Украина уруши: Британия янги санкциялари рўйхатига Алишер Усмонов жиянлари ҳам киритилди Rossiya Dunyo yangiliklar
Сурат манбаси, Getty Images
Буюк Британия Россиянинг Украинага босқинига жавобан санкциялар жорий қилган инсонларнинг рўйхатини кенгайтирди.
Буюк Британия ҳукуматининг расмий веб-сайтида Ташқи ишлар вазирлигининг эълони босилди.
Хабар қилинишича, янги санкция рўйхатига Россиядаги 29 губернатор ва Россия Адлия вазири Константин Чуйченко, унинг ўринбосари Олег Свириденко киритилганлар.
Рўйхатда Россиянинг Украинага чегарадош уч ҳудуди - Курск, Брянск ва Воронеж вилоятлари губернаторлари бор.
Янги санкция рўйхатига Сибирдаги, Узоқ Шарқ, Урал ва Якутиядаги губернаторлар ҳам киритилган.
Рўйхат бошида ўзларини мустақил республикалар деб эълон қилган Донецк Халқ республикаси ва Луҳанск Халқ республикаси раҳбарлари тилга олинган.
"ДХР ҳукумати"нинг янги раҳбари Виталий Хоценко бундан олдин Россия Савдо вазирлигида Минтақавий саноат сиёсати ва лойиҳалаш бошқармаси департаментининг директори лавозимида ишлаган.
Сурат манбаси, Getty Images
"ЛХР ҳукумати раисининг ўринбосари" Владислав Кузнецов эса бундан илгари Курган вилояти губернатори ўринбосари бўлган.
"Бугун Кремлга яқин алоқаларга эса россиялик олигарх Алишер Усмоновнинг жиянлари Сарвар ва Санжар Исмаиловга ҳам санкция жорий этилди. Сарвар ва Санжар иккисининг ҳам Буюк Британияда салмоқли манфаатлари бор ва уларнинг Хайгэйт(Highgate) ва Ҳамстед Хис(Hampstead Heath)да уйлари бор деб ишонилади", дейилади Британия ҳукумати эълонида.
Эълонда Санжар ва Сарвар Исмаиловларнинг Алишер Усмоновнинг жиянлари, Гулбаҳор Исмаилованинг ўғиллари экани айтилган, иккисининг активлари музлатиш нишонига олиниши хабар қилинган.
Сарвар Исмаилов ўтган йил ноябригача Эвертон клуби директори ҳам бўлган.
Собиқ Совет Иттифоқи даврида Ўзбекистонда туғилган Алишер Усмонов Россиянинг Украинага босқинидан кейин санкция киритилган россиялик бизнесменлар рўйхатларига киритилди.
Жаноб Усмонов 28 февраль куни Европа Иттифоқи киритган, 3 март куни Буюк Британия киритган, 3 март куни АҚШ жорий этган санкция рўйхатига киритилди.
Миллиардер Алишер Усмонов Европа Иттифоқи кенгашининг унга нисбатан санкциялар қўллаш ҳақидаги қарорини бекор қилишни талаб қилиб, шу йил май ойи бошида Европа судига даъво аризаси билан мурожаат қилгани, лекин суд даъвони қондирмагани ҳақидаги хабар тарқалган эди.
Telegram каналимиз: https://t.me/bbcuzbek
BBCUZBEK.COM билан Telegram орқали +44 7858860002 номери билан боғланинг.
