Imrich taobh a-staigh na dùthcha
Bhon ghluasad a dh'ionnsaigh calpachas deireadh nan 1970an, tha an imrich sluaigh as motha riamh taobh a-staigh dùthaich ann an eachdraidh air tachairt ann an Sìona. Sna 35 bliadhna mu dheireadh, dh'fhàg na ceudan mhilleanan dhaoine an dachaighean agus na bailtean beaga airson obair a lorg ann am bailtean na bu mhotha agus ann am mòr-bhailtean, a' mhòr-chuid dhiubh air an taobh an ear. Ann an 2021, bhathar a' meas gun robh co-dhiù 292 millean neach dhe na bha ag obair nan imrich.
Tha an àireamh mhòr de luchd-obrach a tha nan imrich a' toirt cothrom do riaghaltas Shìona feum a dhèanamh dhe na tha de dhaoine òga ann a tha deiseil airson obair.
Gu ìre mhòr, tha Sìona air a bhith soirbheachail leis a seo, agus tha an eaconamaidh a-nis cho mòr ri eaconamaidh nan SA agus, gu h-iomlan, nas beairtiche.
Air an làimh eile, tha dragh air riaghaltas Shìona mun àireamh dhaoine a tha gun obair agus nach eil a' faighinn taigh. Ma bhios cus dhaoine mì-riaraichte le Partaidh Comannach Shìona, dh'fhaodadh gum biodh iad a' togail fianais fad' is farsaing agus gum biodh iad an-fhoiseil.
Mar sin, tha riaghaltas Shìona air a bhith a' cur cuideam air obraichean a chruthachadh, agus air siostam tèarainteachd shòisealta a chruthachadh a chòmhdaicheas cion cosnaidh, peinnseanan, tinneas, fòrladh màthaireil agus leòn san àite-obrach. Chaidh siostam tèarainteachd sòisealta Shìona an cèill ann an Lagh Àrachas Sòisealta 2011.
