Archifau Rhagfyr 2010

Mae yna ryw awyrgylch unigryw i gemau pêl-droed dros gyfnod y Nadolig a'r Flwyddyn newydd, ac yn draddodiadol dyma adeg y gemau darbi.

Fel un a gafodd ei fagu yn nyddiau'r hen Gynghrair Gogledd Cymru, gemau rhwng Porthmadog a Blaenau Ffestiniog oedd fy neiet i o bêl-droed dros y Flwyddyn Newydd.

Roedd y gemau yma, fel gemau proffesiynol, yn cael eu chwarae yn wreiddiol ar ddydd y Nadolig, ac yna ar Ŵyl Sant Steffan. Ond daethpwyd â'r gemau Nadolig i ben ar ddechrau'r chwedegau pan benderfynodd undebau llafur fod rhaid i yrwyr bysus, fel pawb arall, gael gŵyl o'u gwaith, a symudwyd gemau'r 'Dolig i Dydd Calan.

Yn aml iawn, cyn y gêm fawr ar ddydd Sant Steffan, roedd gemau yn y cynghreiriau is, a rheini hefyd yn gemau darbi gyda nifer ohonynt yn dechrau yn gynnar, er mwyn inni gyd fynd i weld y gêm fawr yn y 'pnawn!

Felly oedd hi i mi ar fore oer yn Nolwyddelan, pan aeth popeth o'i le mewn gêm ddarbi rhwng y tîm lleol a Blaenau Ffestiniog.

Dathlu'r Nadolig a gormod o bwdin a chwrw gafodd y bai, a phan benderfynodd un o chwaraewyr fy nhîm i, sef Blaenau Ffestiniog, anghytuno â'r dyfarnwr, gan gyfeirio llond ceg o regfeydd ato penderfynwyd mai digon oedd digon, ac fe gafodd fy nghyd chwaraewr ei wahoddwyd i fynd am dwb cynnar o ddŵr oer yn y cwt newid.

Gwrthod yn bendant a wnaeth fy nghyfaill , oherwydd, yn ei eiriau o "Hey ref, don't you know it's Christmas?!" ymysg nifer o ymadroddion eraill!

Pan gyrhaeddodd adroddiad y dyfarnwr i'r clwb drwy'r post rhyw wythnos yn hwyrach , roedd rhybudd ar gefn yr amlen: "Not to be opened by a female." Tydi'r oes wedi newid!!

Newid mewn cwt yng nghefn tŷ oedd pawb a ddaeth i chwarae i Gae Clyd ym Manod, ble roedd timau'r Blaenau yn chwarae, a minnau'r un fath wrth chwarae yno yng ngemau Cynghrair Dyffryn Conwy.

Rhyw feudy o le newid oedd ar gael, a bath metel ar ganol y llawr heb fawr ynddo i gynhesu bodiau traed heb sôn am weddill y corff!

Dynion oedd dynion yr adeg hynny, medde nhw, ond os cawsoch eich taro mewn lle tyner gan bêl lledr yr oes honno, a hithau yn wlyb a phwyso fel tunnell, byddech yn lwcus iawn o gyrraedd yn ôl yn y cwt newid yn dal i gredu mai dyn oeddech chi!

Os ydych wedi meddwl beth ydi tarddiad yr ymadroddid 'gêm ddarbi', mae'n ymddangos ei fod yn mynd yn ôl i ddechrau'r ugeinfed ganrif a'r gemau a oedd yn cael eu chwarae rhwng timau'r trefi newydd a dyfodd yn sgil y Chwyldro Diwydiannol.

Roedd pob tref yn chwilio am unrhyw esgus i gynnig delwedd well ohonynt eu hunain na'u cymdogion agos, ac felly y tyfodd y cystadlu am y timau pêl-droed gorau, a oedd fel rheol wedi deillio o'r ffatrïoedd newydd.

Ar yr adegau hynny pan oedd y timau yn chwarae gwrthwynebwyr cyfagos, roedd hi'n amser gwisgo i fyny i wneud tipyn o sioe, a het galed yn cael ei wisgo ar gyfer yr achlysur. Enw ar yr het galed fwyaf ffasiynol yr oes oedd het ddarbi, ac mae'r ymadrodd wedi aros byth fel disgrifiad o gemau rhwng dau dîm lleol.

Ond dyna ddigon o ramant am ddyddiau mebyd.

Ydych chi ar fin mynd, neu wedi bod mewn gêm ddarbi dros y Nadolig, neu'r Flwyddyn Newydd, a beth yw eich atgofion chi o'r gemau yma, byddent nhw yn rhai cyfoes neu yn atgofion o'r gorffennol?

Hoffem glywed gennych, a hoffem hefyd ddymuno blwyddyn newydd dda i holl ddarllenwyr a chyfranwyr y Blog. Diolch am eich ymatebion a'ch cyfraniadau.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Gyda'r tywydd oer yn creu problemau di-ri â gemau pêl-droed ledled Cymru unwaith eto, doedd hi ddim y syndod clywed Andy Legg, rheolwr Llanelli, yn gofyn am estyniad i'r rhan gyntaf o dymor yr Uwchgynghrair, sydd i fod i ddod i ben ar Ionawr 15.

Mae wyth o gemau tîm Tre'r Sosban wedi cael eu gohirio yn barod, a gan nad oes gêm arall ganddynt hyd ddydd Gŵyl Sant Steffan, mae hyn yn golygu y bydd rhaid iddynt chwarae deg gêm mewn tair wythnos o dan y drefn bresennol.

Tachwedd 13 oedd dyddiad gêm ddiwethaf Llanelli, ond tydi gohirio gemau yn Stebonheath ddim yn beth newydd.

Gellir dadlau fod Llanelli wedi colli cyfle i ennill Uwchgynghrair Cymru'r tymor diwethaf oherwydd trafferthion draeniad ar y cae, ac mae'r problemau yn amlwg eto eleni. Ond mae ymdrin â'r diffyg hwn yn ymddangos fel petai yn waith enfawr.

Roedd y syniad o gynnal y tymor dros ddau gyfnod yn edrych yn ffafriol yn ystod yr Haf, ond erbyn heddiw, tydi'r syniad ddim yn edrych yn un mor ddoeth, gyda chymaint o gemau wedi eu gohirio ar draws yr Uwchgynghrair.

Ond hawdd ydi i fi, ac unrhyw un arall, a oedd yn credu mai cam ymlaen oedd hyn, gynnig barn wrth edrych yn ôl.

Un a all ddweud ' Ddudish i do!' ydi rheolwr Caerfyrddin, Tomi Morgan, a oedd yn feirniadol o'r drefn newydd.

Mae'n edrych yn eithaf tebyg ar hyn o bryd mai Tomi oedd yn iawn. Ond rheolwr ydi Tomi, a tydi pobl ddim yn aml yn tueddu i wrando ar farn rheolwr! Tybed a oes rhywun wedi gwrando ar Andy Legg!

Sut mae ymateb i broblemau amserlen yr Uwchgynghrair? Ydi torri'r gynghrair yn ein hanner ym mis Ionawr wedi bod yn benderfyniad cywir, neu wedi cymhlethu 'r drefn?
A ddylid parhau â'r drefn newydd, neu a ddylid chwarae drwy'r Haf? Sut mae'r Uwchgynghrair wedi ymateb at effaith y tywydd oer?

Mwy o gwestiynau nac atebion efallai, ond rydym ni yn barod i wrando ar eich barn chi!
All rhywun gynnig ateb a fyddai yn dderbyniol yn yr hir dymor?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Ac wele, hwy a ddaethant ar gyflymder, gan enwi Gary Speed fel ein rheolwr newydd!
Ie, tipyn o syndod i rai efallai, ond oes yna unrhyw un fyddai wedi cael ei ystyried sydd â mwy o brofiad o chwarae dros Gymru na Speed?

Chwaraeodd 85 o gemau dros Gymru, gan arwain fel capten mewn 44 ohonynt. Y golwr Neville Southall ydi'r unig Gymro sydd wedi ennill mwy o gapiau.

Tydi profiad eang Speed ddim wedi ei gyfyngu i Gymru chwaith, chwaraeodd mewn 535 o gemau yn Uwchgynghrair Lloegr. Dim ond David James a Ryan Giggs yw'r unig rai i chwarae mwy o weithiau na hynny yn yr Uwchgynghrair.

Beth felly, heblaw profiad ar y cae, be all Speed ei gynnig?

Mae ganddo'r profiad eang ac angenrheidiol o wybod sut mae pethau yn gweithio o fewn y byd pêl-droed, yn ogystal â'r parch mae wedi ei haeddu dros y blynyddoedd, gan chwaraewyr, y cyfryngau, y cefnogwyr a rheolwr clybiau.

Bydd hyn i gyd yn ei helpu i geisio codi safon pêl-droed Cymru gan ddod â pharch ehangach i mewn i'r tîm.

Serch hynny cafwyd beirniadaeth o Speed ar flog pêl-droed Cymreig Ffwtbol ar 10 Rhagfyr o dan y pennawd 'Speed sets a bad example to Welsh players.'

Roedd yr erthygl yn tynnu sylw at y ffaith ei fod wedi tynnu'n ôl o garfan Cymru yn 1996 i fynd ar ei fis mêl, a hefyd pan benderfynodd yn 2004 i ymddeol o chwarae yn rhyngwladol ond i barhau fel chwaraewr gyda Bolton.

Ydi hyn yn feirniadaeth deg?

Ai beirniadaeth ragfarnllyd ydi hyn ac onid yw hi'namser i ni sefyll yn unedig a chefnogi'r penodiad newydd yma, yn hytrach na chwilio am rywbeth arall i gecru amdano eto?

Tydi'r Gymdeithas Bêl-droed ddim wedi dewis Speed heb feddwl yn ddwys am yr hyn sydd ei angen, ac rwyf yn croesawu'r penodiad gant y cant.

Roedd rhai yn disgwyl rheolwr mwy profiadol. Ond roedd digon o brofiad gan John Toshack. Ddywedai ddim mwy.

Doedd yna ddim profiad gan Mark Hughes ond roedd mwy yn ei ganmol nac yn ei feirniadu - heblaw John Toshack efallai!

Swydd gyntaf Speed fydd penodi tîm o gynorthwywyr. Mae nifer o enwau yn cael eu cynnig, ond rwyf ond yn gobeithio mai dewis Gary Speed y rheolwr fydd y penodiadau yma, ac nid pobol sydd yn cael ei wthio arno.

Mae ganddo garfan dda i gychwyn ei yrfa ryngwladol fel rheolwr, does ond gobeithio y byddant i gyd yn holliach.

Ac er ei alluoedd mae Speed angen, fel sydd ei ar angen pob un yn y gêm, tipyn o lwc er mwyn sicrhau cychwyn da.

Does ond gobeithio hefyd na fydd barnu rhagfarnllyd yn suro'r mis mêl ac y bydd Cymru yn unedig mewn cefnogaeth i Gary Speed yn ei swydd newydd.

Yn sgil y digwyddiadau sydd yn codi ynglŷn â gyrfaoedd rheolwr yn y byd pêl-droed yn ddiweddar, gall Gary Speed hefyd fod yn ddiolchgar mai Cymdeithas Bêl-droed Cymru sydd yn ei gyflogi, ac nid rhyw gwmni cywion ieir o'r India!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mae tymor Bangor yn mynd yn well ac yn well.

Nid yn unig oedd y fuddugoliaeth yn erbyn Port Talbot y Sadwrn ddiwethaf yn gweld y tîm yn sgorio wyth,(8-1) am yr ail dro yn eu hanes (8-0 yn erbyn Llanelli oedd yr achlysur arall yn 2003), ond fe sicrhawyd record newydd o fewn Lloegr a Chymru, o rediad o bedair gêm ar ddeg yn olynnol, a phob un ohonynt wedi eu hennill..

Y deiliad blaenorol oedd Reading yn ystod tymor 1985/6.

Llongyfarchiadau i Fangor ac i Nev Powell. A'r carreg filltir nesaf? Beth am y record Brydeinig?

Ond mae Bangor hefyd wedi dangos sut mae denu cefnogwyr.

Ymysg yr holl stw^r a siarad â'r dadlau yngly^n a phryd i chwarae gemau yn Uwchgynghrair Cymru, mae Bangor i mi wedi profi nad oes yna ddadl.

Yr hyn sydd ei angen i ddenu gwylwyr, ar unrhyw ddydd ac amser o'r wythnos, ydi tîm da sy'n chwarae pêl-droed deniadol. Does ond angen edrych ar faint torfeydd Bangor i ddeall hyn.

Llongyfarchiadau i gefnogwyr selog Bangor am ddangos fod pêl-droed o safon yn cael ei werthfawrogi.

Am faint yr ydych chi'n meddwl y gall Bangor barhau a'r rhediad yma? Gadewch inni wybod.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Ac yr oedd yn y wlad honno bwyllgorwyr yn aros mewn gwesty, ac yn barod i gyhoeddi newyddion o bwysigrwydd mawr.

Ac wele, Blatter y llywydd a safodd gerllaw iddynt, a gogoniant FIFA a ddisgleiriodd o'u hamgylch a disgwyl yn eiddgar a wnaethant.

A Blatter a ddywedodd wrthynt nac ofnwch: canys wele, yr wyf fi yn mynegi i chwi newyddion da o lawenydd mawr, yr hwn a fydd i'r holl bobl:

Canys penderfynwyd heddiw yn ninas Zurich, mai yn y Dwyrain, yn ninas Putin bydd Gwpan y Byd, yn 2018, wedi ei ddodi mewn stadiwm o breseb ym Moscow.

A bu, pan aeth aelodau FIFA ymaith oddi wrthynt, y pwyllgorwyr hwythau a ddywedasant wrth ei gilydd. Awn hyd Foscow, a gwelwn y peth hwn a benderfynwyd, yr hwn a hysbysodd Blatter i ni.

A hwy a ddaethant ar frys at bwyllgorwyr o Saeson, ac a gawsant David a William, a'r prif weinidog yn gorwedd mewn syfrdan.

A phan welsant, hwy a gyhoeddasant y penderfyniad a ddywedasid wrthynt am y Gwpan.

A phawb a'r a'i clywsant, a ryfeddasant am y pethau a benderfynwyd gan bwyllgor dethol FIFA.

Eithr David a gadwodd y pethau hyn oll, gan eu hystyried yn ei galon - a William a wylodd.

Ydych chi'n credu fod Rwsia yn haeddu Cwpan y Byd, oedd gan Loegr gynnig gwell, neu beth am Sbaen a Phortiwgal neu'r Iseldiroedd a Gwlad Belg?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?