Kostunica thotë Serbia nuk do të mund ta humbasë Kosovën në mënyrë legale.

Zoti Koshtunica tha se ky eliminim është rezultat i politikës së përbashkët të Serbisë dhe Federatës Ruse. Këtë ai e bëri të ditur të enjtën në mbledhjen e hapur të kabinetit të tij.

Kryeministri serb ka thënë se qeveria e tij po harton modele të ndryshme të reagimit në rast të zgjidhjes negative të statusit final të Kosovës.

Kryeministri serb ka përmendur si suksese të qeverisë edhe faktin që është inicuar procesi i ri negociator mbi Kosovën, eliminimi i planit të Marti Ahtisaarit dhe se në vend të një ndërmjetësi janë tre: SHBA-të, Bashkimi Evropian dhe Federata Ruse.

Të gjithë qytetarët e Serbisë duhet të dinë se ekziston rreziku real që separatistët shqiptarë ta shpallin njëanshëm pavarësinë deri në fund të vitit. Vojisllav Koshtunica, kryeministri serb

Ai ka theksuar se Serbia doemos do ta shfrytëzojë mundësinë që i është ofruar me procesin e ri negociator që edhe njëherë ti paraqesë argumentet për gjetjen e zgjidhjes kompromis në harmoni me Kartën e Kombeve të Bashkuara dhe Kushtetutën e Serbisë.

Kjo, tha Koshtunica, do të garantonte stabilitet dhe prosperitet për mbarë rajonin dhe ka në shtuar:

"Të gjithë qytetarët e Serbisë duhet të dinë se ekziston rreziku real që separatistët shqiptarë ta shpallin njëanshem pavarësinë deri në fund të vitit".

Modele reagimi

Ai shtoi se qeveria po harton modele të ndryshme të reagimit në rast të zgjidhjes negative të statusit final të Kosovës.

Kryeministri serb nuk ka dashur të saktësojë se cilat modele të reagimit po shqyrtohen.

Koshtunica ka përsëritur se plani i Marti Ahtisaarit është i vdekur, por u ka bërë thirrje mediave që ta publikojnë aneksin e tij të 11 të, në mënyrë që opinioni publik të njihet me faktin se NATOs i jepen kompetenca tejet të mëdha në raport me misionin civil në Kosovë.

Po ashtu ai ka ripërsëritur bindjen se Serbia kurrë nuk do të mund ta humbasë Kosovën në mënyrë legale dhe ka vlerësuar se këtë nuk do ta lejojë Këshilli i Sigurimit.

Ai ka tërhequr vërejtjen se njohja eventuale e njëanshme e pavarësisë së Kosovës do të ndikonte në krizat tjera në rajon dhe botë.

Kryeministri serb e ka kundërshtuar kufizimin kohor të negociatave mbi të ardhmen e Kosovës si dhe imponimin paraprak të zgjidhjes së caktuar për statusin e saj.