Yr Eglwys ar waithAstudiaeth achos – Byddin yr Iachawdwriaeth

Enwad Protestannaidd o fewn yr Eglwys Gristnogol yw Byddin yr Iachawdwriaeth. Mae ganddyn nhw dros 1.6 miliwn o aelodau mewn 109 o wledydd. Mae Byddin yr Iachawdwriaeth yn adnabyddus am eu gwaith gyda phobl sy'n wynebu cyfnodau anodd. Maen nhw'n cynnig help i'r canlynol:

• pobl oedrannus
• pobl ifanc
• troseddwyr
• pobl sy'n gaeth i gyffuriau
• pobl ddall ac anabl

Maen nhw hefyd yn darparu bwyd a lloches i bobl ddigartref ac yn cynnal canolfannau dosbarthu bwyd.

Mae gwaith elusennol Byddin yr Iachawdwriaeth yn seiliedig ar ddysgeidiaethau Iesu sydd i'w cael yn y Beibl, ac maen nhw'n gwneud cymaint â phosibl i helpu pobl eraill. Mae aelodau Byddin yr Iachawdwriaeth yn credu bod gan bawb hawl i hanfodion sylfaenol bywyd:

• bwyd
• dillad
• lloches
• addysg
• gofal iechyd
• amgylchedd diogel
• diogelwch economaidd
• gwaith cynhyrchiol
• cyflogau a budd-daliadau teg
• amodau gwaith gweddus

Caffi Forget Me Not, Wrecsam

Mae eglwys Byddin yr Iachawdwriaeth yn Wrecsam, gogledd Cymru wedi sefydlu caffi sydd wedi'i gynllunio'n arbennig i helpu pobl sy'n dioddef o ddementia, eu teuluoedd a'u gofalwyr. Mae'n cael ei gynnal yn fisol a'i enw yw caffi Forget Me Not.

Mae Byddin yr Iachawdwriaeth yn gofyn i aelodau'r gymuned gyfrannu pethau cofiadwy y bydd pobl sy'n dioddef o ddementia yn debygol o gysylltu â nhw, er enghraifft:

• llyfrau
• toriadau o hen bapurau newydd
• hen ffotograffau

Y Prosiect Bws, Caerdydd

Mae Byddin yr Iachawdwriaeth yn defnyddio gwasanaeth y Prosiect Bws i helpu pobl sy'n cysgu ar strydoedd Caerdydd. Mae’n wasanaeth symudol sy'n ceisio atal pobl rhag gorfod cysgu ar y stryd. Bob dydd Llun i ddydd Gwener, mae Byddin yr Iachawdwriaeth yn parcio bws y tu allan i Amgueddfa Genedlaethol Cymru yng nghanol Caerdydd ac yn darparu gwasanaethau cymorth i tua 30 o bobl bob nos.