Puutiin Yukireen qaama waliigaltee nagaa akka taatuuf wabii nageenyaa kennuuf waliigaluu ergamaan Ameerikaa

Haguuggii Tamsaasa Kallattii

1. 17 Hagayya 2025Zelensikiin hirmaannaa wabiiwwan nageenyaa USn 'murtee seena qabeessa' jedhe

   

   Madda suuraa, Getty Images

   Volodymiir Zelensikiin walgahii har'a "tumsa warra fedhii qaban" walgahii guyyaa boruu Waayit Haawusitti Doonaald Tiraamp waliin gaggeeffamu dura "baay'ee faayidaa qabuudha" jechuun dubbatan.

   Zelensikiin gareen kun ''waliigaltee nagaa maal ta'uu akka qabu irratti ilaalcha waloo horachaa jira'' jedhan.

   Akkasumas, erga ergamaan addaa Ameerikaa Istiivan Wiitkoof, US wabii nageenyaaf waadaa galuuf akka qophoofte akeekeen booda, Zelensikiin kun ''murtee seena qabeessaadha'' jechuun waaman.

   "Wabiiwwan nageenyaa bu'aa hojii waloo keenyaatiin dhuguma baayyee qabatamaa ta'uufi lafa irratti, qilleensaa fi galaana irratti eegumsa kennuu qabu, akkasumas hirmaannaa Awurooppaatiin misoomuu qaba," jechuun barreessan.

   Hogganaan Yukireen kun itti dabaluudhaan, marii dhimma mirga daangaa Kiremliin dhiheesse gidduutti, paartileen hundi daangaa biyyaa humnaan jijjiiramuu akka hin qabne waliigalaniiru.

   Akkasumas, dhimmoonni ijoo ta'an "hirmaannaa Yukireen bifa biyyoota sadiitiin: Yukireen, USA, fi hogganaa Raashiyaatiin" akka furaman irra deebi'ee gaafatee jira.

   Raashiyaan waraanni akka hin xumuramneef 'dubbii waliin dhahaa jirti' - Zeleniskiin

2. 17 Hagayya 2025'Tumsa warra fedhii qabanii' walgahii Tiraampiif dhimmoota dursi kennuurratti mari'ataniiru jedhu Maakroon

   

   Madda suuraa, Élysée Palace

   Pirezdaantiin Faransaay Imaanu'eel Maakroon hoggantoota Awurooppaafi pirezdaantii Yukireen Volodimiir Zelensikii gidduutti marii erga godhanii booda gaazexeessitootaatti kan dubbatan.

   Maakroon akka jedhanitti, gareen kun sa'aatii lamaa ol waliin haasa'aniiru, akkasumas boru pirezidaantii Ameerikaa Doonaald Tiraamp waliin wayita wal arganiitti karoora dhimmoota dursi kennamuuf qabu irratti mari'achuu dubbataniiru.

   Pirezidaantiin Faransaay, Tiraamp ''waan US, Yukireen fi Gamtaa Awurooppaa tokkoomsu'' yaadachiisuu akka barbaadan dubbataniiru, fedhii waloo nagaa akkasumas Raashiyaan ammoo akka ''seera idil-addunyaa fi walabummaa daangaa'' kabajju kaasuun.

   ''Tumsi warra fedhii qabanii'' jedhamu ''bakka bu'oota filatamoo Yukireen malee marii daangaa qabaachuu hin dandeenyu'' jechuun irra deebi'ee ibseera jedhan.

   "Karoorri keenya adda tokkomaa, eenyu gama nagaa fi seera idil-addunyaa irra jiru irra deebi'ee ibsuudha," jedhan.

3. 17 Hagayya 2025Puutiin Yukireenif wabii nageenyaa cimaa kennuuf waliigaluu ergamaan Ameerikaa himan

   

   Madda suuraa, Reuters

   Ergamaan addaa Tiraamp Isteev Wiitkoof marii Pirezidaanti Tiraamp Jimaata darbe Alaaskaatti Vilaadmiir Puutiin waliin taasisan irratti bal'ina dabalataa ibsan.

   Puutiin US Yukireeniif ''wabii nageenyaa cimaa ani kan akka tapha jijjiirudha jedhee ibsu akka kennitu hayyamuuf waliigalaniiru,'' jechuun Wiitkoof CNN'tti himan.

   Tumaa murteessaa Naatoo eeruudhaan, "Ameerikaan fi biyyoonni Awurooppaa biroo wabii nageenyaa uwwisuu keewwata 5 afaan (Article 5-like language) fakkaatu bu'a qabeessa ta'een dhiyeessuu akka danda'an waliigalteerra geenye," jedhan.

   Haala duubeerratti odeeffannoo kennuuf: Waliigaltee Naatoo keewwatni 5 irratti haleellaan hidhannoo biyya miseensa tokkorratti raawwatamu akka haleellaa miseensota hunda irratti raawwatameetti akka ilaalamu ibsa.

   Puutiin Yukireen Naatootti akka hin makamneef cimsanii kan morman yoo ta'u, Wiitkoof ammoo qophiin kun ''Yukireenoonni kan sanaan jiraachuu danda'an'' yoo ta'e filannoo ta'uu danda'a jedhan.

   Witkoff akkasumas US, Pirezidaantii Yukireen Zelensikii waliin xiyyaara Alaaskaa irraa gara manaatti deebi'uu irratti haasaa gaarii akka godhan dubbachuun walgahiin Wiixataa boruu Waashingitanitti taasifamu bu'a qabeessa ta'a jedhanii akka amanan ibsan.

4. 17 Hagayya 2025Yoo dhukaasa dhaabuun walii hin galamne Raashiyaarratti dhiibbaan dabaluu qaba- itti gaafatamaan Mana Maree Awurooppaa

   

   Madda suuraa, Getty Images

   Amma yaadni dabalataa walgahii har'aa "tumsa warra fedhii qaban" hordofuun dhagahamaa jira.

   Pirezidaantiin Mana Maree Awurooppaa fi walga'ii kana irratti argaman, yoo walii galtee dhukaasa dhaabuu hin dandeenye Gamtaan Awurooppaa fi Ameerikaan Raashiyaa irratti ''dhiibbaa dabaluu'' qabu jedhan.

   Antooniyoo Koostaa barreeffama toora X isaanii irratti barreesseen: "Mirgi birmadummaa Yukireen haal-duree nagaa murteessuuf qabdu kabajamuu qaba."

   Koostaan Ameerikaan ''Yukireeniif wabii nageenyaa kennuu keessatti hirmaachuuf fedhii qabaachuushee'' akka simatan kan dubbatan yoo ta'u, itti dabaluudhaan, kunis ''weerara Raashiyaan gara fuula duraa dhaabuu akka danda'u'' dubbatan.

   "Awurooppaan gahee ishee ba'uuf qophii taatee dhaabbattee jirti," jechuun barreessa.

5. 16 Hagayya 2025Itoophiyaan sinotiraakiin biyya akka hin seenne dhorkite

   

   Madda suuraa, EBC

   Itoophiyaan konkolaataa Chaayinaa Sinootiraakii jedhamuun beekamuu akka biyya hin seenne dhorkuu beeksiste.

   Dhimmi kunis dhimma qulqullina waliin akka walqabatu aangawaan miidiyaa biyyaalessaatti himaniiru.

   Dabalata: Aangawaan waa'ee dhorkaa kanaa maal jedhan?

6. 16 Hagayya 2025Dhukaasa dhaabuurra waliigalteen nagaa maaliif murteessaa tahe?

   

   Madda suuraa, EPA

   Walgahiin Tiraampiifi Puutin otoo hin jalqabiin dura dippiloomaatiin Gamtaa Awurooppaa tokko mariin hiika qabuufi waraana Yukireen dhaabuu danda'u dhufuu danda'u ''waraana dhaabuufi lola hir'isuutiini,'' jedhanii ture.

   Amma waan hundi kan geeddarame fakkata.

   Tiraamp walgahii Puutin waliin taasisaniin adeemsa nagaa dheeraafi guutuu tahetu ''karaa filatamaadha'' jedhan.

   Kanas kan jedhanii dubbatan yeroo waraanni biyyoota lameen gidduutti itti fufee jirutti dha.

   ''Waraanni yeroof dhaabbatu, hin turus,'' jedhaniiru.

   Institiyuutii Rooyaal Yunaayitiditti Daarektarri Saayinsii Waraanaa Maatiw Saaviil kuni Raashiyaaf injifannoo dippiloomaasiiti jedhan.

   ''Galmi waraanaa Puutin oppreeshinii Yukireen keessatti geggeessaniin danqaa battalaa obbaafachuu yoo tahe milkaa'aniiru,'' jedhan.

   Raashiyaan ammallee baha Yukireenitti daangaa fudhataa jirti kunis fuulduratti marii taasifamuuf harka caalmaa kennaafi.

   Maatiw akka jedhanitti Raashiyaan yeroo bitachaa jirti: ''gara duubaatti tarkaanfachuuf qophii hin fakkaattu.

   ''Tarkaanfiin Raashiyaan lafarratti fudhattu akkaan harkifataa dha, isa Yukireeniifi deeggartoonnishee fedhaniin caalaa dheerachuu mala.''

   Awurooppaan Yukireen akka deeggartu ifaa dha.

   Ejennoon Ameerikaan qabdu garuu sirriitti ifa waan hin taaaneef Gamtaa Awurooppaafi UK'f danqaa taha jedhu xiinxalaan kuni.

   ''Kanaaf Awurooppaan hangam Yukireen deeggaruu qabna kan jedhurratti murtoo jabaa dabarsuu qabu,''

7. 16 Hagayya 2025'Qonnaan bulaa afur homaa hin qabne oyiruu keessatti ajjeesan' - Abee Dongoroo

   

   Madda suuraa, get

   Haleellaa hidhattoonni Faannoo Godina Horro Guduruu Wallaggaa aanaa Abee Dongoroo keessatti raawwatan jedhameen qonnaan bultoonni afur ajjeefaman.

   Haleellaan hidhatootaa kun aanichatti ganda Hoomaa Gaalessaa keessatti guyyaa Roobii ALI Hagayya 7, 2017 raawwatame.

   Dabalata: Ajjeechaan Abee Dongoroo akkamiin raawwate?

8. 16 Hagayya 2025Taphni Liivarpuul itti injifate maaliif gidduutti adda cite?

   

   Madda suuraa, Getty Images

   Tapha jalqabaa tapha Pirimeer Liigii Ingilizii bara dorgommii baranaan shaampiyoonaa kan ture Liivarpuul Borniwaamuziin 4 fi 2'n injifate.

   Tapha kanarratti deeggartoonni Liivarpuul taphataa isaanii balaa konkolaataan lubbuu dhabe Diyaagoo Jootaa yaaadataniiru.

   Maatiin Diyaagoo dirree keessa turan.

   Taphataaan Liivarpuul galchii sadaffaa kilaba isaaf galche, Federikoo Chiyeezaa, galchii kana yaadannoo Diyaagoo Jootaa haa ta'u jedheera.

   Dabalata: 'Yoom dhaabata?' - Taphni Liivarpuul itti injifate maaliif gidduutti adda cite?

9. 16 Hagayya 2025Dhukaasa dhaabuu otoo hin taane nagaan waarawaa dhufuu qaba- Zeleenskii

   

   Madda suuraa, Getty Images

   Pireezidantiin Yukireen Voloodmiir Zeleenskii ''yoo mariin biyyoota sadeenii hin jiraanne, yoo Raashiyaan waraana kana dhaaburraa boodatti jetti tahe qoqqobbiin Tiraamp Raashiyaa irra kaa'an jabaachuu qaba,'' jedhan.

   ''Qoqqobbiin meeshaa si'ataa hojjetudhas,'' jechuun himan ibsa isaanii keessatti.

   ''Dhimmooti Yukireeniif murteessoo tahan hundi bakka Yukireen jirtutti mari'atamuu qabu, keesumaa dhimmi daangaa Yukireeniin alatti murtaa'uu hin qabu,'' jedhan.

   Mariin booda hogganoota Awurooppaa waliin qindaa'uun Zeleeniskiin ''nagaan dhugaa dhufuu qaba, dhukaasa dhaabuu weerara Raashiyaa gidduutti tahu miti,'' jedhan.

   Ajjeechaan akka dhaabbatu, lafaafi samiirratti dhukaasni akka dhaabbatu akkasumas hidhamtoonni waraanaa Yukireen akka gadhiifaman akkasumas otooma waraanni geggeefamuu Raashiyaa irratti dhiibbaan akka jabaatu waamicha dhiyeessan.

   Deeggarsa Ameerikaa fi US'n ''yeroo dheeraa keessatti wabiin nageenyaa jiraachuu qabas,'' jedhaniiru.

10. 16 Hagayya 2025Waraanni Raashiyaa daangaa Yukireen to'achuu itti fufe

    Ministirri Ittisaa Raashiyaa baha Yukireenitti gandoota lama to'achuu beeksise.

    Erga waggaa sadii dura Raashiyaan Yukireen weerarteetii waraanni Raashiyaa suutuma bakkeewwan to'atan bal'isaa jira.

    Ji'oota muraasa darbemmoo baha Yukireen keessatti lafa qabatan akkaan bal'isani.

    Akka Inistitiyutiin Qorannoo Waraanaa jedhetti, waraanni Raashiyaa guyyaatti giddugaleessan 15km - 16km gara daangaa Yukireen seenaa jira.

    Raashiyaan yeroo ammaa daangaa Yukireen keessaa 20% to'atteetti.

    Pirezidant Tiraamp waraana kana dhaabuuf lafa walii kennuu akka furmaatatti dhiheessanii turan.

    Ta'us, yaada kana Zeleeniskii hin fudhanne.

11. 16 Hagayya 2025Marii Tiraamp fi Putiniin eenyutu buufate?, Joel Gunter Reporting from Kyiv Jo'el Gaantar, Kiiv irraa

    Mariii Tiraamp fi Putiin waliigaltee malee xumuramuus, kan buufate Putiinidha jedhu namni siyaasaa Yukireen Yaaroslaav Yurchishiyaan.

    Marii yeroo xumuraaf waggaa afur dura pirezidantii Ameerikaa waliin erga taasisan booda mariin Alaaskaatti taasifamee Putiin wal tajjii addunyaatti deebisee jedhan.

    Akkasumas Putiin yeroo dabalataa argatan jedhan.

    ''Chaayinaa waliin mari'achuuf, waraana dabalataa walitti qabuuf, dhimmoota hawaasummaafi dinagdee biyya keessaarratti xiyyeeffachuuf yeroo dabalataa argatan,'' jedhan.

    Yukireeniif immoo michuuwwan Awurooppaa haalaan barbaachisoo ta'u isaanii mul'iseera jedhan.

12. 16 Hagayya 2025Osoo Tiraamp fi Putiin mari'atanii lolli itti fufee ture

    Yeroo Tiraamp fi Putiin Alaaskaatti mari'ataa jiranitti Raashiyaan diroonii 85 Yukireenitti dhukaasuun dhagahame.

    Humni Qilleensaa Yukireen dirooniin 61 qollifamu beeksiseera.

    Gama kaaniin diroonii Yukireen 30 mancaasuu Raashiyaan beeksisteetti.

    Mariin Tiraamp fi Putiin waliigaltee malee xumuruun ni yaadatama.

13. 16 Hagayya 2025Dureewwan Awurooppaa jila waloo taa'uf qophii ta'u ibsan

    Dureewwan Awurooppaa ganama kana Pirezidant Tiraamp fi Zeleniskii waliin mari'atan ibsa waloo baasaniin ''tarkaanfiin itti aanu Pirezidant Zeleniskii dabalatee marii gaggeessuudha,'' jedhan.

    ''Deeggarsa Awurooppaan yaa'ii sadeen milkeessuuf Pirezidant Tiraamp fi Pirezidant Zeleniskii waliin hojjechuuf qophiidha,'' jedhaniiru.

    ''Raashiyaarratti dhiibbaa cimsuuf qophiidha,'' jedha ibsi bahe.

    ''Nageenya Yukireeniifi fedhii nageenya ijoo Awurooppaa mirkaneessuuf yeroo hojjennutti Yukireen nu abdachuu dandeessi,'' jechuun ibsaniiru.

    ''Daangaa isheerratti kan murteessuu qabu Yukireenidha. Daangaan idil-addunyaa humnaan jijjiiramuu hin qabu,'' jedha ibsi bahe.

    Dabaluunis, ''waraana dhaabuufi nagaa waaraa fiduuf Yukireen cimsuuf waan dabalataa dalaguuf,'' waadaa seenuu ibsani.

    Ibsi waloo kuni:

    • Pirezidantii Komishinii Komishinii Awurooppaa Ursula von der Leyen
    • Pirezidantii Faransaay Imaanu'el Maakroon
    • MM Xaaliyaanii Joorjiyaa Melonii
    • Chaansilara Jarman Firedirik Merz
    • MM UK Kiir Istaarmar
    • Pirezidantii Finlaand Aleeksaandar Istaab
    • MM Polaand Donaald Task
    • Pirezidantii Mana Maree Awurooppaa Antooniyoo Kostaadha.

14. 16 Hagayya 2025Amma nu gahe, Waraana dhaabuuf karaan sirrii waliigaltee nagaadha jedhan Tiraamp

    

    Madda suuraa, Getty Images

    Pirezidant Tiraamp Pirezidantii Raashiyaa Vilaadimir Putiin waliin erga wal arganiifi dureewwan NATO fi pirezidantii Yukireen waliin immoo bilbilaan erga mari'atan booda waan filmaata jedhan dubbatan.

    Tiraamp ''hunduu kan hubatan waraana hamaa Raashiyaafi Yukireen dhaabsisuuf filmaanni sirrii gara Waliigaltee Nagaa seenuudha,'' jedhan.

    Waliigalteen nagaa kuni ''waliigaltee dhukaasa dhaaburra'' wayyoo akka qabu miidiyaa hawaasummaa isaanii Truth Social irratti ibsan.

    Tiraamp Alaaskaatti ''guyyaa milkaa'aa'' dabarsuu himaniiru.

    Isa duratti Pirezidantiin Yukireen dubbatan mirkaneessuunis gaafa Wiixataa Zeleeniskii waliin Waayit Haawus keessa akka wal argan himan.

    ''Yoo akka yaadne adeeme, Pirezidant Putiin waliin beellama qabanna. Lubbuu ummata miiliyoona hedduu oolchina,'' jedhan.

15. 16 Hagayya 2025Hojjettoonni lagannaa hojii jalqabnaan daandiin qilleensaa Kaanaadaa balalii hunda addaan kute

    

    Madda suuraa, Getty Images

    Hojjettoonni Daandiin Qilleensaa Kaanaadaa, Air Canada, lagannaa hojii jalqabnaan dhaabbatichi balalii hunda addaan kute.

    Tarkaanfiin hojjettootaa kuni karoora imalaa, imaltoota 130,000 danqa jedhe dhaabbatichi.

    Gamtaan keessummeessitoota Air Canada 10,000 bakka bu'u, tarkaanfii sa'aaatii 72f turu Sambata ganamaa qabe akka fudhatu mirkana kenneera.

    Daandiin qilleensaa biyyattii balalii hunda addaan kutuu himuun imaltoonni daandii qilleensaa biraan imaluuf yoo tahe malee gara buufata qilleensaa akka hin deemne beeksiseera.

    Keessummeessitoonni Air Canada daballii miindaafi yeroo xiyyaarri lafa jiru hojii hojjetaniif akka isaaniif kaffalamu gaafataa jiru.

    Har'a ganama keessaa sa'atii 2:00tti jalqabe. Daandiin qilleensaa kuni sababa kanaan guyyaatti balaliin 500 tahu rakkoo keessa gala.

16. 16 Hagayya 2025Sooriyaatti qaamoti hidhatan yakka waraanaa raawwachuun hin oolle - UN

    

    Madda suuraa, Reuters

    Miseensota bulchiinsa yeroo Sooriyaa fi loltoonni bulchiinsa duraanii waliin hidhata qaban Bitootessa darbe wal qoodanii wal lolaa turan yakka waraanaa hin raawwatiin hin oolle jechuun gabaasni UN agarsiise.

    Lola Bitootessa darbeen yoo xiqqaate namoonni 1,400 kan ajjeefaman yoo tahu, baayyeen namoota nagaa dha.

    Koomishiniin Qorannoo UN-Sooriyaa haleellaa ture qondaaloti Damaasqoo jiran ajajuu isaaniif ragaa hin arganne jedhe.

    Hokkorri naannoo qarqara galaanaa qubsuma garee Islaamaa Alaawaat jedhamanitti raawwateen, finciltoonni Islaamaa pireezidantii duraanii Bashaar al-Asaad Mudde darbe aangoorraa buusuun booda garaagartummaa gareelee Islaamaa gidduu jiru saaxileera.

    Hokkorri kan mudate humnooti nageenyaa gareeleen mootummaa duraaniif amanamoo tahan irra bahanii weeraruun boodadha.

    Kunis humnoota mootummaa kan baay'inaan Musliimoota Sunni tahaniifi kanneen Asaadiif amanaman Alaawaayit tahan gidduutti ture.

    Akka koomishiniin UN jedhutti, gochaawwan akka yakka waraanaatti ilaalamuu danda'an - ajjeechaa, dararaa, butii fi namummaa xiqqeessan humnoota bulchinsa yeroofi loltoota Asaadiin raawwataniiru.

    Koomishinichi qorannoon taasifamee, itti gaafatamummaa akka fudhatamu waamicha dhiyeesseera.

17. 16 Hagayya 2025Lolaan tasaa Paakistaanittii lubbuu namoota 300 ol galaafate

    

    Madda suuraa, AFP via Getty Images

    Lolaa tasaafi sigigni lafaa Paakistaaniifi Kaashmiir-Paakistaan bulchitu keessatti mudateen lakkoofsi namoota lubbuun darbee saffisaan dabalaa jira.

    Namni baayyeen kan du'e kaab-lixa Paakistaan bulchiinsa Kaayibar Paaktuunkaawaatti lafa gaarri itti baay'atu tahuu qondaaloti yeroo balaa himaniiru.

    Balaa kanaan manneen 74 yoo jijjigan heelikooptariin baraaruuf deemte hojiirra otoo jirtu kufte caccabdee, hojjettoonni shan lubbuun darbe.

    Namoonni sagal Kaashmiir- Paakistaan bulchitu keessatti kan du'an yoo tahu kaaba biyyattii Gilgiit-Baaltistaan keessatti ammoo shan lubbuun darbeera.

    Raagni metiroolojii biyyattii hamma gaafa Adoolessa 21tti roobni cimaan kaaba-lixa biyyattiitti itti fufa jechuun himan.

    Naannolee kanatti labsiin yeroo muddamaa kaa'ameera.

18. 16 Hagayya 2025Zeleniskiin gaafa Wiixata Tiraamp waliin wal arguufi

    

    Madda suuraa, EPA

    Pirezidantiin Yukireen Volodimiir Zeleeniskii gaafa Wiixataa Waashingitanitti Pirezidant Tiraamp waliin wal arguuf akka jedhan beeksisan.

    Ergaa Telegiraama irratti barreessaniin ''waamicha taasifameef galatan qaba'' jedhaniiru.

    Pirezidant Tiraamp guyyaa Jimaataa Pirezidant Putiin waliin wal arganii mari'atanis waliigalteerra hin gahiin hafaniiru.

    Eegasii booda Tiraamp pirezidantii Yukireen fi dureewwan Awurooppaa waliin 'yeroo dheeraaf' bilbilaan haasa'uu dubbatani.

    Waajjirri Pirezidantiii Yukireen ''Bilbila [yeroo] dheeraadha - jalqaba Pirezidant Zeleniskiifi Tiraamp gidduu, boodarra dureewwan Awurrooppaas hirmaatan,'' jedhe.

    Marii Jimaata Putiin fi Tiraamp taasisan irratti Zeleeniskiin hin hirmaanne ture.

    Garuu mariin suni yoo milkaa'e marii lammataa irratti Zeleniskiin akka hirmaatan Tiraamp dubbatanii turan.

    Dabalata: 'Hamma waliigalteerra hin gahamnetti waliigalteen hin jiru' - Tiraamp, maaltu ittaana?

19. 16 Hagayya 2025Ashamaa!

    Tamsaasni kallattii BBC Afaan Oromoo guyyaa Sambataa eegale.

    Dhimmoota biyya keessaafi alaa isin biraan geenya.

    Isiinis Facebook, WhatsApp fi YouTube gubbaa nu hordofaa.

    Lafa nagaa oolaa!

20. 16 Hagayya 2025Hanga waliigalteen taasifamuutti waliigalteen hin jiraatu jedhu Tiraamp

    

    Madda suuraa, Reuters

    Doonaald Tiraamp innii fi Puutiin walgahii bu'a qabeessa ta'e qabaachuu isaaniifi ''jijjiramni hanga ta'e argamu'' dubbataniiru.

    Michoota Naatoo fi kanneen biroo, Yukireen Zelensikii dabalatee akka bilbiluuf dubbatan. Waliigalteen tokko "dhuma irratti" kan isaanii ta'uu fi waliigaluu akka qaban jedhan.

    Hanga waliigalteen taasifamuutti waliigalteen hin jiru kan jedhu yoo ta'u, ''jijjirami guddaan'' argameera haata'u malee ganaa ''achi hin geenye'' jedhan.