Arbër Vllahiu Prishtinë

	Në votime kanë marrë pjesë më shumë se 350 mijë qytetarë.

Nga 1 milionë e 500 mijë votues me të drejtë vote, në votime kanë marrë pjesë më shumë se 350 mijë qytetarë.

Zgjedhjet janë bojkotuar plotësisht nga pjesëtarët e pakicës serbe, të cilët i janë përgjigjur thirrjes së Beogradit zyrtar për mospjesëmarrje në zgjedhje.

Sipas informacioneve, në veri të Kosovës, të banuar kryesisht me shumicë serbe, votuesit serbe e kanë injoruar plotësisht ditën e zgjedhjeve.

E njëjta njoftohet të ketë ndodhur edhe në pjesën lindore të Kosovës, në fshatrat e rajonit të Gjilanit e Kamenicës.

Kreu i administratës ndërkombëtare, Joackim Ruecker, shprehu zhgënjimin e tij me mospjesëmarrjen e serbëve të Kosovës në zgjedhje por nënvizoi se ato kanë dëshmuar pjekurinë politike të qytetarëve kosovarë.

Zoti Ruecker dhe kreu i misionit të OSBE-së, Ambasadori Tim Guldimann, i vlerësuan me notat më të larta zgjedhjet e së shtunës.

Ambasadori Guldimann tha se dita e zgjedhjeve ishte një test i mirë i demokracisë dhe shfaqi kënaqësinë e tij se në zgjedhje nuk është shënuar asnjë incident.

KQZ thotë se shkaqet për numrin e vogël të votuesve janë të ndryshme, duke numëruar këtu edhe motin e ftohtë.

Kreu i KQZ-së, Mazllum Baraliu të shtunën pas mbylljes së vendvotimeve tha se rezultatet e ofruara mbi pjesëmarrjen e qytetarëve në zgjedhjeve janë të përafërta.

Por zoti Baraliu nuk ka shfaqur shqetësime me pjesëmarrjen e ulët në zgjedhje duke bërë krahasimin e Kosovës me vendet e tjera me demokraci të zhvilluar.