Arbër Vllahiu Prishtinë

	Takimi midis palëve këtë radhë mbahet në Nju-Jork

Prishtina zyrtare thotë se do të marrë pjesë në takimin e Nju-Jorkut për të rikonfirmuar qëndrimin se pavarësia e Kosovës është e panegociueshme dhe se kësaj radhe nuk pret asnjë marrëveshje me Beogradin zyrtar.

Delegacioni kosovar në takimin me palën serbe do të paraqesë Traktatin e tij për fqinjësi të mirë me Serbinë pas zgjidhjes së statusit të Kosovës, dokument ky që thuhet të jetë përpjekje e Prishtinës për të ofruar një marrëveshje dypalëshe për problemet që do të dalin pas, siç mendohet, pavarësisë të Kosovës.

Traktati ndërkaq ka hasur në reagime në Prishtinë nga organizata joqeveritare që e kanë cilësuar atë si të ngutshëm.

Ai është refuzuar edhe nga vetë Beogradi, para takimit të Londrës me Treshen Ndërmjetësuese nga mesi i këtij muaji.

Por pala serbe ndërkaq, thuhet se e ka filluar ofensivën e saj edhe para takimit të Nju-Jorkut me 28 shtator.

Presidenti serb, Boris Tadiq, ka thënë në Asamblenë e Përgjithshme të OKB-së se Serbia po e mbron tërësinë e saj tokësore duke mbrojtur, sipas tij, Kartën e Kombeve të Bashkuara.

Takimi i Nju-Jorkut thuhet se do të hapë çështje të ndërlidhura me statusin e Kosovës dhe ai mendohet të jetë fillimi i takimeve të intensifikuara me Treshën Ndërmjetësuese Ndërkombëtare deri më 10 Dhjetor kur duhet të përfundojë ky cikël negociatash.