Mapiau meddwl
Mae'r dechneg o greu mapiau meddwl yn ffordd arall o feddwl yn greadigol. Darlun o sawl darn o wybodaeth yw map meddwl, ac mae'r dechneg yn cysylltu gwahanol syniadau gyda'i gilydd. Drwy wneud cysylltiadau rhwng y syniadau hyn, mae modd creu syniadau newydd.
Mae angen dilyn cyfres o gamau er mwyn creu map meddwl.
Cam un
Yng nghanol y dudalen, tynna lun neu ysgrifenna beth yw’r brif broblem, mater neu ffocws, er enghraifft sut i godi ymwybyddiaeth o lygredd dŵr.
Cam dau
Tynna ychydig o linellau neu ganghennau trwchus sy’n ymestyn o’r brif mater. Dylai'r llinellau hyn dy helpu i drefnu dy feddyliau. Er enghraifft, gallai dy ganghennau gynnwys rhai o’r dulliau gwahanol o godi ymwybyddiaeth, megis taflenni, cyflwyniadau, ymgyrchoedd a cherddi.
Cam tri
Ym mhen draw pob cangen drwchus, gwna ganghennau teneuach yn nodi beth bynnag sy’n dod i dy feddwl. Er enghraifft, gallai canghennau teneuach oddi ar gair fel ‘cyflwyniadau’ gynnwys syniadau sy’n ymwneud â’r gynulleidfa dan sylw, yn ogystal â'r math o gynnwys sydd ei angen, lleoliad neu amser a delweddau addas. Does dim rhaid i ti gyfyngu’r syniadau i eiriau yn unig. Mae modd cynnwys delweddau i adlewyrchu syniadau hefyd.
Cam pedwar
Ar ôl nodi dy holl syniadau, edrycha ar dy fap meddwl unwaith eto. Oes unrhyw gysylltiadau rhwng y syniadau? A oes modd ychwanegu saethau i gysylltu gwahanol rannau o dy fap meddwl?
Cam pump
Beth sy’n sefyll allan? Pan fyddi di’n gallu ateb y cwestiwn hwn, byddi di'n gallu cynnig syniad ar gyfer pecyn codi ymwybyddiaeth.
