Россия-Ўзбекистон. Собяниннинг қаҳри: бунақаси кетмайди! Uzbekistan Airways арзон деган чипталар ҳақиқатда арзонми? Энди яхши телефонсиз Россияга кира олишмайдими? Rossiya dunyo yangiliklar
Сурат манбаси, SERGEI SAVOSTYANOV/TASS
- Юзлаб депортация, минглаб тақиқлар;
- Арзон чипта қанча бўлиши керак?
- Ҳамма талабалар учун очиқ;
- Мобил иловасиз Россияга кира олмайсиз;
Юзлаб депортация, минглаб тақиқлар
Сурат манбаси, BBC Uzbek
Ўтган хафтада пойтахтнинг ўзида икки жойда оммавий жанжаллар қайд этилгани ортидан Москва мэри Сергей Собянин қатъий огоҳлантириш билан чиқди.
- Бунақаси кетмайди. Биз бундай меҳмонлардан мамнун эмасмиз. Шу боис, сўнгги ойларда полиция қаттиқ рейдлар ўтказди. 800 та жиноят иши қўзғатилди, 200 га яқин одам депортация қилинди, 17,5 мингга мамлакатга кириш тақиқланди.
Баъзиларга бу қаттиққўллик бўлиб туюлиши мумкин. Аммо келгусида ҳам шундай давом этади. Москва - меҳмондўст шаҳар. Аммо меҳмонга келганда ўзингизни муносиб тутинг, - дея ёзди Сергей Собянин ўзининг расмий сайтида.
Арзон чипта қанча бўлиши керак?
Uzbekistan Airways АЖ фақат меҳнат муҳожирларини ташишга мўлжалланган рейсларни йўлга қўйган ва уни тўлиқ тежамкор рейслар деб атамоқда.⠀
Унда компания "Мустақиллик байрамини нишонлаш арафасида авиаташувларнинг янги гибрид моделига ўтди ва унинг доирасида Uzbekistan Airways Express Тошкентдан Москвага биринчи авиақатновни амалга оширди", дея хабар беради компания Telegram даги расмий саҳифасида.⠀
Сурат манбаси, official
Шунингдек, Uzbekistan Airways Express Ўзбекистон Республикаси Меҳнат вазирлиги билан ҳамкорликда 22 нафар мигрант-йўловчиларга Тошкент-Москва йўналиши бўйича бир марталик бепул авиачипталарни ҳадя этганини маълум қилади. ⠀
"Uzbekistan Airways Express "тўлиқ эконом" тарзида компоновка қилинган 4 та Airbus A320 самолётида маҳаллий ва минтақалараро авиақатновларга эътибор қаратади. Парвозлар Москва, Новосибирск, Қозон, Ростов-на-Дону, Краснодар, Сочи, Минералные Воды, Екатеринбург ва Ақтау, Ақтобе каби шаҳарларга амалга оширилади", дейилади хабарда.
Хабарларда сентябрь ойида Ўзбекистон шаҳарларидан Москвага Uzbekistan Airways Express рейсларига чипта нархи 1 490 645 сўмдан (140 доллар) бошланиши айтилган. Қайтиш чипталари 2 833 750 сўмдан (266 доллар) бошланиши билдирилган ва бу чипта нархларининг арзонлиги таъкидланган.
Пандемия даврига қадар Ўзбекистондан Россияга учиш учун чипталар ўртача 120 долларгача бўлган нархни ташкил этган. Карантин чекловлари ортидан авиақатновлар чекланиши ортидан чартер рейлар амалга ошира бошланган ва уларга чипталар нархи 4-5 баробарга ошиб кетган эди.
Ўрганишларимизга кўра, айни пайтда Москвадан Ўзбекистоннинг турли шаҳарларга самолёт чипталари нархлари ўртача 80-100 долларни ташкил этмоқда.
Uzbekistan Airways Express нинг тежамкор рейслари учун чипта нархлари эса айни йўналишда икки баробар қимматга сотилмоқда.
Ҳамма талабалар учун очиқ
Сурат манбаси, official
Россия олийгоҳларининг чет эллик талабалари келаси ҳафтаданоқ Россия Федерациясига кира бошлайди. Оператив штаб чет элдан талабалар келиш алгоритмини тасдиқлади. Бу ҳақда Россия Таълим ва фан вазирлиги раҳбари Валерий Фалков маълум қилди.
Оператив штаб ҳар қандай мамлакатдан келган чет эллик талабаларга Россияга ўқишга қайтишларига рухсат берди. Россияда ўқиган ёки бу йил ўқишга кирган ҳар бир киши ётоқхоналарга қайтиши ва одатдаги шаклда ўқиши мумкин бўлади.
Университетлар коронавирусга қарши эмланмаган талабаларни ўқишдан четлаштиришга ҳақли эмас, деган эди вазир аввалги чиқишларида.
Мобил иловасиз Россияга кира олмайсиз
1 сентябрдан Ўзбекистон фуқаролари учун Россияга киришнинг янги тартибига кўра, эндиликда махсус иловасиз ўзбекистонликлар Россияга умуман киритилмайди.
Uzbekistan Airways AЖ Россияга боришни режалаштираётган йўловчилар учун киритилаётган янги тартиб ҳақида маълумот берди.
Таъкидланишича, 1 сентябрдан МДҲ мамлакатлари, жумладан Ўзбекистон фуқаролари учун Россияга кириш тартиби ўзгаради. Яъни, ўзбекистонликлар "COVID-19'сиз саёҳат" (Путешествую без COVID-19) иловаси орқали тақдим этилган "яшил" статус QR-кодини кўрсатишлари шарт бўлади.
QR-кодни олиш учун қуйидагиларни амалга ошириш зарур:
- App Store, Google Play, AppGallery (Huawei иловалари дўкони) орқали "Путешествую без COVID-19" мобиль иловасини юклаш;
- Мобиль илова юкланганидан сўнг уни ишга тушириш, тил ва геолокацияни танлаш;
- Қайси давлатдан қайси давлатга кетаётганлигингизни белгилаш;
- 72 соатдан кўп бўлмаган вақтда ПЗР-тестини Ўзбекистонда аккредитациядан ўтган лабораторияларда топшириш.
- Лаборатория ходимига тест натижасини "Путешествую без COVID-19" мобил иловаси орқали олмоқчи эканлигингизни хабар бериш. Паспорт ва унинг серия рақамини киритиш;
- Телефонингиздаги QR-код орқали лаборатория томонидан берилган тест натижаларини скан қилиш;
- Чегарани кесиб ўтаётганингизда масъул ходимга QR-кодни телефонингиз экрани орқали тақдим этиш.
Янги тартибда Россияга ишлашга кетаётган ўзбекистонликларнинг сўнгги қулайликларга эга бўлмаган телефонлари бўлиши мумкинлиги ёки замонавий дастурларни қўллана олмаслик каби эҳтимолларда қандай йўл тутилиши каби маълумотлар берилмаган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
