Ўзбекистон учрашуви: Путин ва Си Цзиньпин Самарқандда нимани гаплашишади? O'zbekiston ShHT Dunyo Yangiliklar - янгиликлар

Охирги ҳафталарда жаҳондаги кўплаб нуфузли нашрлар Самарқанд саммитига эътибор қартмоқдалар, Путин билан Си Цзиньпин нимага келишишаркин, деган саволга қизиқиш кучайган.

"Путин ва Си Цзиньпиннинг муҳим учрашуви" деган сарлавҳалар қўйилаётган учрашув Шанхай Ҳамкорлик ташкилотининг 15-16 сентябрь кунлари Ўзбекистонда бўлиб ўтадиган саммитида кутилаяпти.

Муҳимлигининг икки сабаби айтилаяпти.

Бири, Украинага бостириб киргани оқибатида Ғарб санкция ва чекловлари остида якканишин раҳбарга айланган Россия Президенти Владимир Путиннинг илк йирик халқаро тадбирда қатнашаётгани, иккинчиси, 2020 йилги Ковид чекловларидан кейин Хитой раҳбари Си Цзиньпиннинг биринчи марта хорижга чиқаётгани, дейилмоқда.

Алоқадор мавзулар:

Украина босқини бошланганидан кейин Россия раҳбариятининг Ғарб, хусусан, "АҚШнинг дунёдаги яккаҳукмронлигини" барбод этмоқчи эканликлари ҳақидаги баёнотлари кучайди, ўзларининг Европадан бошқа қитъаларда сиёсий ва иқтисодий ҳамкорлари кўпайиб бораётганини айтмоқдалар.

Россия раҳбарияти ва матбуотининг Шанхай Ҳамкорлик ташкилотини Ғарбга қарши блок сифатида тақдим этиш ҳаракатлари кўпайди.

Бунга жавобан, Ўзбекистон вакиллари, ШҲТ - Ғарбга қарши тузилган ташкилот эмас, Самарқанд саммити кун тартибида глобал геосиёсий инқироз масалалари йўқ, деб чиқди, саммитда ташкилотга аъзо бўлмаган давлатлар ҳақида ҳеч қандай чақирув ёки баёнотлар бўлмаслигини таъкидлашди.

Хитой Россия урушида бетараф қолишга қарор қилди. Пекин Украина босқинини қоралагани ҳам йўқ, Россияга қурол-яроғ билан ёки санкцияларини айланиб ўтишда кўмак ҳам бергани йўқ.

Хориж компаниялари Россияни тарк этганидан кейин Хитой автомобиллари, телевизор ва мобиль телефонларининг экспорти юқори кўтарилиб кетди.

АҚШда нашр этиладиган The Wall Street Journal Самарқанд учрашуви Россия ва Хитой раҳбарининг Украина уруши бошланганидан буён илк кўришиши эканини ёзади ва улар Ғарбга қарши туриш йўлини излайдилар, дейди.

ШҲТ саммити Россия уруш бошлаганидан буён Украинада энг йирик мағлубиятларига учраётган кунларда бўлиб ўтади, таҳлилчилар, Россия Ғарб санкцияларини четлаб ўтиш учун Хитойдан янада кўпроқ иқтисодий кўмак сўраши мумкин, дейдилар.

Вашингтондаги Стимсон тадқиқот маркази таҳлилчиси Юн Сан айтишича, Украина ғалабаси Си Цзиньпиннинг Путин билан мулоқотида "қўлини баланд қилади".

"Россия ютиши ёки ютқазишидан қатъи назар, Хитой Россия билан алоқаларини янада ривожлантириш истагидан воз кечмайди. Чунки бунга умумий геосиёсий ривожланиш, айниқса, Хитой-АҚШ муносабатларининг ёмонлашаётгани туртки беради", деди Юн Сан.

"Агар Россия ғалаба қозонса, Хитой қудратли иттифоқчига эга бўлади. Агар Россия мағлубиятга учраса, ҳойнаҳой, Хитойнинг вассалига айланади", деди сиёсий таҳлилчи.

Ал-Жазира икки раҳбар учрашуви Хитойда кутилаётган янги раҳбар сайлови ва дунёнинг йирик 20 мамлакати раҳбарларининг саммити олдидан бўлаётганига эътибор қаратди.

Си Цзиньпин учинчи марта Коммупистик партия бош котиби лавозимида қолишни кўзлаяпти, Индонезиядаги G20 саммитига Путин бормасин, деган чақириқлар янграган.

13 сентябрь куни Хитой Ташқи ишлар вазирлигидаги кунлик брифинг пайти журналистлар "Си Цзиньпин Самарқандда Россия Президенти Путин, Ҳиндистон Бош вазири Моди билан учрашадими" деган саволни берганлар, Хитой Ташқи ишлар вазирлиги мулозими бу саволга жавоб беришдан бош тортган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek