Украина уруши ва Россия: Зеленский Қримни барибир олмоқчи, Қримдаги портлаш ортида ким турибди? Ukrainа Rossiya Putin Yangiliklar

Украина Қримдаги портлашларга ўзининг ҳеч бир алоқаси йўқлигини айтди.

Бундан аввал Россия Хавфсизлик Кенгаши раиси Украинани кескин огоҳлантирган.

Қримга ҳужум қилса, Украинани "қиёмат кутажаги" билан таҳдид қилганди.

Украина президенти эса, Қримни "ҳеч қачон бериб қўймасликлари"ни таъкидлади.

Таҳлил:

Украина ўзини Россия тажовузидан қандай ҳимоя қила олади?

Алоқадор мавзулар:

Кеча, сешанба куни Қримдаги Россия базаси қатор портлашларга саҳна бўлган.

Ҳодисада бир кишининг ҳалок бўлгани хабар берилган.

Россия Мудофаа вазирлиги билдиришича, базадаги қурол-яроғ омбори портлаган.

Украина Қримдаги портлашларга ўзларининг бирор бир алоқалари йўқлигини айтиб чиққан.

Россия Украинанинг бир қисми бўлган Қримни 2014 йилда аннексия қилган.

Расмий Кремль ўтказилган референдумни қримликларнинг хоҳиш-иродаси, деб баҳолаган.

Халқаро ҳамжамият Қримнинг Россияга қўшилишини ноқонуний ва нолегитим, дея таъкидлайди.

Шу пайтгача Қримни Украинага қайтаришни талаб қилиб келади.

Ғарб Қрим аннексияси туфайли ҳам Россияга қарши кўплаб санкциялар киритган.

Қримдаги портлаш

Портлашлар Россиянинг Қрим ғарбида жойлашган Новофедоривка яқинидаги Саки базасида юз берган.

Новофедоривка ва Саки Россиянинг Қора Денгиз Флоти жойлашган Севастополдан 50 чақиримча шимолда жойлашган.

Украина соҳилларини қамал қилишда Россиянинг айни шу флоти етакчилик қилиб келмоқда.

Россия эса, Саки базасидан Украина ичкарисидаги объектларни ҳужумга тутишда фойдаланиб келган.

Ижтимоий тармоқларда портлашлар акс этган видеолар ҳам тарқалган.

Уларда портлашлар юз берган маҳалда соҳилбўйида дам олаётганларнинг ўзларини дуч келган тарафга урганликлари акс этган.

Воқеа шоҳидларидан бири 12 та портлаш садосини эшитганлигини айтган.

Россиянинг Қримдаги Соғлиқни сақлаш бошқармаси ҳодисада бир кишининг қурбон бўлиб, яна 8 нафарининг яраланганлигини маълум қилган.

Россия Мудофаа вазирлигининг таъкидлашича, портлашларга базадаги портлаган ўқ-дорилар сабаб бўлган, четдан бирор бир "ўт таъсири" бўлмаган.

Аммо вазирликнинг айни мазмундаги баёноти мустақил равишда тасдиқланмаган.

Украина президентининг ёрдамчиси Михайло Подольяк портлашлар ортида мамлакати турганлигини рад этган.

У "Дождь" телевизион каналига гапирган.

"Албаттаки, йўқ. Бунга бизнинг нима алоқамиз бор", - деган.

Украина томонидан Қримга ҳар қандай ҳужум расмий Москва томонидан жиддий қабул қилинади.

Ўтган ой Россиянинг собиқ президенти ва амалдаги Хавфсизлик Кенгаши раиси Дмитрий Медведев расмий Киевни бу хусусда жиддий огоҳлантирган.

Агар Украина Қримга ҳужум қилса, бошига "Қиёмат куни"ни солишлари билан таҳдид қилган.

Қрим барибир "озод этилади"?

Қримдаги портлашлар ортидан Украина Президенти Володимир Зеленский баёнот билан чиққан.

У Украинадаги уруш Қрим билан бошлангани ва Қримнинг озод этилиши билан якун топажагини баён қилган.

Украина президенти портлашларни тилга олмаган, аммо ўтган тунги нутқида Қрим ҳақида узоқ тўхталган.

"Қрим Украинаники ва биз уни ҳеч қачон бериб қўймаймиз", - деган.

Унинг бу сўзлари Украина худди шу урушда Қримни қайтариб олиши керак, деган ишончда эканига ҳам далолат қилмай қўймаган.

Аммо Украина президенти ўтмишда бу борада турлича гапирган.

У бундан аввал Россия 24 февралдан аввалги мавқеига қайтса, Украина сулҳга рози бўлишига ишора қилган.

Қримнинг тақдирини кейинги музокаралар ҳал қилиши эҳтимолини илгари сурган.

Шу йилнинг 24 февраль куни Россия Украинага тўлақонли босқинини бошлаган.

Ўз қўшинларини Украинага ташлаш учун айнан Қримдан плацдарм сифатида фойдаланган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek