SHBA përshëndet angazhimin drejt zhvillimit demokratik të manifestuar nga populli i Kosovës.

Zëdhënësi i këtij departamenti, Sean McCormack, thekson në deklaratë se SHBA përshëndet angazhimin drejt zhvillimit demokratik të manifestuar nga populli i Kosovës.

"Elektorati i Kosovës ushtroi të drejtën e votës dhe zgjodhi përfaqësuesit në të gjitha nivelet qeveritare," nënvizon deklarata.

Zgjedhjet cilësohen si një hap përpara demokratik për arsye se për herë të parë anëtarët e kuvendit u zgjodhën me lista të hapura dhe kryetarët e bashkive në mënyrë të drejtpërdrejtë.

Departamenti Amerikan i Shtetit vlerëson gjithashtu zhvillimin paqësor të zgjedhjeve dhe respektin që treguan të gjitha partitë në angazhimin për procesin e përcaktimit të statusit të Kosovës.

Nga ana tjeter, Shtetet e Bashkuara shprehën keqardhjen për bojkotimin e zgjedhjeve nga popullsia serbe e nxitur nga qeveria e Serbisë.

Sipas deklaratës të Departamentit të Shtetit, komuniteti serb i Kosovës pati humbje nga ky vendim.

Deklarata përfundon me angazhimin e Administratës Amerikane në të ardhmen për garantimin e të drejtave dhe sigurisë të të gjithë komuniteteve etnike në Kosovë si dhe i ben thirrje këtyre komuniteteve për pjesëmarrje në jetën politike të Kosovës.