Украина уруши: Путин ва Эрдўғон Эрон сафаридан нимани кўзлаган? Dunyo, yangiliklar

- Author, Матт Мурфи
- Role, Би-би-си
19 июл 2022

Россия Президенти Эронга сафар қилмоқда. Владимир Путин бу ерда Туркия Президенти Эрдўғон билан нималарни муҳокама қилади? Бу Путиннинг феврал ойида Украинага бостириб кирганидан сўнг иккинчи хорижий сафаридир.

Путин Эрон Олий раҳбари Оятулло Али Хоманаи ва Туркия Президенти Ражаб Тоййиб Эрдўғон билан кўришади.

Туркия расмийларининг айтишича, Теҳронда дон экспорти, Сурия ва Украина масалалари муҳокама қилинади.

Россия раҳбари уруш бошлангандан бери собиқ Cовет давлатларига сафарини қисқартирди.

Феврал ойидан сўнг Путин илк бор июн ойида Тожикистон ва Туркманистонга сафар қилди. Бу икки давлат собиқ совет ўлкаси ва авторитар раҳбарлар томонидан бошқарилади ҳамда Россиянинг ҳамкори ҳисобланади.

Сешанба куни бўладиган ташриф ғарб томонидан санкциялар нишонига олинган ва Москванинг саноқли ҳамкорларидан бўлган Эрон билан муносабатларни янада чуқурлаштиришга имконият яратиши мумкин.

Ўтган ҳафта АҚШ расмийлари расмий Теҳронни Украинадаги урушда қўллаш учун Россияга юзлаб дрон етказиб бермоқчи бўлганликда айблаб чиқди.

"Хоманаи билан алоқа ўрнатиш ўта муҳим. Улар ўртасида муҳим икки томонлама ва халқаро масалаларда ишончли мулоқот ўрнатилган", дейди Путиннинг ташқи масалалар бўйича бош маслаҳатчиси Юрий Ушаков.

Skip Энг кўп ўқилган and continue reading

Энг кўп ўқилган

End of Энг кўп ўқилган

Туркия ва Россия Суриядаги фуқаролик урушида қарама-қарши томонларни қўллаб-қувватлайди ва сўнгги ойларда зўравонликни камайтириш устида изланмоқда.

Бироқ икки давлат раҳбарининг учрашуви Туркия Сурия шимолида АҚШ дастагига эга курд жангариларига қарши ҳужум бошлаш билан таҳдид қилиш манзарасида рўй бермоқда. Бунга Россия ҳам, Эрон ҳам қарши чиқмоқда.

Амалиёт Эрдўғоннинг Туркиянинг Сурия билан чегарасида 30 чақиримлик хавфсиз ҳудуд ташкил қилиш режасининг бир қисмидир.

Ўтган ҳафта БМТнинг Хавфсизлик Kенгаши 6 ой давомида Суриядаги исёнчилар назорат қилувчи ерларга ёрдам етказиб беришни тиклашга келишди. Олдин бир йилга деб кўрсатилган ушбу ташаббусга Россия қарши овоз берганди.

Путин 24 февралда Украинага бостириб кирганидан бери расмий Анқара Россияга қарши санкция қўллашни рад қилиб келмоқда. Эрдўғон ҳукумати икки ўртада воситачи ролини ўйнашни истайди.

Учрашув Туркия президентига Россия ва Украина раҳбарлари ўртасида 22 миллион тонналик дон экспорти борасида дастлабки келишувга эриштиришда имкон бериши мумкин.

Ўтган ҳафта Туркия Мудофаа вазири икки томон ҳам дон ортилган кемаларнинг йўл харитаси борасида бир тўхтамга келганини айтганди.

Россиянинг Қора денгиздаги флоти кириб чиқаётган ҳар қандай кемани тўсишини айтмоқда. Би-би-си суриштируви эса Москва кучлари Украина донини ўғирлаб сотаётганини ҳужжатлаштирди. Бошқа йўллар эса миналаштирилган.

"Украина ғалласини экспорт қилиш масаласи Эрдўғон билан муҳокама қилинади. Биз ушбу йўналишда ишлашда давом этишга тайёрмиз", дейди Ушаков.

Муҳокамалар манзарасида уруш чизиғига яқин жойлашган Украинанинг маҳаллий расмийлари ва фермерлари Россия кучлари ғалла далаларини атайин ўтга тутаётганликда айблаб чиқди.

Собиқ Россия маҳкуми ва Украина жанубидаги маҳаллий сиёсатчи Олеҳ Пилипенконинг Би-би-сига айтишича, унинг қўл остидаги Миколаев шаҳрига яқин жойларда деҳқончилик қилувчи фермерларнинг ерлари мунтазам равишда артиллерия ва ракеталардан ҳужумга тутилмоқда.

Унинг айтишича, Россия кучлари далаларни, қишлоқ хўжалиги техникаси ва ғалла омборларини ўтга тутган. Натижада кўплаб фермерлар бу каби ҳужумларнинг қурбони бўлган ва снаряд парчаларидан яраланган.

"Миколаев шаҳридаги ўт ўчирувчилар бу ерларга боришга қўрқишади, чунки бу жуда хавфли. Кўплаб ёнғинларни ўз имкониятимиздан келиб чиқиб ўчиряпмиз. Бироқ ўт очиш кўпаймоқда", дейди у.