Baba Ijesa: Yomi Fabiyi ní àṣeyọrí ńlá ní gbígba béèlì Omiyinka jẹ́

Nibayii to ku wakati diẹ ki awọn ọlọpaa gba oniduro James Olanrewaju, Baba Ijesa, awọn alatilẹyin rẹ kan ti n ṣọ ero ọkan wọn lori gbigba oniduro rẹ.

Ninu wọn ni Yomi Fabiyi ti oun naa jẹ gbajugbaja oṣere tiata ati alatilẹyin fun Baba Ijesa.

Fabiyi sọ fun BBC pe nitori pe awọn kan n tapa si ofin Naijiria pe ki wọn fi Ijesa si ahamọ lai ṣe igbẹjọ rẹ, gbigba beeli rẹ yi jẹ aṣeyọri to lamilaka.

O ni ọrọ yii ki ba ma ri bẹẹ ṣugbọn ''ai fun awọn afurasi ni beeli jẹ ọna kan ti wọn fi n pa awọn eeyan lahamọ, ti wọn fi n pa wọn lẹnu mọ, ti wọn si fi n fi ẹtọ dun awọn eeyan''

Fabiyi tẹsiwaju pe, awọn ko ni erongba lati ma ṣe ayẹyẹ lori gbigba beeli yii nitori igbẹjọ si wa niwaju ti Baba Ijesha yoo jẹ niwaju adajọ.

Yomi Fabiyi wa fi iyalẹnu rẹ han nipa gbogbo awọn ti wọn n sọ wi pe ki wọn mase fun Ijesa ni beeli.

Àwọn iròyin tì ẹ leè ní ìfẹ̀ síí:

''Ṣe iyẹn wa tumọ si pe wọn da lare ni? Gbogbo ẹni to ba n hu iru iwa yi, wọn wa lara awọn to n jẹ ki Naijiria maa ni ifasẹyin.''

O wa gba araalu ni imọran lati tẹle ofin Naijiria ki idagbasoke baale ba orileede naa.

''Gbogbo wa la ni ipa la ti ko, ati oniroyin ati araalu,o yẹ ka lọ tun ero wa pa ki a ṣe ohun to tọ''

Lori boya yoo ṣi tẹsiwaju pẹlu atilẹyin fun Baba Ijesa, o ni oun ''ko si lẹyin ki eeyan fi irọ tabi amulumala lati fi ran ẹlomiran lẹwọn''

N ko ni ohunkohun lati sọ nipa beeli ti wọn fun Baba Ijesha - Princess

BBC Yoruba tun ba adẹrinposonu nni, Damilola Adekoya tawọn eeyan mọ si Princess sọrọ, ẹni tii se iya ọmọ ti wọn ni Baba Ijesha se asemase pẹlu rẹ.

Nigba to n ba wa sọrọ, Princess ẹni to mi kanlẹ wa sọ fun wa pe oun ko ni nkankan lati sọ lori ọrọ yii.

A tun gbiyanju lati ba agbẹjọro Baba Ijesa naa sọrọ lori igbesẹ ti wọn n gbe lati yanju gbogbo ohun to nii ṣe pẹlu gbigba oniduro rẹ.

Eeyan kan ti ko darukọ ara rẹ lo gbe ago ipe agbẹjọro Adesina Ogunlana, ti o si ni wọn ko ti le da wa lohun niisinyi.

Ireti wa ni pe wọn yoo pari gbogbo eto gbigba oniduro Baba Ijesa lonii, lẹyin ti ileeṣẹ ọlọpaa ni ko san ẹgbẹrun lọna ẹẹdẹgbẹta Naira fun gbigba oniduro rẹ.