Deamocrasaidh ann an AlbaBuidhnean strì ann an Alba

Ann an taghaidhean, bidh daoine a' taghadh cò na riochdairean a tha iad ag iarraidh airson a bhith a' dèanamh cho-dhùnaidhean às an leth. 'S dòcha gum bi ceithir no còig a bhliadhnaichean eadar taghaidhean. Mar sin feumaidh dòighean eile a bhith aig daoine gus buaidh a thoirt air na riochdairean aca.

'S e buidhnean strì aon dòigh air sin a dhèanamh. 'S e buidhnean de dhaoine leis na h-aon bheachdan a th' ann am buidhnean strì. Chan eil buidhnean strì ag iarraidh cumhachd dhaibh fhèin. 'S ann a tha iad ag iarraidh buaidh a thoirt air an fheadhainn aig a bheil a' chumhachd.

Ciamar a bhios buidhnean strì ag obrachadh?

Bidh buidhnean strì a' cleachdadh grunn dhòighean laghail gus am beachdan a chur an cèill:

• A' gabhail pàirt ann am fianais-dhùbhlain, caismeachdan no ralaidhean
• A' cur athchuingean air dòigh
• A' coiteachadh (a' bruidhinn gu dìreach ri) BPA no ri comhairlichean
• A' sgrìobhadh litrichean gu luchd-poilitigs no gu pàipearan-naidheachd
• A' dèanamh agallamhan a nochdas sna meadhanan
• A' gabhail pàirt ann an iomairtean follaiseachd airson aire nam meadhanan fhaighinn

Air sàillibh laghan ùra leithid Saorsa Fiosrachaidh, an t-eadar-lìon, lìonraidhean sòisealta agus meadhanan a tha a' cumail fiosrachadh rinn gach uair de gach latha, tha buidhnean strì mothachail air a' chumhachd a th' aca. Tha iad a' sìor fhàs proifeiseanta san dòigh anns a bheil iad ag obair.

Tha iomadh buidheann strì ann an Alba a tha a' feuchainn ri buaidh a thoirt air co-dhùnaidhean poilitigeach.

Mar eisimpleir, leis gu bheil smachd aig Alba air foghlam agus slàinte, bidh fòcas làidir aig buidhnean strì a tha an sàs anns na cùisean seo air Pàrlamaid na h-Alba oir tha poileasaidhean na h-Alba orra sin a-nis gu math eadar-dhealaichte bhon chòrr den RA.

Buidhnean strì air an taobh a-staigh ann an Alba

Tha buidhnean strì an 'taobh a-staigh' ag obair le taic bhon riaghaltas. Bidh an riaghaltas tric a' dol thuca airson comhairle mu phoileasaidhean. Bidh iad a' conaltradh ris an riaghaltas gu cunbhalach.

Mar eisimpleir, 's e buidheann strì do thidsearan a th' ann an aonadh an EIS. 'S ann glè ainneamh a chuireas iad fianais-dhùbhlain no caismeachd air dòigh. An àite sin, 's àbhaist dhaibh coinneamhan a chur air dòigh còmhla ri Riaghaltas na h-Alba. Tha iad buailteach a bhith air cùl chùisean agus air falbh bho na camarathan airson buaidh a thoirt air co-dhùnaidhean.

Buidhnean strì air an taobh a-muigh ann an Alba

Mar eisimpleir, 's e buidheann-tagraidh a th' ann an Save Whiteinch Library a tha ag iomairt airson leabharlann ann an Glaschu a chumail fosgailte. Tha iad air fianais a thogail aig an leabharlann, thòisich iad athchuinge agus tha iad air bruidhinn ris na meadhanan mun iomairt aca, agus a' cur cuideam air cho cudromach 's a tha an leabharlann dhan choimhearsnachd ionadail.