Янгиликлар. Россия: Путин энди ҳаммани бўйсундирмоқчими? Видео Rossiya Пригожин Dunyo Yangiliklar
Сурат манбаси, Reuters
Янги буйруқ зудлик билан кучга кирди.
Алоқадор мавзулар:
Путин барча вагнерчилар ва бошқа хусусий ҳарбий ёлланмачиларни Россия давлатига содиқликка қасамёд қилишга чақирди.
Буйруқ Украинадаги ҳарбий ҳаракатларда қатнашаётган, Армияга ёрдам бераётган ва ҳудудий мудофаа бўлинмаларида хизмат қилаётган барчага бирдек тааллуқли.
Россия президенти буйруқни жума куни имзолади, унинг зудлик билан кучга кириши айтилди.
Орадан кун ўтиб эса, Россия Тергов қўмитаси "Вагнер" асосчиси ва етакчиси ўлимини расман тасдиқлади.
Евгений Пригожин тушган ва Москвадан Санкт-Петербургга учаётган "Embraer Legacy 600" русумидаги бизнес-жет чоршанба куни Тверь вилояти осмонида ҳалокатга учраган.
Россия Тергов қўмитасининг кеча, якшанба куни расман билдиришича, молекуляр-генетик текширув натижалари ўн нафар қурбондан бири Пригожиннинг ўнг қўли Дмитрий Уткин бўлганини ҳам тасдиқлаган.
Аммо бизнес-жет ҳалокатига нима сабаб бўлгани ҳали-ҳануз ноаёнлигича қолмоқда, ҳалокат юзасидан жиноий иш очилган ва тергов ҳаракатлари ҳануз давом этаётгани айтилади.
Расмий Кремль ҳалокатда ўзининг қандайдир иштироки борлигига оид тахминларни қатъий рад этиб чиққан.
Путин Пригожин исёнини ўшанда "хиёнат" ва "орқадан берилган зарба", деб атаган.
Аммо ўшанда Беларусь президенти воситачилигида икковлоннинг муросага боришгани хабар берилган.
Муносабат
Сурат манбаси, .
Буюк Британия Қироллик Бирлашган Хизматлар Институти илмий ходими Натия Сескуриянинг айтишича, "Путин келажакда бошқа инқирозга юз тутмаслигига ишонч ҳосил қилиш учун "Вагнер" устидан назоратини кучайтирмоқчи".
Сўнгги янгиликка "Вагнер" ва бошқа хусусий ҳарбий ёлланмачилар муносабати маълум эмас.
Аммо июнь ойидаги муваффақиятсиз қисқа исёнидан сал аввал Россия Мудофаа вазири Армия билан шартнома имзолашлари учун уларга 1 июлга қадар муҳлат берган.
"Вагнер"нинг Россия Мудофаа вазирлиги остида фаолият юритишини истамаслигини айтиб, Евгений Пригожин бунга кўнмаган.
Путин ўшанда Мудофаа вазирлигини қўллаган, бу ҳам унинг узоқ йиллик иттифоқчиси Евгений Пригожинга берилган илк ошкора зарбаси ўлароқ талқин этилганди.
Украинада жойлашган Демократик ташаббуслар жамғармаси таҳлил маркази раҳбари Петро Бурковский айтишича, янги буйруқ "Вагнер" жангчиларини топиш ва жиноий жавобгарликка тортиш учун ҳарбий разведкага берилган яширин пайғом".
Жангчиларга эса, берилган аниқ сигнал, у бу билан "қасамёд қилинг ва қуролингизни сақлаб қолинг, ёки қуролсизланинг. Сиз бўйсунасиз ёки қамоққа тушасиз", демоқчи, дейди Бурковский.
Натия Сескуриянинг ишонишича, Пригожиннинг қасамёд қилишдан бўйин товловчи ҳақиқий издошлари узоқ истиқболда ҳали яна бошоғриғи бўлишлари мумкин.
"Шу маънода янги буйруқ қисқа муддатли истиқболда ишлайди. Бироқ "Вагнер" ичида Пригожиннинг содиқ тарафдорлари бўлган ва бу Путин учун узоқ муддатли истиқболда муаммолар туғдириши мумкин", - дейди у.
Таҳлилчиларга кўра, вагнерчилар энг қонли изларини Украинада қолдиришган.
Вагнерчилар Украинада жанг жабҳасининг энг оғир участкаларида жанг қилишган.
Душанбага ўтар кечаси эса, Россия ҳукумати Брянск вилояти ва Москва яқинидаги Люберци шаҳрида дронлар уриб туширилгани ҳақида хабар берди.
Маҳаллий губернаторнинг айтишича, отишмалар натижасида Украина билан чегарадош Белгородда тўрт киши яраланган.
Украина ҳукумати Россияни ҳужумга тутаётганлигини деярли ошкора тан олмай келади.
Энди "Вагнер" қандай ташкилот бўлади?
Сурат манбаси, Telegram/Grey Zone
Пригожинсиз "Вагнер" бошсиз одамдек гап. Энди "Вагнер" қандай ташкилот бўлади? Унинг 25000 жангчиси-чи?
Бутун дунёдаги Россиядаги сўнгги воқеаларни кузатиб турган аксар таҳлилчилар, Евгений Пригожин ўлими хабарлари ортидан "Вагнер" хусусий-ҳарбий компаниясига нима бўлади, деган саволга жавоб топишга интилмоқдалар.
Чунки "Вагнер" нафақат ёлланма жангчилар ташкилоти, балки Россияга мўмай даромад келтираётган иқтисодий манба сифатида ҳам хизмат қилади.
АҚШда нашр қилинадиган Wall Street Journal Евгений Пригожиннинг Африкага сўнгги сафарларига бағишланган мақола эълон қилди.
Wall Street Journalнинг ўзининг кўп сонли манбаларига таяниб хабар қилишича, Пригожин Марказий Африка республикаси ва Малида яна "Вагнер" билан ҳамкорликни давом эттириш мақсадида музокаралар қилиб юрган вақтида Ливияга Россия Мудофаа вазири ўринбосари Юнус-Бек Евкуров раҳбарлигидаги ҳайъат борган.
Мақсад, шу вақтгача "Вагнер" билан бўлган ҳамкорликни Мудофаа вазирлик назоратида давом эттиришга Ливия томонини кўндириш бўлгани хабар қилинмоқда.
"Вагнер" Марказий Африка республикасида олмослар эвазига ҳукумат хавфсизлик кучларини ҳарбий тайёргарликдан ўтказган.
Шунингдек, кўплаб инсон ҳақларини поймол этишда айбланган.
Африканинг бошқа жойларида хомашё савдосидан даромад қилинган, бу пуллар эса Россиянинг Украина урушини молиялашга сарфланган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Украинадан эса Вагнер жангчилари чиқарилдилар.
Июнь ғалаёни ортидан вагнерчилар Беларусдаги чодир лагерга жойлаштирилганлари хабари тарқалди, сўнг уларнинг айримлари Африкага юборилдилар.
"Пригожинсиз "Вагнер" бошсиз одамдек гап. Гуруҳ аллақачон июндаги ғалаён ортидан ўз қурол-яроғини Россия ҳукуматига топширди. Шундай экан, "Вагнер"нинг 25000 жангчисига нима бўлади? Ва ташкилот сифатида "Вагнер" қандай ташкилотга айланади? Катта эҳтимол билан у Кремль назорати остига олинади. Саккиз йил олдин "Вагнер"ни тузишда ёрдамлашган Россия ҳарбий разведкаси - ГРУга кўпроқ вазифа юкланса керак", дейди Би-би-сининг хавфсизлик мухбири Фрэнк Гарднер.
"Вагнер" бундан кейин қандай ташкилотга айланиши ҳаракатлари махфий қилинади: махфий амалиётлар, исёнчиларни, қуролли гуруҳларни ўқитиш, кўпроқ кибер жосуслик амалиётлари. Ўйлашимча, шунинг учун ҳам биз бу ишга Россия жосуслик хизматлари раҳбарларини аралашиши гувоҳи бўлаяпмиз", дейди "Вагнер" бўйича Лу Озборн.
Пригожин самолётини аслида ким уриб туширгани далили ҳеч қачон ошкор бўлмаслиги мумкин.
Лекин бир нарса аниқ: гуруҳ сифатида "Вагнер" энди аввалгидек бўлмайди.
Унинг келажаги мавҳум.
https://t.me/bbcuzbek
BBC.COM/UZBEK
Telegramda bog'lanish raqami +44 7858860002
