Ibadan Violence: Ṣé lóòtọ́ ní àwọn jàǹdùkú jó ìlé 200 àti ọ̀kọ́ 29 ní Ibadan?

Laipẹ yii ni iroyin fi lede wi pe awọn janduku ti sọ ina si ile to le ni igba, ti wọn si jo ọkọ ayọkẹlẹ to le ni ogun ni ilu Ibadan, ni ipinlẹ Oyo.

Agbegbe Odo-Osun/Ita Baale/Aderogba ni ilu Ibadan ni iroyin naa sọ wi pe iṣẹlẹ naa ti waye.

Amọ, ileeṣẹ ọlọpaa ti fi lede wi pe ko si ohun to jọ bẹẹ to waye, ati wi pe awọn oniroyin ẹlẹjẹ lo gbe iroyin naa.

Ninu atẹjade ti alukoro ọlọpaa nipinlẹ Oyo, Olugbenga Fadeyi fi lede lo ti sọ wi pe ọwọ awọn tẹ janduku mẹfa to ṣọṣẹ ni agbegbe Labiran ni Ọgbọnjọ, Osu Kini, ọdun 2021.

Fadeyi ni ohun to ṣẹlẹ ni pe awọn janduku to wa ni agbegbe naa jade sita ni Ọjọ Kọkandinlọgbọn, Oṣu Kinni, ọdun 2021 lati ṣekọlu si awọn ile itaja to wa ni agbegbe naa, ti wọn si dana si oju kan nibi ti wọn pagọ si.

O ni ile kan ati ileesẹ itaja ni wọn kọlu, ti eyi si jasi ipe gbajawiri ti wọn pe awọn ọlọpaa lati pese alaafia si agbegbe naa.

Awọn janduku naa jade ni agbegbe Aderogba ni asalẹ ti wọn si kọlu agbegbe Bayerunka ati Ogbori Efon ni ilu Ibadan.

''Awọn ọlọpaa ati ikọ Amọtẹkun ni wọn ran lọ si agbegbe naa, ki wọn to ri awọn kan mu, ti wọn si pa ina ti wọn da si agbegbe naa.''

Eleyii mu ki awọn janduku naa sa kuro ni agbegbe naa, ti alaafia si ti jọba.

Alukoro ọlọpaa naa fikun pe awọn ti bẹrẹ si ti tọpasẹ awọn janduku to ku, ki awọn le fi panpẹ ọba mu wọn, ki wọn si gbe wọn lọ si ileẹjọ.

Àwọn jàndùkú kọlù àgọ ọlọ́pàá n'Ibadan, èèyàn méjì kú

Iroyin to tẹ wa lọwọ lati ilu Ibadan sọ pe, awọn afurasi janduku kan ti ṣe ikọlu sawọn ọlọpaa nitori bi wọn se mu awọn afurasi meji ti wọn lo n da omi alaafia ilu ru.

A gbọ pe ikọlu naa bẹrẹ lagbegbe Odo-Osun lọjọbọ, ti o si tan de agọ ọlọpaa to wa ni Mapo.

Eeyan meji ku ninu iṣẹlẹ naa gẹgẹ bi iroyin to tẹ wa lọwọ ti wi.

Lọjọbọ ni awọn ọlọpaa mu awọn janduku meji kan ladugbo Odo-Osun nitosi Mapo.

Bi awọn akẹgbẹ wọn ṣe ri pe ọwọ ti tẹ wọn, ni wọn gbiyanju lati fipa tu wọn silẹ lọwọ awọn ọlọpaa.

Amọ ṣa, ọlọpaa ṣina bolẹ fun wọn ni agbegbe Odo-Osun ti eeyan kan si ku nibẹ.

Lẹyin ikọlu ti Odo-Osun yii, awọn janduku taa n wi yi tun ṣigun lọ si agọ ọlọpaa to wa ni Mapo, lati fẹhonu han lori eeyan wọn kan ti o ku.

Ninu wọdu-wọdu to waye nibẹ, awọn ọlọpaa tun yinbọn lati daabo bo agọ wọn, eeyan kan tun fara gbọta to si gba ibẹ ku.

Alukoro ọlọpaa ni ipinlẹ Oyo, Olugbenga Fadeyi fidi iṣẹlẹ yii mulẹ fawọn akọroyin ninu atẹjade kan to fi sita.

O ni ''lẹyin tawọn ọlọpaa mu awọn janduku meji kan, arakunrin kan ti wọn n pe orukọ rẹ ni ''Packaging'' lewaju awọn janduku mii to to ọgbọn,

lati ṣigun bo agọ ọlọpaa, ki wọn le tu akẹẹgbẹ wọn silẹ''