Ўзбекистон: Афғонистондан келган 13 тонна наркотик ва Суриядан қайтган ўсмирлар нималар деди? – Янгиликлар O'zbekiston, yangiliklar

UNICEF Суриядан қайтган ўсмирлар ҳикояларини улашди. ДХХ фахрийси Афғонистондан келган рекорд миқдордаги наркотик ҳақида гапирди. Қозоғистонга барча парвозлар қайта тикланди.Ўтган йилда хориждан қанча меҳнат муҳожири жасади қайтган - bbcuzbek.com дайжести.

Алоқадор мавзулар:

"У кунлар даҳшатли эди"

UNICEFнинг Ўзбекистондаги ваколатхонаси Суриядаги жанг майдонларидан олиб чиқилган икки ўсмирнинг ҳикояларини улашган.

Ташкилот вакиллари фарғоналик 16 яшар қиз ва наманганлик 15 ёшдаги бола билан суҳбатлашганлар.

Маълум қилинишича, 2020 йил охирида амалга оширилган Меҳр-3 операцияси доирасида Ўзбекистонга қайтарилган ўсмир қизнинг оиласига маҳаллий ҳокимлик томонидан тўрт хонали квартира берилган.

Қизнинг онаси эса навбатчи шифокор бўлиб ишламоқда.

"Менинг тўрт нафар опа-сингилларим, икки нафар жияним ва онам бор. Биз Сурияда 5 йил давомида - бугун умримизнинг охирги куни, бугун кўзларимизни абадий юмамиз, деган қўрқувда яшадик...", дея қизнинг сўзларини келтирган UNICEF.

Суҳбат давомида қиз жанглардан бирида яралангани, кўрган-кечирганлари туфайли опалари асабий бўлиб қолгани ҳақида сўзлаган.

У Ўзбекистонга қайтган оиланинг ҳаёти тиклана бошлаганини билдирган.

"Биз психологлар билан узоқ суҳбатдан сўнг, уйдан чиқишга қўрқмайдиган бўлдик...", деган ўспирин қиз.

UNICEFнинг билдиришича, Наманганлик ўспирин йигитнинг оиласи Меҳр-5 операцияси доирасида қайтариб келинган.

Маҳаллий ҳокимлик оилага тикув машинаси, уй-жой қуриш учун ер ажратиб берган.

"Мен Сурияда ўтказган кунларим ҳақида сўзлашни истамайман... У кунлар даҳшатли эди...

Бу ерда мени мактабда ҳам, уйда ҳам яхши кутиб олишди. Дўстларим бор. Ҳеч ким менга ёмон муносабатда бўлмайди", деган 15 яшар ўсмир UNICEF вакилларига.

Суҳбат давомида йигитча дастурлашга қизиқиши, келажакда шу соҳа бўйича дарс беришни исташи ҳақида гапирган.

Ўзбекистон 2019 йилдан хориждаги ихтилофли ҳудудларга бориб қолган, чорасиз аҳволга тушган фуқароларини қайтариб олиб келиш ишларини бошлаган эди.

Меҳр операциялари номини олган ушбу инсонпарварлик амали давомида, 2021 йил май ойига қадар, Сурия, Ироқ ва Афғонистондан 500 нафардан зиёд аёллар ва болалар олиб келинган эди.

Рекорд миқдордаги наркотик

ДХХнинг истеъфодаги полковниги Эркин Абдуллаев ЎзА билан суҳбат давомида республика тарихидаги наркотиклар билан боғлиқ энг йирик жиноят тафсилотлари ҳақида сўзлаб берган.

Абдуллаев бундан 30 йил муқаддам Афғонистондан кириб келган катта миқдордаги наркотик воқеасини ёдга олган.

Унинг ҳикоя қилишича, 1992 йил октябрида божхоначилар Афғонистондан Термиз шаҳрига кириб келган 30 тоннага яқин қуритилган майизни кўздан кечирадилар ва текширув давомида юк орасидан жами 13 тонна 50 килограмм гашиш моддаси борлиги аниқланади.

Абдуллаев АҚШ Адлия вазирлиги ушбу жиноят ишига қизиқиш билдиргани, наркотик моддалар эса орадан икки йил ўтиб халқаро ташкилотлар вакиллари ва журналистлар иштирокида ёқиб юборилганини хотирлаган.

Унинг эслашича, жиноятга алоқадор кўрилган шахслар 1998 йилда АҚШ томонидан қўлга олинган.

Абдуллаев ўз кузатишларидан келиб чиқиб, ўтган 30 йил давомида мамлакатда бундай йирик миқдордаги тақиқланган моддалар қайта қўлга туширилмаганини билдирган.

"Дарвоқе, америкаликлар 1992 йилги Термиз воқеасини "Гиннесс рекордлари китоби"га киритиш тўғрисида тақдимнома киритишга ваъда берган эди. Афсуски, бу қуруқ гап бўлиб қолиб кетган", Абдуллаев сўзларини келтирган ЎзА.

Қайта тикланган парвозлар

Uzbekistan Airways 19 январдан бошлаб Қозоғистонга барча парвозлар қайта тикланганини маълум қилган.

Компания қўшни мамлакатда норозилик намойишлари авж ола бошлагач, 5 январдан дастлаб Ақтауга мунтазам парвозларни бекор қилган, кейинроқ, Олмаота ва Ақтўбега режалаштирилган рейслар ҳам амалга ошмаган эди.

Тобутда келган юзлар

2021 йил давомида Ўзбекистонга хорижда вафот этган 518 инсон жасади олиб келинган.

Ташқи меҳнат миграцияси агентлиги ўтган йилда амалга оширилган ишлар сарҳисобини тақдим этган.

Маълум қилинишича, 7,5 минг меҳнат муҳожирига бир марталик моддий ёрдам ажратилган, 8,8 минг инсонга ҳуқуқий кўмак кўрсатилган, 358 нафар муҳожир вақтинча ҳостелга жойлаштирилган.

Шунингдек, агентлик оғир тан жароҳати олган 17 меҳнат муҳожирининг тиббий хизматлари қоплангани ҳамда қарийб $984 минг миқдоридаги тўланмай келинаётган иш ҳақи ва компенсация пуллари ундириб берилганини қўшимча қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek