Ondo Election 2020: Agboola Ajayi ní ₦12m lòun ń gbà lóṣù, kìí ṣe ₦13m

Igbakeji gomina nipinlẹ Ondo, Agboola Ajayi ti fesi pada fun gomina Rotimi Akeredolu, to ni oun n gba miliọnu mẹtala naira losu.

Ajayi, tii se oludije gomina fẹgbẹ oselu ZLP lọwọ lọwọ bayii wa salaye pe, miliọnu lọna ọtalelẹẹdẹgbẹrin o din mẹwa naira, 750m ni gomina Akeredolu n gba losoosu fun owo ipese aabo taa mọ si Security Vote.

Ko tan sibẹ o, Ajayi tun fikun pe miliọnu lọna aadọjọ naira, 150m, ni Akeredolu tun n gba lowo osu, to si n fun oun ni miliọnu mejila naira ninu rẹ losu.

Àwọn iròyin tì ẹ leè ní ìfẹ̀ síí:

Igbakeji gomina ipinlẹ Ondo sisọ loju ọrọ yii ninu atẹjade kan ti akọwe iroyin rẹ, Allen Sowore fisita pẹlu afikun pe, ẹnu ya oun pe Akeredolu n pariwo pe oun n fun Ajayi ni miliọnu mẹtala naira losu, bii ẹni pe ẹbun lo n fun-un.

O ni gomina Akeredolu ko fun oun ju miliọnu mejila naira lọ losu, ti ko tiẹ wa fun oun mọ bayii.

Ajayi salaye pe awọn owo naa lo wa fun owo itọju ọọfisi oun, owo ajẹmọnu awọn osisẹ to wa lọdọ oun, owo epo mọto ati itọju awọn ẹsọ oun.

"Owo yii le pọ lootọ amọ ko to fun iye eeyan to tọ si ati awọn eeyan ta fi gbọ bukata wọn."

Bakan naa lo tun sisọ loju rẹ pe, iyawo ati ọmọ Akeredolu n gba ọpọ miliọnu naira bii owo ajẹmọnu losoosu lai si ni ipo kankan ti ofin la kalẹ.

₦13m ni Agboola Ajayi ń gbà lóṣù àmọ́ kò ní ìtẹ́lọ́rùn: Akeredolu

Saaju la ti mu iroyin wa fun yin pe, Gomina Ipinlẹ Ondo ati oludije lẹgbẹ oṣelu APC, Oluwarotimi Akeredolu ti ni ohun gbogbo ni oun fi tẹ Igbakeji gomina ni ipinlẹ Ondo, Agboola Ajayi lọrun, amọ o ya abara mu oore jẹ.

Gomina Akeredolu sọ eleyii lasiko to n ba awọn eniyan sọrọ lori ẹrọ amohunmaworan ni ipinlẹ Ondo.

Akeredolu ni Agboola Ajayi ko fẹ duro di igba tirẹ, o fẹ fi waduwadu gba ipo gomina, eleyii ti ko le ṣeeṣe.

"Mo ma n ran Agboola lati soju mi ni awọn ibi to ṣe pataki, amọ ko ni itẹlọrun.

Awọn eniyan ti kilọ fun mi lati maṣe gbe ọkan le Agboola, amọ mi o gbọ titi to fi bẹrẹ si ni ṣe alatako mi.

Ko si igbakeji gomina to n gba owo oṣu ti Agboola n gba ninu itan ipinlẹ Ondo, ẹgbẹrun mẹtala miliọnu naira lo n gba ni owo oṣu .

Gbogbo nnkan ni mo fi tẹ lọrun, amọ o ṣi fi ọbẹ ẹyin jẹ mi ni isu."

Amọ, gomina Akeredolu fikun wi pe, gbogbo awọn alatako oun ni oun ṣetan lati dariji gẹgẹ bi ọmọ lẹyin Kristi ti oun jẹ, ko le e mu ki oun ni ikunsinu si ẹnikẹni.

Àwọn iròyin tì ẹ leè ní ìfẹ̀ síí:

Gomina naa ni o da oun loju wi pe, oun yoo jawe olubori ninu eto idibo sipo gomina to n bọ, nitori awọn ti ṣiṣẹ ribiribi ni ipinlẹ Ondo.

"Gbogbo iṣẹ akanṣe ti ijọba Mimiko ṣe pati, ni a ti pari patapata, ti a si tun kọ ẹẹdẹgbẹta ileewe alakọbẹrẹ ni ipinlẹ naa, eleyii to ti mu ilọsiwaju ba eto ẹkọ ni ipinlẹ Ondo.

A tun ti gba owo lati tun adagun omi Owena ṣe ati awọn marun un miran, eleyii ti yoo mu ilọsiwaju ba ipese omi ni ipinlẹ Ondo."