Ende mosmarrëveshje për rezultatin përfundimtar

Analistë dhe burime pranë kësaj partie thonë se nisur dhe nga zhvillimet paraprake nuk pritet që të ketë kthim mbrapsht për një vendim të tillë, por gjithësesi nuk përjashtohet një debat i ashpër pasi disa nga krerët e LSI-së janë shprehur kundër bashkimit të votave me kryeministrin Berisha.

LSI-ja ka qenë në opozitë deri ditën e zgjedhjeve me PD-në, dhe madje ka marrë dhe votat e bazës së majtë me thirrjet për të larguar zotin Berisha nga qeverisja.

Kreu i partisë, ish-kryeministri Ilir Meta, ka deklaruar si ky koalicion është i imponuar nga rezultati i zgjedhjeve dhe nga interesat e vendit. Koalicioni i LSI-së me PD-në është dënuar dhe nga Partia Socialiste.

Ndërkohë, ende nuk është dhënë rezultati përfundimtar zyrtar i zgjedhjeve të 28 qershorit. Vëmendja është përqëndruar tek nëntë kuti në Qarkun e Fierit, ku PS-ja thotë se siguron mandatin e nëntë të saj. KQZ-ja do të debatojë dhe më pas do të marrë vendim për numërimin ose jo të votave, me gjithë këmbënguljen e përfaqësuesve të Partisë Socialiste që ato të numërohen.