Zoti Bukoshi thotë se pavarësia nuk shpallet në Uashington.

Duke komentuar qëndrimin e fundit amerikan për pavarësinë e Kosovës, zoti Bukoshi ka thënë se deklarime të tilla, janë të rëndësishme për procesin, por pavarësia nuk shpallet në Uashington.

Me zotin Bukoshi bisedoi korrespondenti ynë, Muharrem Nitaj dhe fillimisht i kërkoi të komentojë deklaratën e fundit të një zyrtari amerikan, sipas të cilit nëse nuk do të ketë sukses në bisedimet për statusin, atëherë SHBA- të do të mund ta njihnin pavarësinë e Kosovës.

Bukoshi: Deklarata e fundit e një zyrtari të lartë amerikan të shtetit, është një deklaratë shtesë që është inkurajuese për palën shqiptare, por duke mos harruar deklaratat e mëparshme të presidentit Bush në Romë, në Tiranë dhe në Sofje.

Këtë deklaratë unë e shoh vetëm si një konfirmim të qëndrimit të mëparshëm të SHBA-së për Kosovën.

BBC: Sa është vendimtar për të ardhmën e Kosovës një qëndrim i prerë i Shteteve të Bashkuara?

Bukoshi: Është shumë i rëndësishëm për shtyrjen e procesit. Mirëpo pavarësia e Kosovës nuk shpallet në Uashington por në Prishtinë. Lidershipi në Kosovë duhet ta kryej pjesën e vet të punës. Këto punë duhet të kryhen në Prishtinë.

Pala e Prishtinës është e detyruar që të pranojë negociatat shtesë. Por pala e Prishtinës nuk ka nevojë të jetë kooperative me çdo kusht. Bujar Bukoshi,

Ne tash situatën e kemi të qartë, e kemi qëndrimin pro pavarësisë të SHBA-së, qëndrimin kundër të Rusisë dhe qëndrimin e BE-së, që për mua nuk është i paformësuar dhe që lë për të dëshiruar.

Prandaj në një situatë të tillë adresa e vetme është SHBA-ja, ndërkaq vendimi për pavarësinë bie në Prishtinë.

BBC: Cili është rreziku që Kosova ta vuajë përplasjen e SHBA-së dhe Rusisë?

Bukoshi: Ka rrezik dhe ky rrezik ka ekzistuar edhe më parë. Shqiptarët e kanë ndjerë në lëkurën e tyre këtë rrezik edhe gjatë historisë.

Në rastin e Kosovës është e mundur që ky rrezik është kapërcyer, sepse Kosova e ka premtimin e presidentit të një superfuqie planetare, dhe për mua kjo nuk është një lojë fëmijësh, ose taktizime politiko-diplomatike.

Ne nuk duhet të jemi naivë dhe të mendojmë se kjo punë u krye me kaq. Ne po shohim se kemi një problem me Bashkimin Evropian.

BBC: Meqë po e përmendni BE-në, më lejoni t’ju pyes si e shpjegoni hezitimin e BE-së që të ketë një qëndrim më të vendosur rreth statusit të Kosovës?

Bukoshi: Ky hezitim është i dëmshëm, është katastrofik për Kosovën, por në anën tjetër tashmë nuk është në lojë vetëm Kosova. Por është në lojë BE-ja, politika e tij, qëndrimi amerikan por edhe telashja që po shkakton Rusia, me përpjekjet e saj për të përçarë BE-në.

BBC: Si i vlerësoni deklarimet e liderëve të Prishtinës për të shpallur pavarësinë?

Bukoshi: Po nuk ka zgjidhje tjetër. Lidershipi kosovar tash është në një pozitë ku nuk ka hapësirë tjetër manovrimi. Deklarata e lidershipit në Prishtinë është një konfirmim i parimeve të Grupit të Kontaktit. Them se është pozicionim i mirë, por për mua është një pozicion në tym. Unë do t’i aplaudoja palës së Prishtinës sikur ajo të ndërmerrte hapa edhe më të vendosur.

BBC: Cili është pozicioni juaj për negociatat shtesë?

Bukoshi: Po pala kosovare i ka humbur pozicionet pozitive që në bisedimet e mëparshme. Pala e Prishtinës është e detyruar që të pranojë negociatat shtesë. Por pala e Prishtinës nuk ka nevojë të jetë kooperative me çdo kusht. Bie fjala pse Kosova është detyruar t’i ofrojë Serbisë traktat të miqësisë? A i kanë ofruar hebrejtë traktat miqësie Gjermanisë, menjëherë pas luftës? Politika nuk bëhet me impresione se "je burrë i mirë". Ajo është shumë brutale.