီဗိုလ်ချုပ်ကြီး အရင်တုန်းက ပြင်းပြင်းထန်ထန် သရော်ဝေဖန်ခဲ့ဖူးပါတယ်။
၂၀၀၁ ခုနှစ် စက်တင်ဘာ ၁၁ ရက် အမေရိကန် တိုက်ခိုက်ခံရမှုဟာ အမေရိကန်တွေ ကိုယ့်ကိုယ်ကိုယ် နစ်နာအောင် လုပ်တဲ့ ဖန်တီးမှုသာ ဖြစ်တယ်လို့ သူက ၂၀၀၈ ခုနှစ်မှာ ပြောခဲ့ပါတယ်။ ဒီတိုက်ခိုက်မှုဟာ အရှေ့အလယ်ပိုင်းမှာ အရှုပ်အထွေးတွေ ဖြစ်အောင် အမေရိကန် အစိုးရက လုပ်ခဲ့တဲ့ လုပ်ရပ်ဖြစ်တယ်လို့ စွပ်စွဲခဲ့ပါတယ်။
"အမေရိကန်တွေ အရှေ့အလယ်ပိုင်းမှာ ဒေါ်လာ ဘီလျံ ၇၀၀၀ သုံးခဲ့တယ်။ ဒါပေမဲ့ သူတို့ ဘာမှ ပြန်မရဘူး။ အခုတော့ အမေရိကန်တွေ ကမ္ဘာမှာ အကြွေးအထူဆုံးဖြစ်နေပြီ"လို့ သူက ပြောခဲ့ပါတယ်။
ပြင်းပြင်းထန်ထန် လက်စားချေမယ်
အီရန် လုံခြုံရေးကောင်စီက ဗိုလ်ချုပ်ကြီး ကာဆမ် ဆူလေမာနီကို တိုက်ခိုက်သတ်ဖြတ်ခဲ့တဲ့အတွက် အမေရိကန်ကို ပြင်းပြင်းထန်ထန် တုံ့ပြန်မယ်လို့ ပြောလိုက်ပါတယ်။
"ဒီရာဇဝတ်မှုကြီးကို လုပ်ရဲခဲ့တဲ့ အမေရိကန် အစိုးရက နောက်ဆက်တွဲ အကျိုးဆက်ကို တာဝန်ယူရလိမ့်မယ်" လို့ အီရန် မီဒီယာကနေ ထုတ်ပြန်ကြေညာပါတယ်။
"ဒါဟာ အမေရိကန်တွေ အာရှ အနောက်ပိုင်းမှာ လုပ်တဲ့ အကြီးဆုံး အမှားကြီးပဲ။ ဒါကနေ အမေရိကန်တွေ လွယ်လွယ်နဲ့ လွတ်လိမ့်မယ် မထင်နဲ့" လို့ ပြောပါတယ်။
ဒါပေမဲ့ ဘယ်လို လက်တုံ့ပြန်မယ်ဆိုတာမျိုးကိုတော့ တိတိကျကျ မပြောပါဘူး။
ဒါ့အပြင် ဒီလေကြောင်းတိုက်ခိုက်ခံရမှုမှာ အတူ သေဆုံးခဲ့တဲ့ အီရတ် ရှီးယား စစ်သွေးကြွခေါင်းဆောင် အဘူ အယ်လ်မာဒီ မူဟန်ဒစ် သေဆုံးခဲ့မှုဟာလည်း အနာဂတ်မှာ အီရန်နဲ့ အီရတ် နှစ်နိုင်ငံအကြား ခွဲခြားလို့မရမယ့် ပေါင်းစည်းမှု လက္ခဏာပဲလို့လည်း ပြောခဲ့ပါတယ်။
