Prishtina mer ftesën për një takim me Trojkën.

Shefi i zyrës ruse në Prishtinë, Andrei Dronov i ka dorëzuar presidentit të Kosovës, Fatmir Sejdiu ftesën për një takim të ri të palës kosovare me treshen ndërmjetësuese ndërkombëtare.

Në një njoftim të lëshuar nga zyra e presidentit, konfirmohet se takimi i Prishtinës me ndërmjetsuesit amerikanë, evropianë dhe rusë për statusin e Kosovës do të mbahet më 19 shtator në Londër.

Ekipi Negociator i Kosovës pritet të mblidhet nesër për të diskutuar pjesëmarrjen e delegacionit kosovar në këtë takim.

Treshja ndërmjetësuese ndërkombëtare pritet të takohet në Londër edhe me delegacionin Serb, por deri më tani nuk ka njoftime nëse Beogradi zyrtar ka marrë ftesë për këtë takim.

Takimi në Londër i paraprin bisedimeve të drejtpërdrejta ndërmjet Prishtinës dhe Beogradit për statusin e Kosovës, që pritet të mbahen në fund të muajit shtator në Nju Jork në kuadër të Asamblesë së Përgjithshme të Kombeve të Bashkuara.

Prishtina edhe më tutje thotë se pavarësia e Kosovës është e vetmja zgjidhje, ndërsa Beogradi vazhdon ta kundërshtojë atë.