Violeta Hyseni korrespondente e BBC-së në Prishtinë

	Një takim më i hershëm për Kosovën në Vjenë.

Përderisa udhëheqësit shqiptarë thonë se pavarësia është kompromisi I vetëm, zyrtarët serbë përsërisin se për Serbinë është e papranueshme çfarëdo forme e pavarësisë së Kosovës.

Ndërkohë analistë të huaj nuk presin rezultate nga raundi I ri I negociatave Prishtinë-Beograd, që pritet të zgjasin 120 ditë dhe të ndërmjetësohen nga një përfaqësues amerikan, evropian dhe rus.
Violeta Hyseni sjell më shumë hollësi nga Prishtina

Përfaqësuesit e Shteteve të Bashkuara, të Bashkimit Evropian dhe të Rusisë, që përfaqësojnë Trojkën e Grupit të Kontaktit për Kosovën, pritet që më 9 e 10 gusht të vizitojnë Beogradin dhe Prishtinën.

Bisedimet 120 ditëshe

Me këto vizita fillojnë edhe zyrtarisht bisedimet 120 ditëshe ndërmjet palës kosovare dhe asaj serbe mbi të ardhmën e Kosovës.

Negociatat e reja që do të zhvillohen nën kujdestarinë e Grupit të Kontaktit duhet të përfundojnë deri më 10 dhjetor, kur përfaqësuesit e Trojkës duhet t'i raportojnë Sekretarit të Përgjithshëm të OKB-së mbi rrjedhën dhe rezultatet e këtyre bisedimeve.

Udhëheqësit kosovarë thonë se do të hyjnë në këto bisedime me qëndrim të prerë se pavarësia e Kosovës është e panegociueshme, se pakoja e kryenegociatorit, Martti Ahtisaari, nuk mund të rihapet, ndërsa tërësia territoriale e Kosovës është e pacënueshme.

Qëndrim krejtësisht të kundërt me Prishtinën vazhdon ta ketë Beogradi zyrtar.

Presidenti i Serbisë, Boris Tadiç, ka deklaruar dje se për Serbinë është e papranueshme çfarëdo forme e pavarësisë së Kosovës.

Ai i bëri këto komente në Zvicër ku dje mori çmimin evropian për kulturë politike në shumë prej 50.000 euro.

Këtë çmim presidentit të Serbisë, ia ka dorëzuar Ministri i Jashtëm të Gjermanisë, Frank Walter Steinmeir, i cili ka lavdëruar zotin Boris Tadiç për aktivitetin e tij kundër nacionalizmit në Serbi dhe angazhimin për afrimin e Serbisë drejt Bashkimit Evropian.

Shefi i diplomacisë gjermane dhe presidenti serb kanë diskutuar edhe për përgatitjet që po bëhen për fillimin e raundit të ri të bisedimeve ndërmjet Prishtinës dhe Beogradit.

Zoti Tadiç tha se pala serbe është e gatshme për çdo kompromis që nuk do ta cënonte sovranitetin dhe integritetin territorial të Serbisë.

Nga ana tjetër, një analist amerikan, Wayne Thompson, parashikon se bisedimet në Grupin e Kontaktit për statusin e Kosovës nuk do të sjellin kurrfarë rezultati.

Profesori i shkencave politike në Universitetin Washington and Lee në Virgjinia thotë se Rusia vështirë se mund ta ndryshojë qëndrimin e saj kundër pavarësisë së Kosovës.

Zoti Thompson mendon se Shtetet e Bashkuara të Amerikës dhe Bashkimi Evropian do ta njohin pavarësinë e Kosovës edhe pa bekimin e Rusisë.