Tookiyoo 2020: Olompikii Tookiyoon atileetonni Itoophiyaa yoom, maaliin dorgomu?

Olompikii Tookiyoo Jimaata darbe eegalerratti atileetonni biyyoota gara garaa gosoota dorgommii adda addaan si'aayinaan morkachaa jiru.

Gosoota dorgommii ispoortii 33 olompikii Tookiyoo irratti taasifaman keessaa Itoophiyaan gosoota ispoortii afur; atileetiksii, Bishkiliitii, Daaka bishaanii fi Tekuwaandoon hirmaatti.

Dorgommii atileetiksii hawwiin eegamuun atileetonni Itoophiyaa Letesenbet Giday, Shuraa Qixxaataa, Solomon Baaraggaa fi Yoomiif Qajeelchaa meedaaliyaa argamsiisu jedhamee abdatama.

Ofii dorgommiin atileetonni Itoophiyaa irratti hirmaatan kam fa'i?, yoo dorgomamu?

Gulaallii gufachiisaa meetira 3000 - Dhiirota

Jimaata Adoolessa 29, 2021 dorgommiin gulaallii fiigicha gufachiisa meetira 3000 kan dhiirota ni fiigama.

Dorgommii kanarratti atileetonni Itoophiyaa sadi ni hirmaatu. Taaddasaa Taakkalaa, Abrahaam Simee fi Hayilamaariyaam Amaare ni dorgomu.

Fiigichi gulaallii kun marsaa sadiin kan fiigamu yoo ta'u akka sa'aa Itoophiyaatti halkan sa'aa 9:30 irraa eegalee hanga Kamisa ganama sa'aa 4:05tti raawwata.

Gulaallii meetira 800 - Dubartoota

Fiigichi gulaallii meetira 800 kan dubartootaa Jimaata halkan sa'aa 10:25 irraa eegalee hanga sa'aa 11:05 irratti raawwata.

Itoophiyaa bakka bu'uun atileetonni hirmaatan: Habtaam Alamuu, Warqinash Massele fi Natsaannat Dastaadha.

Gulaallii meetira 5000 - Dubartoota

Dorgommiin gulaallii fiigicha meetira 5000 kan dubartoota Jimaata garee lamatti qoodamuun dorgomama.

Gareen jalqabaa guyyaa sa'aa 7 irratti kan eegalu yoo ta'u, gareen lammataa sa'aa 7:26 irratti eegala.

Atileetonni Itoophiyaa sadi; Gudaaf Tsaggaay, Ijjigaayyahu Taayyee fi Sambaree Tafarii dorgommii kanarratti ni hirmaatu.

Ramaddii kanaan atileetonni Keeniyaa Heelan Obiirii fi Aginas Tiroop akkasumas atileetiin Neezarlaandis Siifan Haasan ni morkatu.

Xumura meetira 10000 - Dhiirota

Dorgommiiwwan hawwiin eegaman keessaa tokko kan ta'e fiigichi meetira 10,000 kan dhiirotaa boru [Jimaata] fiigama.

Solomoon Baaraggaa, Yoomiif Qajeelchaa fi Barihuu Aragaawii atileetota Itoophiyaa fiigicha sa'aa 8:30 irratti eegaluun meedaaliyaaf morkatanidha.

Solomoon fi Yoomiif yeroo duraatiif Olompikii irratti hirmaatu

Gulaallii meetira 800 - Dhiirota

Sanbata xiqqaa halkan sa'aatii 9:50 irraa eegalee sa'aa 10:30 irratti xumurama.

Atileet Mallasaa Nibrat Itoophiyaa bakka bu'uun ni dorgoma.

Xumura meetira 800 - Dubartoota

Sabata xiqqaa dhufuu fiigichi meetira 800 kan dubartoota garee sadiitti qoodamuun dorgomama.

Fiigicha gulaallii darbuu kan danda'an yoo ta'e, Habtaam Alamuu, Warqinash Massele fi Natsaannat Dastaa ni morkatu.

Gulaallii gufachiisa meetira 3000 - Dubartoota

Dilbata halkan Wiixatatti bari'u sa'aa 9:40 irraa eegalee 10:10 irratti raawwata.

Dorgommii gulaallii kanarratti Itoophiyaan atileetota Maqidas Abbabaa, Loomii Nul'ataa fi Zarfee Wandimmaaganyiin bakka buuti.

Xumura meetira 800 - Dhiirota

Atileet Mallese Nibrat gulaallii kan darbu yoo ta'e guyyaadhuma kana dorgommii xumuraa meetira 800 ni fiiga.

Gulaallii meetira 1500 - Dubartoota

Wiixata Hagayya 02 bara 2021 dorgommiin gulaallii fiigicha meetira 1500 ni fiigama.

Atileetonni Itoophiyaa Fireewaynii Hayiluu, Dirribee Waltajjii fi Lamlam Hayiluu ni morkatu.

Dorgommiin kun Wiixata halkan sa'aa 9:35 irraa eegalee 10:00 irratti xumurama.

Xumura gufachiisaa meetira 3000 - Dhiirota

Taaddasaa Taakkale, Abrahaam Simee fi Hayilamaariyaam Amaare dorgommii gulaallii kan darban yoo ta'e Wiixata halkan sa'aa 9:15 irratti ni morkatu.

Xumura meetira 5000 - Dubartoota

Hawwiin kan eegamu dorgommiin xumuraa fiigicha meetira 5000 Wiixata guyyaa sa'aa 9:40 irratti eegala.

Gudaaf Tsaggaay, Ijjigaayyahu Taayyee fi Sambaree Tafarii dorgommii gulaallii kan darban yoo tahe meedaaliyaaf morkatu.

Atileetonni Keeniyaa Heelan Obiirii fi Aginas Tiroop akkasumas atileetiin Neezarlaandis Siifan Haasan gulaallii yoo darban ni morkatu.

Gulaallii meetira 1500 - Dhiirota

Kibxata dhufu dorgommiin gulaallii fiigicha meetira 1500 kan dhiirotaa halkan sa'aa 9 irraa eegalee 9:30 irratti raawwata.

Taaddasaa Lammii, Saamu'eel Abaate fi Saamu'eel Tafarraa ammoo atileetota Itoophiyaa bakka bu'uun fiiganidha.

Gulaallii meetira 5000 - Dhiirota

Dorgommiin gulaallii fiigicha meetira 5000 kan dhiirotaas Kibxata guyyaa sa'aa 7:20 irraa eegalee garee lamaan fiigama.

Dorgommii kanarratti atileetonni Geetinnat Waale, Nibrat Malaak fi Milkeessaa Mangashaa ni morkatu.

Xumura meetira 800 - Dhiirota

Dorgommiin kunis Kibxata kan gaggeeffamu yoo ta'u, atileet Nibrat Mallese dorgommii gulaallii yoo darbe ni morkata.

Xumura meetira 1500 - Dubartoota

Dorgommiin kun Roobii fiigama. Fireewaynii Hayiluu, Dirribee Waltajjii fi Lamlam Hayiluu dorgommii gulaallii yoo darban ni morkatu.

Xumura gufachiisa meetira 3000 - Dubartoota

Atileetonni Maqidas Abbabaa, Loomii Nul'ataa fi Zarfee Wandimmaaganyi gulaallii kan darban yoo ta'e ni morkatu.

Dorgommiin kun Roobii guyyaa sa'aa 8 irratti eegala.

Xumura meetira 5000 - Dhiirota

Dorgommiin hawwiin eegamu kan bira fiigicha xumura meetira 5000 kan dubartootaati. Dorgommiin kun Jimaata guyyaa sa'aa 9 irratti eegala.

Atileetonni Geetinnat Waale, Nibrat Malaak fi Milkeessaa Mangashaa gulaallii yoo darban ni morkatu.

Maaraatoonii - Dubartoota

Sanbata Hagayya 7, 2021 dorgommiin maaraatoonii dubartootaa ni fiigama. Atileetonni Itoophiyaa Tigist Girmaa, Birhaanee Dibaabaa fi Roozaa Darajjee meedaaliyaaf Itoophiyaa bakka bu'uun dorgomu.

Xumura meetira 10,000 - Dubartoota

Sanbata guyyaa sa'aa 7:45 irraa eegalee kan fiigamu dorgommiin xumura meetira 10,000 hawwiidhaan eegama.

Itoophiyaan atileetota Letesenbet Giday, Tsiggee Gabrasalaamaa fi Tsahaay Gammachuun bakka buuti.

Fiigicha kanaan morkiin Letesenbet Giday fi Siifan Hasan jidduutti godhamu hawwiin eegama.

Maaraatoonii - Dhiirotaa

Dilbata Hagayya 08, 2021 maaraatooniin dhiirotaa ni gaggeeffama. Atileetonni Itoophiyaa bakka bu'an Shuraa Qixxaataa, Leellisaa Deesisaa fi Sisaay Lammaati.

Qophii gaarii gochaa turuu BBC'tti kan hime Shuraa Qixxaataa atileetii Keeniyaa Eluud Kipchoogee waliin morkata.

Ganna tokko dura maaraatoonii Landan irratti Shuraan Kipchoogee injifachuun milkaa'ee ture.