Selia e qeverisë maqedonase

Merita u përket si subjekteve politike ashtu dhe vetë popullit të Kosovës.

Të vetmet çështje të cilat komentohen janë mbase numri i qytetarëve që dolën në votime, si dhe mosvotimi i komunitetit serb në këto zgjedhje.

Mediat kanë njoftuar për të gjitha detajet e ditës së votimit duke thënë se Kosovën tani e presin sfida të rëndësishme në prag të përcaktimit të statusit të saj final.

Artan Grubi drejtues i organizatës qytetare "Zgjohu", duke parë zhvillimet nga këndvështrimi i Maqedonisë, por dhe ai rajonal, thotë se Kosova dha një shembull të mirë për funksionimin e demokracisë:

"Kosovarët dëshmuan edhe një herë se çdo process demokratik e bartin me shumë dinjitet. Më gëzon fakti që zgjedhjet kaluan pa asnjë incident dhe që, ashtu si dhe në të kaluarën, treguan një kualitet demokratik në shoqërinë e tyre,"- tha z. Grubi.

Shkupi zyrtar, ndërkohë tregohet i përmbajtur. Për qeveritarët me rëndësi ka qenë që zgjedhjet u zhvilluan në mënyrë të qetë.

Vlerësohet se zhvillmet në Kosovë mund të ndikojnë dhe në Maqedoni, dhe nga ky prizëm autoritetet shpresojnë se edhe procesi i krijimit të qeverisë së re do të kalojë me aq lehtësi sa dhe vetë procesi zgjedhor.

Marrëdhëniet mes Maqedonisë dhe Kosovës vlerësohen si të mira. Megjithatë, për autoritetet në Shkup e rëndësishme është që kushdo që të vijë në pushtet të mbyllet e vetmja çështje e hapur mes dy vendeve - përcaktimi i vijës kufitare.

Prishtina nuk njeh marrëveshjen që Maqedonia ka nëshkruar me Serbinë, por kjo çështje përfshihet në pakon Ahtisari të cilën Maqedonia zyrtare e mbështet si një nga opsionet për zgjidhjen e statusit të Kosovës.